Read Sayula Popoluca San Juan 9 Bible Online

San Juan 9 - Sayula Popoluca bible

San Juan 9

¹Inas̈ Jesús, i-is̈ tu'c jayau winchic desde ima̱m iguita̱c.

²Mit igui-ucyo'tcau ipʉctampajyat: —Amayipay, ¿pʉn iwat mal, ayʉ̱́j jayau, ite̱t o ima̱m pa ijajt winchic?

³Jesús ipo'ngʉs̈: —Igawatu mal ayʉ̱́j jayau, ne ite̱t ne ima̱m, po jat winchic pa Dios ma ajque's̈ ipoder mit je'.

⁴Itp ti tʉs̈wajtawa'n iyos̈ ayé Dios tʉs̈ajyu'tway mientras itpnaj tiempu en ayʉ̱́j s̈ʉjw, ni'c icutsu'iwa'n, nepʉn caja-oyap iyos̈wat.

⁵Mientras tʉtsʉ̱napnaj en ayʉ̱́j mundu, tʉnta'cs̈cʉs̈áj jayajwat ayʉ̱́j mundujway.

⁶Iguinʉjm we'n, tsuj na̱s̈ni'c mit ituwat mo'ts itsujnʉ', mit ayé mo'ts ijajtsau iwini'c ayé winch,

⁷mit inʉjmau: —Nʉs̈ nigupújʉ en ayé nʉ'to'y tsʉ̱napay barrio Siloé mit ayé inʉmo'jcʉp Ajyu'ticway. Cʉs̈ nʉcs̈, mit nigupujʉu, mit ipitujc, e'pnup.

⁸Cʉs̈ ivecinujat mit jeme igui-is̈caway primeru ni'c wínchigate, inʉmgau: —¿Caje' ayʉ̱́j ayé jeme tsʉ̱naway pa iyo'twa'n?

⁹Cʉjtu'c inʉmgau: —Je' ayé. Mit japu̱jtat inʉmgau: —Ique's̈ as̈am je'. Mit je' inʉm: —Ʉ̱j ayé.

¹⁰Mit iguinʉmgajau: —¿Nat in-e'pta̱jc?

¹¹Je' ipo'ngʉs̈: —Ayé jayau inʉ'jyway Jesús iwat mo'ts, mit tʉs̈jajtsau tʉnwini'c, mit tʉs̈nʉjmau: “Nʉs̈ en ayé nʉ'to'y tsʉ̱napay barrio Siloé, mit nigupújʉ.” Mit tʉ-oy, mit tʉnigupujʉu, mit tʉ-e'pta̱c jaran.

¹²Cʉs̈ iguinʉmgajau: —¿Jʉm itsʉ̱na ayé jayau? Mit je' inʉm: —Tʉngajawip.

¹³Cʉs̈ imunʉs̈cau mam itsʉ̱nga fariseujat ayé jayau jeme tsʉ̱naway winchic.

¹⁴Mit wejpu'n po'cs̈ans̈ʉjw cuandu Jesús iguiwajt mo'ts mit igui-ac-e'pta̱jc ayé jayau.

¹⁵Cʉs̈ igui-ucyo'tcawatu fariseujat nat i-e'pta̱jc. Mit je' inʉmgʉs̈au: —Tʉs̈yajcau mo'ts tʉnwini'c, mit tʉnigupujʉu, mit tʉ-e'pta̱c jaran.

¹⁶Cʉs̈ una̱c fariseujat inʉmgau: —Ayé Jesús caminu mam Dios, ni'c igawatp cuenta po'cs̈ans̈ʉjw. Ja-una̱c inʉmgau: —¿Po nat tu'c jayau iwatpay mal iguiwatwa'n ayʉ̱́j milagrujat? Mit catsʉ̱ngawu en acuerdu ayé jayajwat.

¹⁷Cʉs̈ inʉmgajawatu ayé winch: —¿Mi̱j te, ti inyʉmp de ayé jayau is̈ac-e'pta̱cway? Mit je' inʉm ni'c tu'c profeta i-ajyu'tway Dios.

¹⁸Po judíujat igacupʉjcawu ni'c je' tsʉ̱nau winchic mit e'pta̱c hasta iguiyá̱s̈cajaj ite̱t mit ima̱m ayé jeme e'pta̱cway,

¹⁹mit i-ucyo'tcau: —¿Inwajyat ayʉ̱́j? ¿Inyʉmgap ni'c winchic i-ijt? ¿Nat i-e'pta̱jc?

²⁰Ima̱m mit ite̱t ipo'ngau: —Tʉnjawigap ni'c ayʉ̱́j tʉnwajyat, mit winchic i-ijt,

²¹po tʉngajawigap nat i-e'pta̱jc jinap, ne tʉngajawigapey pʉn igui-ac-e'pta̱c. Po ijtʉnup s̈iwit, oyap is̈-ucyo'tca je', mit je'yu is̈nʉmgajáj.

²²Ite̱t mit ima̱m inʉmgau wename ni'c ipʉ̱tcau judíujat, ni'c judíujat iwatcaway tu'c acuerdu ni'c te tu'c jayau inʉmp ni'c Jesús ayé Cristu i-ajyu'támpay Dios, itu'mbac-acpichingáj mam i-adora̱tca judíujat.

²³Jemni'c iguinʉ́mgaj ite̱t mit ima̱m: “Ijtʉnup s̈iwit, oyap is̈-ucyo'tca je'.”

²⁴Cʉs̈ iya̱s̈cawatu ayé jayau jeme tsʉ̱naway winchic, mit inʉmgajau: —Oyninʉm Dios ni'c je' is̈ac-oytan. Ni'c tʉnjawigap ni'c ayé Jesús tu'c jayau iwatpay mal.

²⁵Cʉs̈ je' ipo'ngʉs̈: —Te je' tu'c jayau iwatpay mal, tʉngajawip. Po tu'c cosa tʉnjawip ni'c tʉwínchigate po jinap tʉ-e'p.

²⁶Inʉmgajawatu: —¿Ti is̈wajtau? ¿Nat is̈ac-e'pta̱c?

²⁷Je' ipo'ngʉs̈: —Tʉnʉmgʉs̈away po ingawangap is̈márauga. ¿Tini'c inwangap is̈maraugawa'natu? ¿Inwangapey injatcawa'n is̈pʉctampajyat je'?

²⁸Mit iguitucotscau mit iguinʉmgajau: —Mi̱ je' is̈pʉctampay, po ʉjtsat tʉs̈pʉctampajyat Moisés.

²⁹Ʉjtsat tʉnjawigap ni'c Dios imucots Moisés, po pa ayé Jesús, tʉngajawigap jʉm imijn.

³⁰Mit ayé jayau ipo'ngʉs̈: —Po ayʉ̱́j nas̈acnigu-épijyʉp ni'c ingajawigap jʉm imijn, mit ʉ̱ tʉs̈ac-e'pta̱c je'.

³¹Mit najawigap ni'c Dios igamarap jeme iwatcapay mal, po te tu'c jayau ipʉ̱tp Dios, mit iwatp lo que Dios iwampay, ayé imarap.

³²Desde ámbanu naganimarap iguinʉ́mga ni'c tambʉn i-ac-e'pta̱cp tu'c jayau ye'cpay winchic.

³³Te ayʉ̱́j jayau magami'nate mam Dios, ca-oyapate neti iguiwat.

³⁴Je'jat iguipo'ngau: —Mi̱ inwat mal desde in-ijt, ¿mit is̈jawi ʉjtsat is̈ajque's̈cajáj? Cʉs̈ itu'mbac-acpichingau mam judíujat i-adora̱tca.

³⁵Mit imarau Jesús ni'c itu'mbac-acpichingau ayé jayau. Mit iguipa̱jt, inajau: —¿Incupʉjcap mi̱ Dios iway?

³⁶Je' iguipo'n: —¿Pʉn ayé, Señor, pa tʉs̈cupʉcwa'n je'?

³⁷Jesús inʉjmau: —Po in-is̈way mit jeme is̈mucotspay, je' ayé.

³⁸Mit je' iguinʉjmau: —Tʉcupʉcp, Señor. Mit cʉs̈ i-adora̱t.

³⁹Jesús inʉm: —Ʉ̱ tʉmín en ayʉ̱́j mundu pa tʉs̈proba̱tcʉs̈wa'n jayajwat te tʉs̈cupʉjcáj ʉ̱, pa jeme ca-e'pcapay, ma e'pca. Mit jeme e'pcapay ma wínchiga.

⁴⁰Cʉs̈ una̱c fariseujat tsʉ̱ngaway mit je', iguimáraugaj we'n, inʉmgajau: —¿Is̈jawi ni'c ʉjtsat tʉwínchijcatey?

⁴¹Jesús ipo'ngʉs̈: —Pi tsʉ̱nga-ate winchic, migatsʉ̱ngájate culpa̱tic mit ma̱jlat. Po jinap ni'c inyʉmgap ni'c mi-e'pcap, is̈tangajap ayé mal inwatcapay.