Read Sayula Popoluca Romanos 1 Bible Online

Romanos 1 - Sayula Popoluca bible

Romanos 1

¹Ʉ̱ Pablo. Tʉnservia̱jtap Jesucristu. Dios tʉs̈ya̱s̈ pa tʉjatwa'n apóstol, ayé inʉmo'jcʉp ni'c Dios tʉs̈ajyu't, mit tʉs̈cupi̱u pa tʉs̈nʉmdacyo'jyawa'n i-oyway noticia.

²Dios inʉm ámbanu ni'c iyagáj ayé oyway noticia, mit Dios i-actunʉmgʉs̈ iprofetajat mit ija'ygau lo que Dios inʉmway.

³Ayé oyway noticia nas̈actu-is̈cap el Señor Jesucristu, Dios iway, mit je' min David ifamiliani'c, mit min as̈am jayau.

⁴Najawigap ni'c Jesucristu Dios iway ni'c ito'jcʉp poder, mit je' ijtʉu Espíritu Santu mit yo'y limpiu en ayʉ̱́j mundu, mit jutucta̱c mam itsʉ̱nga á̱nimajat.

⁵Mit Jesucristu tʉs̈moygau favor ni'c tʉs̈yajcau pa apóstol. Tʉs̈ajyu'tcau pa tʉs̈nʉmgajawa'n nu'pʉjʉn jayajwat jʉmgapa'tu ma cupʉjca Jesucristu mit ma jayaumayga.

⁶Mit we'ney mijchat Dios is̈ya̱s̈cau pa is̈je'jatcáj Jesucristu.

⁷Tʉja'ygʉs̈ap nu'pʉjʉn mitsʉ̱ngapay mʉjway nʉ'jcopac Roma. Dios is̈wangap mit is̈ya̱s̈cau pa inyo'ygawa'n mit je'. Dios Nate̱jat mit el Señor Jesucristu pi is̈moygac favor mit paz.

⁸Primeru tʉnyʉjmʉ'gáj ni'c Jesucristu nas̈moygap favor, mit jemni'c tʉs̈nʉ́jma Dios ni'ctiyu̱s̈ pa mijchat minu'pʉjʉjnat. Ni'c jʉmgapa'tu inʉmgap ni'c micupʉjcap mʉgʉc.

⁹Dios ijawip ni'c tʉ-ora̱tí̱jcajap, mit tʉnservia̱jtap Dios mit nu'pʉjʉn tʉnjo̱jt mit tʉnyʉmdacyo'jyap i-oyway noticia Dios iway.

¹⁰Tʉnyo'tí̱jcap Dios ma oya tʉs̈acnʉs̈áj mam intsʉ̱nga, te je' iwamp.

¹¹Ni'c tʉnwano'cp tʉ-e'pcʉs̈wa'n. Tʉnwamp tʉmajyigʉs̈wa'n mit ayé favor tʉs̈moyway Espíritu Santu, pa we'n mitsʉ̱ngáj más mʉgʉc mit Dios.

¹²Mit we'n nani-anima̱tcʉjʉ̱́j nanu'pʉjʉjnat ni'c nacupʉjcap ni-as̈amu.

¹³Hermanujat, tʉnwamp pi jawiga ni'c mayap veces tʉnʉs̈o'jcʉj mam mijchat po hasta jinap cani-oyap tʉnʉs̈. Tʉnʉs̈o'jcʉp pa tʉs̈watwa'n tu'c oyway yos̈ pa Dios mam mijchat intsʉ̱nga, mit we'ney tʉs̈wato'jcʉ mam itsʉ̱nga japu̱t jayajwat jʉmgapa'tu en ayʉ̱́j mundu.

¹⁴Tʉtsʉ̱nap obliga̱tic tʉs̈ajque's̈cʉs̈awa'n jeme i-is̈capcapay mit jeme iga-is̈capcapay.

¹⁵Jemni'c ʉ̱ tʉtsʉ̱nap dispuestu pa tʉs̈nʉmdacyo'ywa'n oyway noticia pa mijchatey mitsʉ̱ngapay Roma.

¹⁶Tʉgawinchu̱gap tʉs̈nʉmwa'n ayé oyway noticia. Ni'c Dios i-ajque's̈p ipoder mit ayé oyway noticia, pa ma nisalva̱tcʉjʉ nu'pʉjʉn jeme cupʉjcapay. Dios iwan primeru ma nisalva̱tcʉjʉ judíujat mit iwampey ma nisalva̱tcʉjʉ-ey jeme caje'jatway judíujat.

¹⁷Ayé oyway noticia nas̈actujawip ni'c Dios nas̈yacs̈icninʉmgap ni'c nacupʉjcap, mit solo te nacupʉjcap je'. As̈am itsʉ̱na ja'yic Dios ilibruni'c: “Dios iyacs̈icninʉmp tu'c jayau jeme cupʉcpay, mit je' tsʉ̱náj oy.”

¹⁸Dios jeme tsʉ̱napay tsajpni'c nas̈actujawigap ni'c je' icastiga̱tcʉs̈áj nu'pʉjʉn jayajwat cacupʉjcapay, mit jeme igawatcapay oy. Je'jat i-atujcap jayajwat maga-is̈capca lo que iyacs̈ta'cway, ni'c je'jat iwatcap puru mal.

¹⁹Je'jat ijawigap lo que iwatpay Dios, ni'c Dios i-actu-e'pcʉs̈p.

²⁰Ni'c desde Dios iguiwajt ayʉ̱́j mundu, jayajwat ca-oyap igui-e'pca Dios po i-e'pcap lo que je' iwatway. Ijawigap ni'c je' Dios, mit je' ijtʉp maj mit je' tamp pa siempre. Jemni'c jayajwat culpa̱tic itsʉ̱nga.

²¹Ijawigap ni'c itp Dios po iga-oyninʉmgap as̈am imerecia̱t, ne iganʉmgajap ni'ctiyu̱s̈. Mit jalmanu lo que ipensa̱tcapay ijo̱tni'jcat, mit nunca ca-oyap ipensa̱tca oy.

²²Inʉmgap ni'c i-is̈capcap may, po jatcau tontojat.

²³Igawangawu ayé Dios jeme mʉjninʉmicway jeme ca-o'cpay, más iwangau iguicupʉjcawa'n tiyu̱s̈at jeme que's̈capay as̈am jayajwat jeme o'jcapay. Mit hasta iwatcau tiyu̱s̈at as̈am jojnat, aníma̱jtat, mit as̈am tsanajyat.

²⁴Jemni'c Dios icuyaguigʉs̈ ma watca mal as̈am iguiyo't ijo̱jtat, mit iwatcau mal hasta je'jatu ni-is̈capcʉjʉu.

²⁵Je'jat icuyaguigau cosa yacs̈icway inʉmway Dios, más iwangau puru we̱t. Mit i-adora̱tcau mit iservia̱tcajau ayé cosajat wátijcatway. Igaservia̱tcajawu Dios jeme iwatcʉs̈way ayé cosajat. Más oy na-oyninʉ́mga Dios pa nu'pʉjʉn tiempu. Amén.

²⁶Jemni'c Dios icuyaguigʉs̈ ma watca mal sin winchu̱jc, hasta to's̈ajyat tigatscawey mit ni-is̈capcʉjʉu je'jatu.

²⁷Mit we'ney jayajwat iwatcau ni-as̈amu. Igaja-is̈capcawu ito's̈ajyat. Más iwangau ini-is̈capcʉjʉwa'n je'jatu. Jayajwat iwatcau mal mit jayajwat mit ca-itcʉjʉwu winchu̱jc, mit ipʉctsougau castigu icuerpuni'jcat ni'c we'n iguimerecia̱tcau, ni'c icuyaguigau Dios.

²⁸Igajawangawu igui-is̈capcawa'n Dios, jemni'c Dios icuyaguigʉs̈ ma pensa̱tca mal, pa ma watca lo que ca-oyway nas̈watwa'n.

²⁹Iwatcap nu'pʉjʉn mal, chajyo'ygap, iwatí̱jcap mal, iwangap jayje', iwatcap mal, i-angap jeme itcʉjʉpay, ago'jcap, tsuguinwatcap, we̱tcap, ipensa̱tcap mal,

³⁰tu-ampiugap, tucotscap, i-angap Dios, apes̈cap, nimʉjninʉ́mgʉjʉp, niwatcʉjʉp mʉjayajwat, i-acchu̱chigap mal cosajat, igajayaumaygap ite̱jtat,

³¹iga-entendia̱tcap neti, igacumplia̱tcap lo que inʉmgapay, cajayawangap, igaperdona̱tcap nepʉn, iga-ayo̱wis̈cap jayajwat.

³²Ijawigap nat iguinʉm Dios ni'c ma o'jca jeme iwatcapay wename, po majawe'naj siguia̱tp iguiwatca mal mit iwangap japu̱t jayajwat ma watca-ey ni-as̈amu.