Read Sayula Popoluca Hechos 11 Bible Online

Hechos 11 - Sayula Popoluca bible

Hechos 11

¹Imaraugau apóstojlat mit hermanujat jeme tsʉ̱ngaway Judeajway na̱s̈ ni'c we'ney iguicupʉ́jcajaj Dios ipalabra ayé jayajwat jeme caje'jatway judíujat.

²Ipítucnuj Pedro pa Jerusalén, judíujat jeme cupʉjcaway imuninʉmgʉjʉu je',

³inʉmgajau: —¿Tini'c is̈tʉcyo'ygʉs̈ jayajwat jeme caje'jatway judíujat? ¿Tini'c is̈mucaygʉs̈ je'jat?

⁴Mit cʉs̈ Pedro chu̱chiu igui-ampiugʉs̈a nu'pʉjʉn jeme jatway, inʉm:

⁵—Ʉ̱ tʉtsʉ̱nau nʉ'jcopac Jope mit tʉ-ora̱tpate, mit Dios tʉs̈actu-is̈ tu'c visión, mit tʉn-is̈ tu'c cosa as̈am tu'c manta mʉjway jeme manacpay tsajpni'c, mit tsumic itsʉ̱naj inimactas̈pij i-esquina, mit coy hasta mam tʉtsʉ̱naj.

⁶Mit tʉngu-e'pca̱t ayé cosa, mit cʉs̈ tʉpensa̱t ¿ti ayé? Mit tʉn-is̈ aníma̱jtat ojyatway mit aníma̱jtat ma̱jlatway, tsanajyat mit jonwájat.

⁷Mit tʉnmarau ni'c cotsp el Señor mit tʉs̈nʉjmau: “Ca's̈ʉ'c, Pedro, ago'c mit cay.”

⁸Mit tʉnyʉjmau: “Ca̱ Señor, ni'c nunca tʉnganicayp nejʉmay cosa jeme ca-oyway nas̈caywa'n ne jeme caje'way limpiu.”

⁹Mit wejpu'n tʉs̈po'nwatu desde tsajpni'c: “Jeme Dios inʉmway ni'c limpiu, camnʉmwit ni'c ca-oy nas̈caywa'n.”

¹⁰Mit jat we'n tu̱gup viaje, mit cʉs̈ nu'pʉjʉn ayé cosajat imunʉcs̈nuwatu pa tsajpni'c.

¹¹Mit en ayé ratu icóygaj tu̱gup jayajwat en ayé tʉjc mam ʉ̱ tʉtsʉ̱́naj. Ayé jayajwat i-acmingau desde nʉ'jcopac Cesarea pa tʉs̈che'ngáj ʉ̱.

¹²Mit Espíritu Santu tʉs̈najau ni'c tʉnʉs̈ mit je'jat mit tʉgapensa̱t neti. Mit nʉs̈cawey mit ʉ̱ ayʉ̱́j seis hermanujat. Mit tʉcóygaj jem, tʉtʉgʉygau tu'c jayau itʉcm.

¹³Ayé jayau tʉs̈ampiugajau nat igui-is̈ tu'c ángel itujugum jeme tenaway mit iguinʉjmaway: “Ajyu'tcʉs̈ jayajwat pa nʉ'jcopac Jope, mit acmi'n Simón jeme inʉ'jywayey Pedro.

¹⁴Je' is̈nʉjmáj nat inyisalva̱tcʉjʉwa'n mi̱ mit nu'pʉjʉn intʉcm tsʉ̱ngapay.”

¹⁵Mit tʉchu̱chij cotspay, Dios imoygʉs̈wey Espíritu Santu as̈am primeru nas̈moygawey ʉjtsat.

¹⁶Cʉs̈ tʉnyijawiu lo que inʉmway el Señor Jesús, inʉm: “Iyacs̈ta'cway Juan nʉ'gutem mit nʉ', po Dios is̈moygáj Espíritu Santu.”

¹⁷Te Dios imoygʉs̈ey Espíritu Santu pa je'jat as̈am je' nas̈moygau ʉjtsat jeme nacupʉjcaway el Señor Jesucristu, ¿is̈jawiga ʉ̱ oyáj tʉs̈atuc Dios?

¹⁸Cʉs̈ ayé hermanujat iguimáraugaj ayé cosajat, cajacotscawu mit i-oyninʉmgau Dios, inʉmgau: —¡Dios imoygʉs̈ laj hasta caje'jatway judíujat ma cuyaguiga ima̱lway to̱jwat pa ma aguepca vida cacʉs̈ámpay!

¹⁹Cuandu igui-ago'jcaj Esteban, chu̱chigawey iguipo'ctánga japu̱t cupʉcpajyat, mit je'jat po'jcau hasta Feniciajway na̱s̈, Chiprejway na̱s̈ mit pa nʉ'jcopac Antioquía. Mit solo inʉmgajau Dios ipalabra pa judíujatu, mit pe'ta̱may jayajwat ca̱j.

²⁰Mit entre je'jat it una̱c cupʉcpajyat Chiprejatway mit Cirenejatway. Icóygaj Antioquía, imucotscau jeme caje'jatway judíujat, mit inʉmgajau ayé oyway noticia iyacway el Señor Jesús.

²¹Mit el Señor iguimajyigau je'jat mit ipoder, mit mayo'c chu̱chigau iguicupʉjca el Señor.

²²Mit cupʉcpajyat Jerusalénway imaraugau jeme jatway jem, mit i-ajyu'tcau Bernabé ma nʉs̈ hasta Antioquía.

²³Icojy jem, Bernabé i-is̈ ni'c Dios imoygʉs̈ favor, mit ji'cta̱c ijo̱jt. Mit itsawigʉs̈ nu'pʉjʉn ma siguia̱tca iguicupʉjcawa'n el Señor Jesús mit nu'pʉjʉn ijo̱jtat.

²⁴Mit Bernabé tu'c jayau oyway, mit tsʉ̱nau mʉgʉc Espíritu Santu ijo̱tni'c, mit icupʉc may Dios. Mit may jayajwat chu̱chigau iguicupʉjca el Señor Jesús.

²⁵Mit cʉs̈ Bernabé nʉcs̈ pa Tarso pa iguiche'nwa'n Saulo, mit iguipa̱jt, imumin pa Antioquía.

²⁶Mit je'jat tsʉ̱ngau tu'c s̈iwit mit cupʉcpajyat jemay, mit i-ajque's̈cajau may jayajwat. Mit wejpu'n ayé cupʉcpajyat chu̱chigau iguinʉ'jymoygap cristianujat en ayé nʉ'jcopac Antioquía, ni'c je'jat icupʉjcau Cristu.

²⁷Mit en ayé s̈ʉjwat mingau profetajat Jerusalén hasta Antioquía.

²⁸Mit mam itsʉ̱nga hermanujat, nitenda̱jcʉu tu'c profeta inʉ'jyway Agabo, mit je' igui-actujawiu Espíritu Santu ti jatámpay. Inʉm ni'c itáj tu'c yu' mʉgʉcway nu'pʉjʉn laj mam itsʉ̱nga jayajwat. Ayé yu' it cuandu imanda̱jt rey Claudio.

²⁹Mit cʉs̈ cada cupʉcpay, según i-oyaj, ipensa̱tcau igui-ajyu'tcawa'n ayuda pa ayé hermanujat jeme tsʉ̱ngaway Judeajway na̱s̈.

³⁰Mit we'n iguiwátcaj, mit i-ajyu'tcau Bernabé mit Saulo ma munʉs̈ca ayuda pa ayé jayajwat icuida̱tcapay cupʉcpajyat Judeajway na̱s̈.