Read Sayula Popoluca Hechos 2 Bible Online

Hechos 2 - Sayula Popoluca bible

Hechos 2

¹Icojy ayé s̈ʉjw itutsougapay ma̱s̈ʉjw Pentecostés, nu'pʉjʉn hermanujat ni-apʉcmujcʉjʉu en tu'c lugar.

²Mit imaraugau jaran tu'c ruidu jeme minway tsajpni'c, mit ayé ruidu min as̈am tu'c s̈e'm jeme s̈ujpay mʉgʉc, mit imaraubʉ'ngau jaran en ayé tʉjc mam itsʉ̱́ngaj.

³Mit iguique's̈ta̱jcajau tu'c cosa as̈am jʉn-ádatsic, mit ayé que's̈ as̈am jʉjn iyo'y, mit iguicutomigau cada jayau.

⁴Mit Espíritu Santu tʉgʉy ijo̱tni'jcat nu'pʉjʉn je'jat, mit chu̱chigau cotspay en jatu'c ajwat as̈am Espíritu Santu igui-ajcotscau.

⁵Wejpu'n itsʉ̱ngaj Jerusalén judíujat jeme i-adora̱tcaway Dios. Ayé jayajwat mingau nu'pʉjʉn na̱s̈atway.

⁶Mit imaraugau nat ayé hermanujat igui-oyninʉ́mga Dios. Iguimáraugaj we'n, ayé jayaujuc nigutomigʉjʉu mit nigu-épigʉjʉu jaran ni'c cada jayau imarau icótsca ayé hermanujat, mit is̈ta'c imaraugau ni'c cotscau as̈am je'jat icotsca.

⁷Mit nigu-epigadá̱jcʉjʉu, inʉmgau: —¡E'pnaj! Ayʉ̱́jat Galileajatway jeme cotscapay.

⁸¿Tini'cpaj nas̈márauga icótsca cada jayau na-auni'jcat mam naye'jca?

⁹Yam itsʉ̱nga jayajwat jeme mingaway nu'pʉjʉn na̱s̈atway, Partiajway na̱s̈, Mediajway, Elamway, Mesopotamiajway, Judeajway, Capadociajway, Pontojway mit Asiajway na̱s̈.

¹⁰Mingawey Frigiajway na̱s̈, Panfiliajway, Egiptojway mit Africajway tom Cirenejway na̱s̈. Mit yam itsʉ̱nga-ey Romajatway, is̈ta'c judíujat mit jayajwat jeme niwatcʉjʉway judíujat.

¹¹Yamey itsʉ̱nga Cretajatway mit Arabiajatway. Mit namaraugap icótsca as̈am ʉjtsat nacótsca, mit inʉmgap ayé mʉjway cosajat iwatpay Dios pa ʉjtsat namárauga.

¹²Mit nu'pʉjʉn nigu-épigʉjʉu may mit igajawigawu ti inʉmgáj, nimucotscʉjʉu je'jatu, inʉmgau: —¿Ti inʉmo'jcʉp ayʉ̱́j jeme jatpay?

¹³Po japu̱jtat itus̈i̱jcau, inʉmgau: —Ayʉ̱́jat mu̱go'jcʉjʉp.

¹⁴Mit cʉs̈ Pedro nitenda̱jcʉu mit ayé once apóstojlat, mit cotsta̱c mʉgʉc, inʉmgʉs̈au: —Jayajwat Judeajatway mit nu'pʉjʉn mijchat mitsʉ̱ngapay Jerusalén, tʉnwamp pi entendia̱tca. Maraugac oymanac lo que tʉnʉmgʉs̈ámpay.

¹⁵Ʉjtsat tʉgaje'jat mu'gajayajwat as̈am mijchat is̈nʉmga ni'c jopoyito'cnaj pa imu̱jcʉjʉwa'n jayajwat.

¹⁶Po ayʉ̱́j jeme jatway, ayé as̈am iguinʉjm profeta Joel, inʉm:

¹⁷We'n iguinʉm Dios: Yename ijatwa'n últimu s̈ʉjwat, tʉnmoygʉs̈áj tʉn-espíritu nu'pʉjʉn jayajwat, mit inwayna'jat inʉmdacyo'ygáj lo que ʉ̱ tʉnactunʉmgʉs̈ámpay, ya̱wayna'jat i-e'pcáj cosa oymanajcatway as̈am en tu'c cucma', mit na'waywájat cucma̱gáj.

¹⁸En ayé s̈ʉjwat tʉnmoygʉs̈áj tʉn-espíritu tʉnmozojat, jayajwat mit to's̈ajyat, mit je'jat inʉmdacyo'ygáj tʉmpalabra.

¹⁹Mit tʉ-acnigu-epigʉs̈ʉ̱́j mit milagru itámpay tsajpni'c, mit we'ney na̱s̈ni'c tʉ-actu-e'pcʉs̈áj majatway señajat, as̈am nipin, jʉnjuc mit wi's̈icjuc.

²⁰S̈ʉwáy cuchitimiyáj, mit po'wáy que's̈áj as̈am nipin, antes imi'nwa'n ayé s̈ʉjw ijuzga̱twa'n el Señor, mit nu'pʉjʉn jayajwat i-e'pcáj ayé s̈ʉjw mʉjo'cway.

²¹Mit nu'pʉjʉn jeme inʉ'jutámpay el Señor iyacs̈ta'cway, nisalva̱jtʉ́j. We'n iguinʉjm Dios.

²²Mit Pedro siguia̱t iguinʉmgʉ́s̈a, inʉm: —Jayajwat Israelway, maraugac lo que tʉnʉmgʉs̈ámpay. Dios nas̈actu-is̈cau ni'c i-aproba̱t Jesús Nazaretway ni'c iguimoy poder ma wat majatway milagrujat, nas̈acnigu-épigʉjʉu, mit iwat majatway señajat mam mijchat intsʉ̱́ngaj, as̈am is̈jawiga-ey.

²³Judas i-entrega̱t Jesús mijchat incʉ'jugujmat, po Dios inʉm ni'c we'n iguijatáj Jesús, ni'c je' iwan jayajwat ma nisalva̱tcʉjʉ, mit Dios ijawiu desde ámbanu ti iguijatámpay. Jesús inactangau mit inactu-ago'jcau maljayajwat cunu̱s̈ni'c.

²⁴Po Dios i-acjutucta̱c Jesús mam itsʉ̱nga á̱nimajat, ni'c ca-oyawu itsʉ̱na o'guic.

²⁵Mit rey David inʉm Dios ilibruni'c nat Jesús iguinʉ́jmaj Dios, inʉm: Siempre tʉn-e'p el Señor Dios tom mam tʉtsʉ̱na, como je' tsʉ̱nap tomo'c mam ʉ̱, jayajwat tʉs̈ca-apʉ̱tigáj.

²⁶Jemni'c iji'c tʉnjo̱jt, mit jemni'c tʉcots ni'c ji'cp tʉnjo̱jt. Po'cs̈nú̱j tʉncuerpu ni'c tʉconfia̱tp mit Dios.

²⁷Ni'c mi̱, oh Dios, ingacuyaguiyáj tʉn-espíritu ma tan mam itsʉ̱nga á̱nimajat i-espíritujat, ʉ̱ is̈cupi̱u mit ingayagáj laj tʉpu̱tstogoy.

²⁸Is̈actu-is̈ tu'c to̱u jeme tʉs̈mo'ámpay vida, is̈acji'cta̱jcáj tʉnjo̱jt ni'c mi̱ tʉ-e'páj mam intsʉ̱na.

²⁹Mit Pedro siguia̱t iguinʉm: —Jayajwat, tʉnʉmgʉs̈áj pajcu ni'c o'cway David nate̱jtat ámbanuway, mit ni'piganu itsʉ̱na, mit hasta jinap yam nas̈actsʉ̱nga ni'pic.

³⁰Po como rey David tu'c profeta, ijawiu ni'c Dios iguiprometia̱jtau ni'c i-acmi'náj Cristu nije'yu David ifamiliani'c, mit Cristu manda̱táj as̈am tu'c rey as̈am rey David imanda̱jt.

³¹David inʉm desde ámbanu ni'c Cristu jutucta'gáj, ni'c Dios igacuyáguijyawu Cristu i-espíritu mam itsʉ̱nga á̱nimajat i-espíritujat, ne capu̱tstogoyu icuerpu.

³²Dios i-acjutucta̱c Jesús, mit ʉjtsat tʉnu'pʉjʉjnat tʉnjawigap ni'c iyacs̈ta'cway ayé, ni'c tʉn-is̈cau je' ni'c jutucta̱c.

³³Mit Dios imunʉcs̈ pa tsajpni'c pa ma tsʉ̱na i-oyimaycʉ'ni'c. Mit Dios imoy Jesús ayé Espíritu Santu as̈am iguinʉjm, mit cʉs̈ Jesús imoygʉs̈ Espíritu Santu pa jayajwat, as̈am mijchat is̈-ís̈caj mit is̈máraugaj.

³⁴Mit caje' David cu't tsajpni'c, po David inʉm: El Señor inʉjmau tʉnSeñor: “Tsʉ̱na tʉn-oyimaycʉ'ni'c

³⁵hasta tʉs̈vencia̱tcʉs̈wa'n inmutsuguijnat.”

³⁶’Nu'pʉjʉn Israelway jayajwat magaduda̱tca neti po ma jawiga ni'c Dios iyac Jesús pa ma tan Señor pa ʉjtsat, mit je' ayé Cristu jeme Dios i-ajyu'tway. Mit je' ayé Jesús jeme inyajcaway cunu̱s̈ni'c.

³⁷Iguimáraugaj we'n, ayé jayaujuc nijo̱jtu'ngʉjʉu, mit inʉmgajau Pedro mit japu̱t apóstojlat: —Hermanujat, ¿ti tʉnwatcáj?

³⁸Pedro inʉmgʉs̈au: —Cuyáguiga inma̱lway to̱jwat mit ninʉ'gutémgʉjʉ mijchat minu'pʉjʉjnat Jesucristu inʉ'jyni'c, pa we'n Dios is̈perdona̱tcajáj nu'pʉjʉn mal inwatcaway, mit je' is̈moygáj Espíritu Santu.

³⁹Ni'c Dios iprometia̱t ni'c is̈moygáj Espíritu Santu pa mijchat mit pa inwayna'jat mit pa nu'pʉjʉn jeme tsʉ̱ngapay yagatsway na̱s̈. Ayé pa nu'pʉjʉn jeme el Señor Dios icupiugʉs̈way ma minga mam je'.

⁴⁰Mit itp más inʉmgʉs̈away Pedro, mit itsawigʉs̈, inʉm: —Nisalvá̱tcʉjʉ pigatogoyga mit ayʉ̱́j jinapay jayajwat ni'c je'jat ma̱lo'jcat.

⁴¹Mit iwatcau cuenta lo que iguinʉmgajaway Pedro, mit cʉs̈ ninʉ'gutemgʉjʉu. Mit it como tres mil jayajwat jeme imutʉgʉygaway Dios en ayé s̈ʉjw.

⁴²Ayʉ̱́jat isiguia̱tcajau lo que apóstojlat i-ajque's̈caway, mit imunipʉjcʉjʉu, mit je'jat caybʉ'ngau tuwitic mit i-emgada̱jcau ma̱s̈anʉ̱n ni'c inijawigau nat Jesús iguiwajt en ayé últimu cena, mit ora̱tpʉ'ngau.

⁴³Mit nu'pʉjʉn jayajwat nigu-épigʉjʉu ni'c i-is̈cau lo que iwatcaway ayé apóstojlat. Mit ayé apóstojlat Dios igui-actuwatcau may milagru mit majatway señajat.

⁴⁴Mit nu'pʉjʉn jeme cupʉjcaway yo'ygau en acuerdu. Mit i-ayo̱wis̈cau ihermanujat, igaguarda̱tcawu neti pa je'jatu.

⁴⁵Mit ito'jcau itʉjcat mit we'ney nu'pʉjʉn lo que i-aguepcaway, mit i-acpas̈angau ayé tumi̱n pa nu'pʉjʉn hermanujat nesita̱tijcatway.

⁴⁶Mit cada s̈ʉjw ni-apʉcmujcʉjʉu templuni'c, mit caybʉ'ngau tu'gu itujugujmat, mit i-emgada̱jcau ma̱s̈anʉ̱n ni'c inijawigau nat Jesús iguiwajt en ayé últimu cena. Mit ji'cta̱c ijo̱jtat, mit nepʉn canimʉjninʉjmʉwu.

⁴⁷I-oyninʉmgau Dios, mit nu'pʉjʉn jayajwat irespeta̱tcau ayé hermanujat. Mit cada s̈ʉjw el Señor iguisalva̱tcʉs̈ más jayajwat, mit je'jat imutʉgʉygau ayé cupʉcpajyat.