Read Sayula Popoluca Hechos 23 Bible Online

Hechos 23 - Sayula Popoluca bible

Hechos 23

¹Wejpu'n Pablo, igui-is̈cʉs̈ judíujat ijefejat, inʉmgʉs̈au: —Jayajwat, tʉnjawip ni'c tʉnganiwatp mal mam Dios tʉs̈-e'p.

²Mit cʉs̈ ayé mʉjpa̱nij Ananías imanda̱tcʉs̈ jeme tsʉ̱ngaway tom mit Pablo ma moyta̱jca je' i-auni'c.

³Mit cʉs̈ Pablo inʉjmau: —¡Dios is̈moyta'gámpey mi̱. Miniwajtʉp oyo'c po mima̱lo'c. ¿Is̈jawi is̈juzga̱tp as̈am iguinʉm ley? ¿Tini'c inmanda̱t ma tʉs̈moyta̱jcac? ni'c ayé ley iganʉmp we'n.

⁴Mit jeme tsʉ̱ngaway jem, inʉmgajau Pablo: —¿Tini'c is̈tucójtsa Dios imʉjpa̱nij?

⁵Mit Pablo inʉmgʉs̈au: —Jayajwat, tʉngajawipate ni'c je' ayé mʉjpa̱nij, ni'c ja'yic itsʉ̱na Dios ilibruni'c: “Nagatucojtsáj jayajwat i-autoridajat.”

⁶Mit cʉs̈ Pablo nimojyʉu cuenta ni'c jem itsʉ̱na tu'c grupu saduceujat mit we'ney tu'c grupu fariseujat, mit imucotscʉs̈ mʉgʉc yos̈tujugum, inʉm: —Jayajwat, ʉ̱ tʉfariseu, mit tʉnte̱t fariseu. Tʉs̈juzga̱tcap ni'c tʉncupʉcp ni'c jutucta̱jcáj á̱nimajat.

⁷Mit iguinʉjm we'n, ni-ago'jcʉjʉu fariseujat mit saduceujat, mit ayé jayajwat catsʉ̱ngawu en acuerdu.

⁸Ni'c saduceujat inʉmgap ni'c á̱nimajat cajutucta̱jcáj, ne ca-itp ángejlat, ne espíritu. Po fariseujat icupʉjcap nu'pʉjʉn ayé cosajat.

⁹Mit nu'pʉjʉn ya̱s̈cada̱jcau. Mit nitenda̱jcʉjʉu ayé fariseujat jeme i-ajque's̈capay ley, mit cotscau mʉgʉc, inʉmgau: —Ayʉ̱́j jayau iganiwatp nejʉmay mal. ¿Jawi te iguimucots tambʉn tsajpni'c o tu'c ángel. Te namunyajcap ayʉ̱́j jayau, casi namutsuguinwatcapey Dios.

¹⁰Mit ni-ago'jcʉjʉu hasta mʉjcapitán pʉ̱t maga-actotscada̱jca Pablo. Mit cʉs̈ manda̱t ma minga soldajat, mit ma chi'tca Pablo mam itsʉ̱nga ayé jayajwat, mit ma munʉs̈ca cuartelni'c.

¹¹Mit jatu'c tsu' iguique's̈ta̱jcau el Señor mit iguinʉjmau: —Pablo, campʉ̱twit. As̈am is̈nʉmdacyo'jy pa ʉ̱ Jerusalén, wename-ey is̈nʉmdacyo'ywa'n en ayé mʉjnʉ'jcopac Roma.

¹²Mit icus̈ʉwij, una̱c judíujat ni-apʉcmujcʉjʉu mit ni-acochigʉjʉu pa igui-ago'jcawa'n Pablo. Inʉmgau ni'c cacaygáj ne ca-u̱jcáj hasta te iga-ago'jcap je', mit ijura̱tcau tu'c promesa ma̱lway ni'c je'jat mismu o'jcáj te igawatcap we'n.

¹³Mit it más de cuarenta jayajwat jeme jura̱tcaway we'n.

¹⁴Ayé jayajwat nʉs̈cau mam judíujat imʉjpa̱nijat mit na'waywájat, mit inʉmgajau: —Ʉjtsat tʉnjura̱tcau tu'c promesa ma̱lway ni'c tʉngacaygáj neti hasta te tʉnga-ago'jcap Pablo. Tʉnjura̱tcau ni'c ʉjtsat mismu tʉ-o'jcáj te tʉngawatcap we'n.

¹⁵Mit jinap mijchat mit japu̱t jefejat, nʉ́mgaja mʉjcapitán ma acmi'n jobom Pablo mam mijchat, ni'c as̈am inwangapay is̈-ucyo'tcawa'n más pa is̈-arregla̱tcawa'n ayé asuntu. Mit ʉjtsat, antes icojawa'n, tʉtsʉ̱ngáj listu pa tʉs̈ago'jcawa'n.

¹⁶Mit cʉs̈ Pablo ije̱wayma̱m iwayna' imarau ni'c i-atsʉ̱ndujcáj, mit nʉcs̈ cuartelni'c mit i-ajque's̈au Pablo.

¹⁷Mit Pablo imuya̱s̈ tu'c capitán, inʉjmau: —Munʉs̈ ayʉ̱́j ya̱wayna' pa mam itsʉ̱na mʉjcapitán, ni'c ijtʉp ti inʉjmámpay.

¹⁸Mit imunʉcs̈ pa mam mʉjcapitán, mit inʉjmau: —Ayé presu Pablo tʉs̈muya̱s̈, tʉs̈yo'jtau favor tʉmumi'n mam mi̱ ayʉ̱́j ya̱wayna' ni'c ijtʉp tu'c cosa is̈nʉjmámpay.

¹⁹Mit mʉjcapitán i-actajnau icʉ' ya̱wayna' mit imunʉcs̈ jatu'c laj, i-ucyo't: —¿Ti inwamp is̈nʉjmáj?

²⁰Mit inʉjmau: —Judíujat ni-acochigʉjʉu contra Pablo, mit is̈nʉmgajáj ni'c jobom pi acnʉs̈ Pablo pa mam itsʉ̱nga je'jat ijefejat, ni'c as̈am i-ucyo'tcámpay más pa igui-arregla̱tcawa'n ayé asuntu.

²¹Po mi̱ camcupʉjcʉs̈, ni'c más de cuarenta jayajwat i-atsʉ̱ndujcap Pablo. Ayé jayajwat ijura̱tcau tu'c promesa ma̱lway igacaygawa'n ne iga-u̱jcawa'n hasta te iga-ago'jcap Pablo. Mit jinap tsʉ̱ngap listu, solo i-atsʉ̱ngap lo que inyʉmámpay mi̱.

²²Mit cʉs̈ mʉjcapitán i-acnʉcs̈ ayé ya̱wayna', mit inʉjmau maganʉjma nepʉn ni'c igui-ajque's̈au ayé cosa.

²³Mit ayé mʉjcapitán iya̱s̈cʉs̈ mechc capitájnat, mit manda̱t ma apʉcmujca doscientos soldájat, setenta cawajni'jcatway mit doscientos espada-muyo'ypajyat, mit ma nʉs̈ca las nueve de la noche hasta nʉ'jcopac Cesarea.

²⁴Mit je' manda̱t ma oyajca cawa̱yujat pa Pablo ma tuyo'y, mit ma munʉs̈ca Pablo pa mam itsʉ̱na gobernador Félix, mit je' inʉmey ma cuida̱tca Pablo ma iguigajatac neti.

²⁵Mit ija'jyau ayé gobernador tu'c noc mam iguinʉm yename:

²⁶“Ʉ̱ Claudio Lisias tʉsaluda̱tp mi̱ Félix, mi̱ gobernador más mʉjninʉmicway.

²⁷Ayʉ̱́j jayau Pablo i-actangau judíujat, mit iwangau igui-ago'jcawa'n, mit cuandu tʉs̈jawij ni'c je' Romajway jayau, tʉnmunʉcs̈ tʉnsoldajúc, mit tʉnchi'tcʉs̈au icʉ'jugujmat.

²⁸Mit tʉnwan tʉs̈jawiwa'n tini'c igui-acusá̱tca, mit tʉnmunʉcs̈ je'jat iyos̈tujugujmat mam itsʉ̱nga judíujat ijefejat.

²⁹Mit tʉmpa̱t ni'c i-acusa̱tcap je' ni'c igacumplia̱tp je'jat ilejyat, mit ca-ijtʉwu delitu pa i-o'cwa'n ne pa iguicomgawa'n cuytujugum.

³⁰Po tʉs̈ajque's̈cajau ni'c je' igui-atsʉ̱ndujcap judíujat, mit cʉs̈ tʉnacnʉcs̈ ayé jayau mam mi̱, mit tʉnyʉmgʉs̈awey jeme igui-acusa̱tcapay je' ma is̈nʉmgajac mi̱ ti delitu ijtʉp. Aye'yu tʉja'jyap.”

³¹Mit soldajat i-actangau Pablo as̈am iguimanda̱tcau, mit imunʉs̈cau tsu'm pa nʉ'jcopac Antípatris.

³²Mit icus̈ʉwij jatu'c s̈ʉjw, soldajat iyajcau jeme cawajni'jcatway, mit pitujcanuw pa cuartelni'c, mit cawajni'jcatway siguia̱tcau mit Pablo.

³³Icóygaj nʉ'jcopac Cesarea, imoygau ayé noc ayé gobernador, mit i-entrega̱tcau Pablo mam je' itsʉ̱naj.

³⁴Mit ayé gobernador icots ayé noc, mit i-ucyo't jʉm ayé itʉcmayna̱s̈ Pablo, mit iguijawij ni'c je' itʉcmayna̱s̈ Cilicia,

³⁵inʉjmau: —Tʉmarawáj imingawa'n jeme is̈acusa̱tcapay. Mit je' manda̱t ma guarda̱tca Pablo en ayé yos̈tʉjc iwatway Herodes.