Read Sayula Popoluca Hechos 28 Bible Online

Hechos 28 - Sayula Popoluca bible

Hechos 28

¹Mit cuandu tʉpíchingaj, tʉnimoygʉjʉu cuenta ni'c ayé isla inʉ'jy Malta.

²Mit ayé jayajwat jeme tsʉ̱ngaway jem tʉs̈watcajau puru cosa oyway, ni'c i-acotmujcau jʉjn mit tʉs̈pʉctsougau oy tʉnu'pʉjʉjnat ni'c mino'c tu̱ mit payiguito'c.

³Mit Pablo ja's̈pi̱u mit icom jʉngʉtʉm. Mit tu'c tsanay igui-acpo'c jʉnjajic, iguipirat icʉ'ni'c.

⁴Mit jeme tsʉ̱ngaway jem, igui-ís̈caj ni'c iguipirat ayé tsanay icʉ'ni'c, inʉmgau je'jat: —Iyacs̈ta'cway ayʉ̱́j jayau tu'c ago'cpay, ni'c nisalva̱jtʉu lama̱tjugum, po como ma̱lo'c, itp ti i-o'cwa'n.

⁵Po Pablo i-ajca'u ayé tsanay jʉngʉtʉm, mit neti iguigajatu.

⁶Ayé jayajwat i-atsʉ̱ngapate hasta iqui's̈wa'n icʉ' o de repente ica'wa'n o'guic, po i-atsʉ̱ngau más, mit i-is̈cau ni'c neti iguigajatu. Mit cʉs̈ ipensa̱tcau jatu'c cosa, inʉmgau ni'c je' tu'c dios.

⁷En ayé isla tom itsʉ̱naj ina̱s̈ tu'c jayau inʉ'jyway Publio, mit je' manda̱t en ayé isla. Je' tʉs̈pʉctsougau, mit como oyjayawo'c tʉs̈moygau laj pa tʉtángaj jem tu̱gup s̈ʉjw.

⁸Mit wejpu'n Publio ite̱t che's̈ni'c icʉ́mnaj tu'nij, ijtʉu jʉjn mit nipintʉ'n. Mit Pablo tʉgʉy igui-e'p ayé jayau, mit i-ora̱jtau, iyajcau icʉ' iyucuinm, mit i-ac-oytan.

⁹Iguiwajt we'n, nu'pʉjʉn jeme tsʉ̱ngaway tu'nij en ayé isla mingau mit oytangawey.

¹⁰Mit ayé jayajwat tʉs̈moygau may regalujat, mit tʉpíchingaj, tʉs̈moygau jeme tʉs̈togoygaway.

¹¹Mit inas̈ tu̱gup po', tʉpichingau en tu'c barcu Alejandríajway, mit ayé inas̈ payic islani'c. Ayé barcu ijtʉu tu'c figura ijʉpni'c, mechc tiyu̱s̈at inʉ'jyatway Cástor mit Pólux.

¹²Tʉcóygaj nʉ'jcopac Siracusa, tʉtangau jem tu̱gup s̈ʉjwat.

¹³De jem tʉ-ayo'yje̱jcau lama̱t-au-á̱m mit tʉcoygau nʉ'jcopac Regio. Inas̈ tu'c s̈ʉjw, is̈uj jo̱toy jʉns̈e'm, tʉcoygau jatu'c s̈ʉjw nʉ'jcopac Puteoli.

¹⁴Mit jem tʉs̈pá̱tcaj hermanujat, mit tʉs̈nʉmgajau tʉtánga mit je'jat tu'c s̈ama̱na, mit cʉs̈ tʉnʉs̈cau pa Roma.

¹⁵Mit hermanujat Romajatway iguimáraugaj ni'c tʉmingap, pichingau pa tʉs̈pa̱jtsougáj hasta Foro de Apio mit Tres Tabernas. Pablo igui-is̈cʉs̈ ayé hermanujat, inʉjmau Dios ni'ctiyu̱s̈ mit ji'cta̱c ijo̱jt.

¹⁶Tʉcóygaj Roma, ayé capitán i-entrega̱tcʉs̈ presujat icʉ'jugum ayé jefe imanda̱tway soldajat, po Pablo imoygau laj ma che'n mam itanwa'n, mit tu'c soldaj iguicuida̱támpay.

¹⁷I-íjtʉj tu̱gup s̈ʉjw, Pablo iya̱s̈cʉs̈ judíujat mʉjninʉ́mijcatway. Itsʉ̱ngaj apʉcmuguic, inʉmgʉs̈au: —Jayajwat, tʉngawatcʉs̈awu neti judíujat tʉntʉcmayna̱s̈atway, ne tʉngawatu neti contra icostumbrejat nate̱jtat ámbanuway. Po majawe'naj, desde Jerusalén tʉs̈acmingau presu Romajatway icʉ'jugujmat.

¹⁸Mit cʉs̈ tʉs̈-ucyo'tcau Romajatway, iwangau tʉs̈acjo'ngáj ni'c igapa̱tcawu causa pa tʉ-o'cwa'n.

¹⁹Po como judíujat igawangawu tʉs̈acjo'ngáj, it ti tʉs̈yo'jt rey César ma tʉs̈juzga̱tac. Po majawe'naj tʉnga-acusa̱tp tʉntʉcmayna̱s̈atway.

²⁰Mit jemni'c tʉya̱s̈cʉs̈ pa tʉ-e'pcʉs̈wa'n mit tʉmucotscʉs̈wa'n. Ʉ̱ tʉnatsʉ̱nap nije'yu jeme Israejlatway i-atsʉ̱ngapay, ni'c Dios i-acjutucta̱jcʉs̈áj o'guijcatway. Jemni'c tʉtsʉ̱nap cutsumiyic mit ayʉ̱́j cadena.

²¹Mit je'jat iguinʉmgajau: —Jeme tsʉ̱ngapay Judeajway na̱s̈ tʉs̈canija'ygajap ti inwatway, ne canimingap judíujat jeme is̈malninʉmgaway o jeme is̈tucotscaway mi̱.

²²Po tʉnwangap tʉs̈maraugawa'n lo que mi̱ impensa̱tpay, ni'c tʉnjawigap ni'c ayʉ̱́j grupu icupʉjcapay Cristu jʉmgapa'tu iguimalninʉ́mga.

²³Mit i-aparta̱tcau tu'c s̈ʉjw pa imingawa'n, mit cʉs̈ mingau mayo'jcat mam Pablo itsʉ̱naj. Mit je' imucotscʉs̈ desde jopoyít hasta tsu'jít, mit inʉmgʉs̈au nat Dios imanda̱twa'n. Mit i-ocupa̱t Moisés iley mit profetajat ilibrujat, mit i-actujawigʉs̈ ni'c Jesús ayé Cristu i-ajyu'tway Dios.

²⁴Mit una̱c icupʉjcau lo que inʉmway, mit ja-una̱c igacupʉjcawu.

²⁵Mit como ayé judíujat catsʉ̱ngawu en acuerdu, ca's̈ʉ'jcau pa inʉs̈canuwa'n, po Pablo inʉmgʉs̈au yename: —Oyo'gu Espíritu Santu igui-actunʉjm ayé profeta Isaías ma nʉmgʉs̈a nate̱jtat ámbanuway, inʉm:

²⁶Nʉs̈ mam itsʉ̱nga ayé jayajwat mit nʉmgʉ́s̈a: Intumaraugáj inta̱tsʉjcat po inga-entendia̱tcáj. Mit intu-e'pcáj inwijnat po ingajawigáj ti ayé in-e'pcapay,

²⁷ni'c ayé jayajwat iga-entendia̱tcap oy ijo̱tni'jcat, mit igatumaraugap oy ita̱tsʉjcat, mit i-api'chcau iwijnat, magatu-e'pca iwijnat, ne magamarauga mit ita̱tsʉjcat, ne maga-entendia̱tca ijo̱tni'jcat, pa magacupʉjca, pa tʉge-ac-oytangʉs̈.

²⁸Pi jawiga ni'c Dios inʉm ma nisalva̱tcʉjʉ jayajwat jeme caje'jatway judíujat, mit je'jat iguimaraugáj.

²⁹Iguinʉmgʉ́s̈aj we'n, pichingau judíujat, mit discutia̱tcau mayo'c.

³⁰Mit Pablo tsʉ̱nau mechc s̈iwit enteru en tu'c tʉjc i-alquila̱tway, mit ipʉctsougʉs̈ nu'pʉjʉn jeme mingaway mam je'.

³¹Mit inʉmgʉs̈au nat Dios imanda̱twa'n, mit i-ajque's̈cʉs̈au nat iguicupʉjcawa'n el Señor Jesucristu. I-ajque's̈ mam nu'pʉjʉn iguimarauga, mit nepʉ ca-oyawu igui-atujcap.