Read Sayula Popoluca Romanos 10 Bible Online

Romanos 10 - Sayula Popoluca bible

Romanos 10

¹Hermanujat, tʉnwamp mit nu'pʉjʉn tʉnjo̱jt ma nisalva̱tcʉjʉ Israelway jayajwat, mit tʉnyo'tí̱jcap Dios ma salva̱tcʉs̈.

²Tʉnjawip ni'c je'jat iche'ngap mʉgʉc Dios po ca-oyap igui-is̈cápca Dios iyacs̈ta'cway.

³Ni'c igajawigap nat Dios iguiyacs̈icninʉmgʉs̈ jayajwat. Je'jat iwatcap as̈am iguiwanga pa itsʉ̱ngawa'n oy mit Dios, mit igamoygap laj Dios iguiyacs̈icninʉmgáj.

⁴Je'jat iwangau iguicumplia̱tcawa'n ayé ampay ley, po Cristu min iguicumplia̱t pa nas̈actu-e'pcáj tu'c nam to̱u, pa ma tsʉ̱nga yacs̈icninʉ́mijcat nu'pʉjʉn icupʉjcapay je'.

⁵Moisés nas̈actu-ís̈cau ayé yacs̈ic to̱u iyacpay ley, ni'c inʉm ilibruni'c: “Ayé jayau jeme icumplia̱támpay nu'pʉjʉn inʉmpay ley tsʉ̱náj oy mit ijtʉ̱́j vida cacʉs̈ámpay.”

⁶Po Dios nas̈moygau tu'c nam to̱u, mit nas̈yacs̈icninʉmgap ni'c nacupʉjcap Jesucristu. Jemni'c naganʉm: ¿Pʉn cu'táj tsajpni'c pa igui-acmi'nwa'n Cristu pa na̱s̈ni'c?

⁷Mit naganʉ́mey: ¿Pʉn managáj na̱s̈cʉtʉm mam itsʉ̱nga á̱nimajat pa igui-ajcu'twa'n Cristu?

⁸Po más oy nanʉ́mgaja Dios ipalabra ni'c ayé tsʉ̱nap najo̱tni'jcat. Ʉjtsat tʉnyʉmdacyo'ygajap Dios ipalabra pa jayajwat ma cupʉjca Jesucristu.

⁹Te nanʉmgap ni'c el Señor Jesús nas̈manda̱tcap, mit te nacupʉjcap mit nu'pʉjʉn najo̱jtat ni'c Dios i-acjutucta̱c Jesús mam itsʉ̱nga á̱nimajat, natsʉ̱ngáj salva̱tic.

¹⁰Ni'c nacupʉcp mit nu'pʉjʉn najo̱jt pa Dios nas̈yacs̈icninʉmáj, mit nanʉmp ni'c Jesús nas̈manda̱tp pa natsʉ̱nawa'n salva̱tic.

¹¹Ni'c inʉm Dios ilibruni'c: “Nu'pʉjʉn icupʉjcapay je' cawinchu̱gáj.”

¹²Dios niwe'nu igui-e'pcʉs̈ judíujat mit jeme caje'jatway judíujat, ni'c el Señor Jesucristu nas̈manda̱tcap nanu'pʉjʉjnat mit nas̈majyigáj mayo'c te nayo'tcajap je'.

¹³Nu'pʉjʉn inʉ'jutcapay el Señor iyacs̈ta'cway, tsʉ̱ngáj salva̱tic.

¹⁴Po jayajwat ca-oyap iguinʉ'jútca el Señor te iganicupʉjcap je', mit ca-oyap iguicupʉ́jca je' te iganimaraugajap ipalabra, mit ca-oyap iguimaraugaja te nepʉn iganinʉmdacyo'jyap ipalabra.

¹⁵Mit te ca-itp pʉn i-ajyu'tcámpay, ¿nat iguinʉmdacyo'ygawa'n? Ni'c ja'yic itsʉ̱na Dios ilibruni'c: “¡Oyo'gu iminga jeme inʉmdacyo'ygapay paz mit jeme inʉmdacyo'ygapay oyway noticia!”

¹⁶Po caje' nu'pʉjʉn iwatcajap cuenta ayé oyway noticia. Ni'c Isaías inʉm: “Señor, ¿pʉn icupʉc lo que tʉnyʉmdacyo'ygaway?”

¹⁷Mit jemni'c itp ti nas̈maraugawa'n lo que inʉmpay Dios, pa we'n nacupʉjcáj Jesucristu.

¹⁸Po tʉn-ucyo'tp: ¿Nepʉn iganimarap ayé oyway noticia? Jo̱, imaraugau, ni'c ja'yic itsʉ̱na Dios ilibruni'c: Inʉmdacyo'ygau jʉmgapa'tu, mit nu'pʉjʉn jayajwat en ayʉ̱́j mundu imaraugau ayé oyway noticia.

¹⁹Po tʉn-ucyo'tpey: ¿Is̈jawiga Israelway jayajwat iga-entendia̱tcawu lo que Dios inʉmway? ni'c primeru Moisés ija'y lo que Dios inʉmway: Tʉ-ac-awa'nigʉs̈áj ni'c tʉnwatcʉs̈áj oy pe'ta̱may jayajwat, mit tʉ-ac-awa'nigʉs̈áj ni'c tʉnwatcʉs̈áj oy ayé jayajwat jeme iga-is̈capcapay neti.

²⁰Mit capʉ̱tu Isaías iguinʉjm lo que Dios inʉmway: Tʉs̈pa̱tcau jeme tʉs̈cache'ngaway, mit tʉnque's̈ta̱jcʉs̈au jeme tʉs̈ca-atsʉ̱ngaway.

²¹Po Dios inʉmgʉs̈au Israelway jayajwat: “Najs̈ʉjw tʉnya̱s̈cʉs̈ jayajwat ma tʉs̈maraugac, po tʉs̈cajayaumaygap mit copacmʉgʉcwatcap.”