Read Sayula Popoluca Hechos 5 Bible Online

Hechos 5 - Sayula Popoluca bible

Hechos 5

¹It tu'c jayau inʉ'jyway Ananías, mit ito's̈ay inʉ'jy Safira. Mit Ananías ito'ctʉgʉy tu'c na̱s̈,

²mit imutan tu'c parte ayé tumi̱n, mit jatu'c parte imunʉcs̈, mit i-entrega̱tcʉs̈au ayé apóstojlat. Mit ito's̈ay ijawiwey lo que iwatway.

³Cʉs̈ Pedro iguinʉjmau: —Ananías, ¿tini'c Awayagatsna' is̈mojy laj ma tʉgʉy injo̱tni'c? Mi̱ impensa̱t is̈we̱twa'n Espíritu Santu, mit inmutan tu'c parte ayé tumi̱n impʉctso̱way de ayé na̱s̈.

⁴Antes is̈to'jc ayé na̱s̈, mi̱ inje'. Mit cʉs̈ is̈to'jc, oyapate is̈tuwat ayé tumi̱n tiyu inwampay. ¿Tini'c is̈pensa̱jt is̈watwa'n we'n? Ingawe̱tcʉs̈u jayajwat, solo Dios inwanate is̈we̱twa'n.

⁵Cʉs̈ Ananías iguimarajw we'n, ca'u o'guic. Mit ni-apʉ̱tigʉjʉu nu'pʉjʉn jeme imaraugaway lo que iguijatway.

⁶Mit cʉs̈ mingau ya̱wayna'jat, icupitmo'ngau, mit imunʉs̈cau pa iguini̱pcawa'n.

⁷Inas̈ como tu̱gup hora, tʉgʉy Ananías ito's̈ay mit igajawiwu ti jatway.

⁸Cʉs̈ Pedro inʉjmau ayé to's̈ay: —Nʉjmac te wejen is̈to'jcaj ayé na̱s̈. Mit je' iguinʉjmau: —Jo̱, wejen.

⁹Mit Pedro inʉjmau: —¿Tini'c intsʉ̱nga acochiyic pa is̈proba̱tcawa'n el Señor Dios jeme ijawipay nu'pʉjʉn. E'p mam iminga ya̱wayna'jat jeme ini̱pcaway inya'u, mit je'jat is̈munʉs̈cámpey mi̱ pa is̈ni̱pcáj.

¹⁰Mit je' ca'u jaran o'guic Pedro ita'ná̱m. Mit itʉ́gʉygaj ya̱wayna'jat ipa̱tcau o'guiganu. Mit imunʉs̈cawey mit ini̱pcau tomo'gu mam itsʉ̱na ni'pic ina'u.

¹¹Mit ni-apʉ̱tigʉjʉu nu'pʉjʉn cupʉcpajyat, mit we'ney nu'pʉjʉn jeme imaraugaway jeme jatway.

¹²Dios imoygʉs̈ poder ayé apóstojlat ma watca may milagrujat mit ma acnigu-épigʉjʉ nu'pʉjʉn nʉ'jcopac jayajwat. Mit nu'pʉjʉn cupʉcpajyat ni-apʉcmujcʉjʉu en ayé corredor inʉ'jyway Salomón.

¹³Mit japu̱t jayajwat pʉ̱tcau iguimutʉgʉygawa'n ayé cupʉcpajyat, po nu'pʉjʉn nʉ'jcopac jayajwat iguirespeta̱tcau may.

¹⁴Mit mas may jayajwat icupʉjcau el Señor, jayajwat mit to's̈ajyat.

¹⁵Mit cʉs̈ imumingau calleni'c tu'nijatway, mit iyajcau iche's̈ni'jcat mit ito'cni'jcat, pa we'n inas̈wa'n Pedro maja icojutugaj nas̈áj mam una̱c je'jat, mit we'n oytangáj.

¹⁶Mit may jayajwat jeme tsʉ̱ngaway en ayé nʉ'jcopacwájat tomay, nʉs̈cau pa Jerusalén, mit imunʉs̈cau tu'nijatway mit jeme igui-actunas̈caway demo̱nyuja, mit nu'pʉjʉn oytangau.

¹⁷Mit wejpu'n imijn judíujat imʉjpa̱nij mit nu'pʉjʉn ayé grupu de saduceujat jeme tsʉ̱ngaway mit je'. Je'jat awa'nigau,

¹⁸mit i-actangau ayé apóstojlat mit icomgau cuytujugum.

¹⁹Po el Señor i-ángel igui-awa̱jts tsu'm presutʉc-ajwat, i-acpichingʉs̈, inʉm:

²⁰—Nʉs̈ nitendá̱jcʉjʉ templuni'c, mit nʉ́mgaja jayajwat ni'c itp nam vida pa nu'pʉjʉn icupʉjcapay Jesucristu.

²¹Pedro mit Juan imaraugau ayé ángel, mit icus̈ʉwij jatu'c s̈ʉjw, tʉgʉygau templuni'c mit chu̱chigau igui-ajque's̈ca. Mit cʉs̈ ayé mʉjpa̱nij mit jeme tsʉ̱ngaway mit je' i-apʉcmujcau nu'pʉjʉn judíujat ijefejat, ayé inʉmo'jcʉp nu'pʉjʉn Israelway na'waywájat jeme manda̱tcapay. Mit i-acnʉs̈cau pa presutujugum ma muminga ayé apóstojlat.

²²Mit icóygaj jem comandantejat, igapa̱tcawu cuytujugum nepʉn. Cʉs̈ pitujcau mit i-ajque's̈cajau ayé jefejat.

²³Inʉmgau: —Tʉmpa̱tcau ayé presutʉjc bien atucta'guic, mit cuida̱tpajyat tenagap pe'ta̱m tʉc-auni'jcat, po cuandu tʉs̈awá̱tscaj tʉngapa̱tcawu nepʉn tujugum.

²⁴Iguimáraugaj we'n ayé mʉjpa̱nij, ayé jefe jeme imanda̱tway soldajat templuni'cway mit mʉjpa̱nijat, igajawigawu ti jatámpay.

²⁵Mit cʉs̈ coy tu'c jayau igui-ajque's̈, inʉm: —Ayé jayajwat incomgaway cuytujugum tsʉ̱ngapatu templuni'c mit i-ajque's̈cajapatu jayajwat.

²⁶Cʉs̈ nʉs̈cau ayé jefe jeme manda̱tway templuni'c mit comandantejat, mit imumingawatu ayé apóstojlat sin nejʉmay tsuguin, ni'c ipʉ̱tcau ayé jayaujuc ma iguigapojcajac mit tsa'.

²⁷Mit iguimumíngaj ayé apóstojlat, iyajcau mam itsʉ̱nga judíujat ijefejat, mit ayé mʉjpa̱nij inʉmgʉs̈au yename:

²⁸—Tʉmanda̱tcau mʉgʉc pigaja-ajque's̈ca lo que Jesús inʉmway, mit jinap inajque's̈cajaway nu'pʉjʉn jayajwat tsʉ̱ngapay Jerusalén. Mit inwangap is̈culpa̱tcáj ʉjtsat, inyʉmgap ni'c ʉjtsat ayé tʉnago'jcaway Jesús.

²⁹Mit Pedro mit japu̱t apóstojlat inʉmgajau: —Itp ti tʉs̈jayaumaygawa'n Dios que tʉs̈jayaumaygawa'n jayajwat.

³⁰Nate̱jtat ámbanuway icupʉjcau Dios, mit nije'yu Dios i-acjutucta̱c Jesús jeme inago'jcaway mit jeme inyajcaway cunu̱s̈ni'c.

³¹Mit Dios imunʉcs̈ Jesús pa tsajpni'c pa ma tsʉ̱na i-oyimaycʉ'ni'c, pa ma it tu'c manda̱tpay mit tu'c jeme nas̈salva̱tcámpay, mit je' iwamp Israelway jayajwat ma cuyaguiga ima̱lway to̱jwat pa iguichi'tcʉs̈awa'n ima̱jlat.

³²Mit tʉnjawigap ni'c iyacs̈ta'cway lo que tʉnyʉmgapay mit Espíritu Santu tʉs̈actujawigapey ni'c iyacs̈ta'cway. Mit Dios imoygʉs̈áj Espíritu Santu pa jeme iguijayaumaygámpay.

³³Iguimáraugaj we'n, awa'nigau jaran, mit iwangau igui-ago'jcawa'n ayé apóstojlat.

³⁴Wejpu'n mam itsʉ̱nga judíujat ijefejat it tu'c fariseu inʉ'jyway Gamaliel, mit je' i-is̈cap ley, mit nu'pʉjʉn jayajwat iguirespeta̱tcau. Mit Gamaliel nitenda̱jcʉu mit manda̱t ma acpichinga pe'ta̱m ayé apóstojlat pa tu'c ratuwáy.

³⁵Mit cʉs̈ inʉmgʉs̈au ayé jefejat: —Jayajwat Israelway, nicuidá̱tcʉjʉ, pensá̱tca ti inwatcámpay mit ayʉ̱́j jayajwat.

³⁶Pi nijawiga ni'c en tu'c tiempu ca's̈ʉ'c Teudas mit je' nimʉjninʉjmʉu. Mit iguimutʉgʉygau je' como cuatrociento jayajwat. Teudas i-ago'jcau, mit po'cpʉ'ngau nu'pʉjʉn jeme iguicupʉjcaway je', mit catanu nepʉn.

³⁷Mit cʉs̈ ca's̈ʉ'c Judas Galileajway en ayé s̈ʉjwat cuandu iguija'ygu'tcaj jayajwat, mit i-apʉcmuc may jayajwat pa ma iguinatspoguigac. Je' togoyey, mit cunʉs̈igada̱jcau nu'pʉjʉn jeme iguicupʉjcaway je'.

³⁸Mit jinap tʉnʉmgʉs̈ap: Nicuidá̱tcʉjʉ mit ayʉ̱́j jayajwat, mit cammunyajca. Te jayajwatu ipensa̱tcau iguiwatcawa'n ayʉ̱́j cosajat, cajatáj neti.

³⁹Po te Dios i-acchu̱chiu ayʉ̱́j cosajat, ca-oyap is̈actogoyda̱jca. Te inwatcap we'n, casi inmutsuguinwatcap Dios. We'n iguinʉjm Gamaliel.

⁴⁰Mit je'jat imaraugau lo que inʉmway Gamaliel. Mit cʉs̈ imuya̱s̈cau ayé apóstojlat ma tʉgʉyga. Cʉs̈ iguiraunipʉ'ngaj, imanda̱tcau magajanʉmdacyo'yga lo que Jesús inʉmway. Mit cʉs̈ i-acjo'nganuw.

⁴¹Mit ayé apóstojlat pichingau yos̈tujugum mam itsʉ̱nga judíujat ijefejat, mit ji'go'c ijo̱jtat, ni'c Dios iguimoygau favor pa iguitunas̈cawa'n winchu̱jc, mit je'jat itunas̈cau we'n ni'c icupʉjcau Jesús.

⁴²Mit cada s̈ʉjw, te templuni'c o te itʉcmat, catentangawu igui-ajque's̈caja mit iguinʉmdacyo'ygaja Jesucristu i-oyway noticia.