Read Sayula Popoluca Hechos 25 Bible Online

Hechos 25 - Sayula Popoluca bible

Hechos 25

¹Itʉgʉjy Festo de gobernador en ayé na̱s̈, icʉs̈ tu̱gup s̈ʉjw, pichin Cesarea mit nʉcs̈ Jerusalén.

²Mit coygau mam je' judíujat imʉjpa̱nijat, mit ayé judíujat más mʉjninʉ́mijcatway, pa igui-acusa̱tcawa'n Pablo.

³Iyo'tcajau ayé gobernador ma iguiwatcajac tu'c favor ma acmi'n Pablo pa Jerusalén. We'n je'jat i-atsʉ̱ndujcáj pa igui-ago'jcawa'n to̱uni'c.

⁴Po Festo ipo'ngʉs̈ ni'c Pablo tsʉ̱nap presu Cesarea, mit je' nʉs̈áj jaran pa jem.

⁵Inʉmgʉs̈au: —Mijchat mimanda̱tcapay, pi nʉs̈ca tuwitic mit ʉ̱, mit te ijtʉp delitu ayé jayau, oyap is̈acusa̱tca.

⁶Festo tsʉ̱nau Jerusalén como ocho o diez s̈ʉjwat, cʉs̈ pituc pa Cesarea. Icus̈ʉwij jatu'c s̈ʉjw, nitsʉ̱nda̱jcʉu yos̈tujugum, mit manda̱t ma muminga Pablo.

⁷Imijn je', iguicutomigau ayé judíujat jeme mingaway Jerusalén, mit i-acusa̱tcau Pablo. Inʉmgau ni'c je' iwat may cosa ma̱jlatway, po ca-oyawu iguicomproba̱tca neti.

⁸Mit Pablo nicowajnʉu, inʉm: —Tʉnganiwatp nejʉmay cosa ma̱lway contra judíujat ilejyat. Tʉnganijimp ayé templu mit nejʉmay mal, ne tʉnganiwajtapey neti rey César.

⁹Po Festo como iwan itanwa'n oy mit judíujat, inʉjmau Pablo: —¿Inwamp inyʉs̈wa'n Jerusalén, mit jem nas̈-arregla̱tcawa'n ayʉ̱́j asuntu?

¹⁰Mit Pablo ipo'n: —Tʉtsʉ̱nap rey César icʉ'jugum, mit jem itp ti tʉs̈juzga̱tcáj. Mi̱ bien is̈jawi ni'c tʉnganiwatcʉs̈ap judíujat nejʉmay cosa ma̱lway.

¹¹Ni'c te tʉnwat tu'c mal pa tʉ-o'cwa'n, tʉnganʉmp ni'c tʉga-o'gáj. Po te ca-itp nejʉmay cosa tʉs̈tu-acusa̱tcapay, nepʉn ca-oyap tʉs̈yacp je'jat icʉ'jugujmat. Tʉnyo'tp mejor rey César ma tʉs̈juzga̱tac.

¹²Cʉs̈ Festo imucotscʉs̈ imuyos̈watcʉs̈pay, mit cʉs̈ inʉjmau Pablo: —Mi̱ inyo't pi is̈juzga̱tac rey César, mit jinap minʉs̈áj mam je' pi is̈juzga̱tac.

¹³Iguinás̈caj una̱c s̈ʉjwat, rey Agripa mit ito's̈ay Berenice nʉs̈cau pa Cesarea pa iguisaluda̱tcawa'n Festo.

¹⁴Itsʉ̱ngaj jem mayo'c s̈ʉjwat, Festo imu-ampi̱u ayé rey pa ma jawijya Pablo i-asuntu. Mit inʉjmau: —Félix iyac yam tu'c presu.

¹⁵Mit cuandu tʉ-ojy Jerusalén, coygau mam ʉ̱ judíujat imʉjpa̱nijat mit na'waywájat Judeajatway, tʉs̈yo'tcajau pa tʉcondena̱t Pablo ma o'c.

¹⁶Mit ʉ̱ tʉmpo'ngʉs̈ je'jat ni'c Romajatway cayújijcat iguicondena̱tca tu'c jayau ma o'c te je' ca-oyap inicowajnʉ mit jeme igui-acusa̱tcapay.

¹⁷Jemni'c cuandu imíngaj je'jat pa yam, icus̈ʉwij jatu'c s̈ʉjw, tʉnitsʉ̱nda̱jcʉu jaran yos̈tujugum, mit tʉmanda̱t ma muminga ayé jayau.

¹⁸Itsʉ̱ngaj jem acusa̱tpajyat, iga-acusa̱tcawu neti as̈am ʉ̱ tʉs̈pensa̱jt.

¹⁹Solo itu-acusa̱tcau lo que je'jat icupʉjcapay. I-acusa̱tcap ni'c Pablo inʉm ni'c Jesús o'c mit jutucta̱c.

²⁰Mit ʉ̱ tʉngajawiwu ti tʉnwatáj mit ayé asuntu, mit cʉs̈ tʉn-ucyo't je' te iwan inʉs̈wa'n Jerusalén pa jem tʉs̈-arregla̱tcawa'n ayé asuntu.

²¹Po como Pablo iyo't ma atsʉ̱nga hasta rey Augusto César igui-arregla̱twa'n ayé asuntu, tʉmanda̱t ma cuida̱tca je' hasta tʉs̈acnʉs̈wa'n mam ayé rey.

²²Cʉs̈ Agripa inʉjmau Festo: —Ʉ̱ tʉnwampey tʉs̈marawa'n ayé jayau. Mit je' iguinʉjmau: —Jobom is̈marawa'n.

²³Icus̈ʉwij jatu'c s̈ʉjw, coygau Agripa mit Berenice bien oyaguijcat, mit tʉgʉygau mam igui-arregla̱tcaj asuntujat. Tʉgʉygawey mʉjcapitájnat mit mʉjayajwat nʉ'jcopacni'cway. Mit cʉs̈ Festo manda̱t ma muminga Pablo.

²⁴Cʉs̈ Festo inʉmgʉs̈au: —Rey Agripa, mit nu'pʉjʉn jayajwat jeme tsʉ̱ngapay apʉcmuguic mit ʉjtsat, in-e'pcap ayʉ̱́j Pablo. Ayʉ̱́j jayau nu'pʉjʉn judíujat iguicotsnas̈cau mit ʉ̱ Jerusalén mit yam, mit iyo'tí̱jcap ma o'c.

²⁵Po ʉ̱ tʉmpa̱t ni'c nejʉmay mal iganiwatp pa i-o'cwa'n, mit como je'yu iyo't ma iguijuzga̱tac rey Augusto César, tʉnyʉm ni'c tʉnacnʉs̈áj mam ayé rey.

²⁶Po tʉngapa̱tp tu'c cosa iyacs̈ta'cway pa tʉs̈ja'jyawa'n tʉnjefe. Jemni'c tʉs̈acmijn mam mijchat, po más tʉnwan pi marau mi̱, oh rey Agripa. Mit in-ucyo'táj ti mal iwatway, pa we'n tʉnaguepáj ti tʉnja'jyámpay ayé rey.

²⁷Tʉs̈jawi ni'c ca-oy tʉs̈ajyu'twa'n tu'c presu te tʉnganʉmp ti delitu ijtʉpay.