Read Sayula Popoluca Hechos 12 Bible Online

Hechos 12 - Sayula Popoluca bible

Hechos 12

¹En ayé nije'yu tiempu rey Herodes chu̱chiu iguiwatcʉs̈a mal una̱c cupʉcpajyat.

²Mit i-ac-ago'jcʉu mit espada Jacobo, Juan imajtsʉc.

³Igui-is̈ Herodes ni'c iguigusta̱tcap we'n judíujat, je' siguia̱t mit i-actanwey Pedro. Jat we'n en ayé ma̱s̈ʉjw cuandu iguicáygaj ma̱s̈anʉ̱n sin levadura.

⁴Mit igui-actángaj Pedro, Herodes icom cuytujugum, mit i-entrega̱tcʉs̈ mactas̈p grupu de mactas̈p soldájat ma cuida̱tca. Mit Herodes ipensa̱t igui-acpichinwa'n Pedro inas̈wa'n ma̱s̈ʉjw pascua, mit i-ac-ago'jcʉ̱́j jayau-awa'tsam.

⁵Jemni'c Pedro iguicuidá̱tcaj cuytujugum, po cupʉcpajyat i-ora̱ti̱jcajau Dios pa ma majyi Pedro.

⁶Mit Herodes i-ac-ago'jcʉ̱́jate Pedro icus̈ʉwiwa'n, po nije'yu tsu' ma̱p Pedro entre mechc soldájat, mit cutsumda'guic itsʉ̱naj mit mechc cadena, mit cuida̱tpajyat tsʉ̱ngau pe'ta̱m tʉc-auni'c, icuida̱tcap presutʉjc.

⁷Mit cʉs̈ que's̈ta̱c el Señor Dios i-ángel, mit anangada̱c tu'c luz cuytujugum. Iguipás̈aj Pedro icabapni'c, i-acjutuc, inʉm: —Ca's̈ʉ'c jaran. Mit cʉs̈ cadenajat iguica'ugajau icʉ'ni'jcat.

⁸Iguinʉjmau ángel: —Actsʉ'cs̈ incinturón mit com incʉ'ac. Mit we'n iguiwajt Pedro. Cʉs̈ iguinʉjmau: —Com inma'nchec mit natspoguiyac.

⁹Mit Pedro pichin mit inatspoguiu ayé ángel, mit canimojyʉpate cuenta ni'c iyacs̈ta'cway lo que iwatpay ayé ángel, po je' inʉmpayta ni'c cucma̱p.

¹⁰Iguinás̈caj primeruway mit segunduway grupu de soldájat, coygau pa mam i-it tu'c pus̈antʉc-ajw jeme pichimpay pa nʉ'jcopacni'c. Ayé tʉc-ajw je'yu ni-awa̱jtsʉu, mit ipíchingaj, ituyo'ygau tu'c calle, mit cʉs̈ ayé ángel iyac Pedro itu'gumu.

¹¹Mit cʉs̈ Pedro nimojyʉu cuenta, inʉm: —Jinap que tʉnjawinup ni'c iyacs̈ta'cway el Señor Dios i-ajyu't i-ángel mit tʉs̈acpichin Herodes icʉ'jugum, mit tʉs̈acpichiney judíujat icʉ'jugujmat, ni'c je'jat iwangapate tʉs̈ago'jcáj.

¹²Ipensa̱jt wename, Pedro coy tʉc María, Juan Marcos ima̱m, mit mayo'c ni-apʉcmujcʉjʉu jem mit ora̱tcau.

¹³Mit Pedro ipas̈ tʉc-ajw pe'tni'cway, mit pichin igui-e'p tu'c quis̈aywáy inʉ'jyway Rode.

¹⁴Mit ayé quis̈ay iguijawij ni'c cotsp Pedro, ji'cta̱c ijo̱jt, po iga-awa̱tsu jaran tʉc-ajw. Je' nʉcs̈ pujʉ'c pa tujugum, mit inʉmgʉs̈au ni'c Pedro tsʉ̱nap tʉc-auni'c.

¹⁵Mit je'jat iguinʉmgajau: —Mi̱ miloca. Po je' inʉmgʉs̈au ni'c iyacs̈ta'cway. Mit cʉs̈ je'jat inʉmgau: —Dejuru i-ángel ayé iguicuida̱tpay.

¹⁶Po Pedro siguia̱t iguipas̈ tʉc-ajw, mit igui-awa̱jts, i-is̈cau ni'c je' ina̱mac, mit nigu-épigʉjʉu.

¹⁷Po je' iwatcʉs̈au seña magacotsca, mit i-ampiugʉs̈au nat igui-acpichin el Señor Dios cuytujugum. Mit inʉmgʉs̈au: —Actujawiga-ey Jacobo mit hermanujat ti tʉs̈jatway. Cʉs̈ pichin Pedro, mit nʉcs̈ jatu'c laj.

¹⁸Icus̈ʉwij, ni-ucyo'tcʉjʉu soldájat, ni'c igajawigawu jʉm inʉjcs̈ Pedro.

¹⁹Mit Herodes iche'n Pedro, mit como igapa̱tu, i-ucyo'tcʉs̈ ayé cuida̱tpajyat, mit cʉs̈ manda̱t ma ago'jca je'jat. Mit cʉs̈ Herodes pichin Judeajway na̱s̈ pa inʉs̈wa'n Cesarea, mit jem itajn.

²⁰Mit Herodes imu-awa'nigʉs̈ ayé jayajwat jeme tsʉ̱ngaway Tiro mit Sidón, po je'jat mimbʉ'ngau mam je' mit i-amigujatcau Blasto ni'c je' ijtʉu mʉjway cargu mit rey Herodes, mit iyo'tcajau ma iguigacomgajac tsuguin, ni'c je'jat caygap reyna' ina̱s̈ni'c.

²¹Mit Herodes iyajcʉs̈au tu'c s̈ʉjw itucoygámpay jem, mit wejpu'n Herodes tsʉ̱nau cutigatsic mit puru jamuc oyway, mit nitsʉ̱nda̱jcʉu itrononi'c mit imucotscʉs̈ nu'pʉjʉn jayajwat.

²²Mit nu'pʉjʉn jayajwat chu̱chigau ya̱s̈pay, inʉmgau: —¡Cotsp as̈am tu'c dios, mit caje' jayau!

²³Mit cʉs̈ igui-actu'jnʉu jaran el Señor Dios i-ángel, ni'c iga-oyninʉmu Dios, je'yu nimʉjninʉjmʉu. Mit ijo̱jtugum iguicaygau tsugujtat, mit cʉs̈ o'c.

²⁴Mit hermanujat más i-ajque's̈cajau Dios ipalabra, mit inʉmdacyo'ygau nu'pʉjʉn parte.

²⁵Mit Bernabé mit Saulo cʉs̈ iguimájyigaj, pichingau Jerusalén. Mit imunʉs̈cawey Juan Marcos.