Read Sayula Popoluca Romanos 11 Bible Online

Romanos 11 - Sayula Popoluca bible

Romanos 11

¹Tʉn-ucyo'tp ayʉ̱́j: ¿Is̈jawiga Dios icuyaguigʉs̈ ijayajwat pa siempre? Caje' we'n, ni'c ʉ̱ tʉIsraelway jayawey, Abraham ayé tʉnte̱jtat ámbanuway mit tʉpichin Benjamín ifamiliani'c.

²Dios iganicuyaguigʉs̈p ijayajwat jeme icupiugʉs̈way ámbanu. ¿Inga-entendia̱tcap nat itsʉ̱na ja'yic Dios ilibruni'c nat iguiwajt profeta Elías? Je' iyo'jtau Dios mit i-acusa̱tcʉs̈ mit Dios ayé Israelway jayajwat,

³inʉm: “Señor, i-ago'jcau improfetajat mit ipas̈cada̱jcau ayé lugajrat mam tʉ-adorá̱tca, mit jatʉntu'gumu tʉtajn mit jinap tʉs̈che'ngapey pa tʉs̈ago'jcáj.”

⁴Po Dios ipo'n Elías yenamé: “Tʉnaguep siete mil jayajwat jeme cacos̈atenagaway mam itsʉ̱na ayé tiyu̱s̈ Baal.”

⁵Mit we'ney hasta jinap cupʉjcapnaj una̱c Israelway jayajwat, mit Dios icupiugʉs̈ ni'c imoygʉs̈ favor.

⁶Mit te Dios imoygʉs̈ favor, caje' ni'c iwatcau oy pa iguipʉctsougáj Dios. Dios nas̈pʉctsougap we'nu ni'c je' nas̈wano'jcap mit nas̈moygap favor.

⁷¿Ti nanʉmgáj? Israelway jayajwat iche'ngau yacs̈ic to̱u pa itsʉ̱ngawa'n oy mit Dios, po igapa̱tcawu. Ipa̱tcau yacs̈ic to̱u jeme Dios icupiugʉs̈way, mit japu̱jtat Dios icuyaguigʉs̈ ma copacmʉgʉcwátca.

⁸As̈am itsʉ̱na ja'yic Dios ilibruni'c: “Dios icuyaguigʉs̈ maga-entendiá̱tca neti. Igatu-e'pcap iwijnat mit ita̱tsʉjcat igatumaraugap hasta jinapay s̈ʉjw.”

⁹Mit inʉm David: Ma togoyga meru mam iguiwatca cayna̱s̈ maljayajwat, ma cunépiga mit ma tunas̈ca.

¹⁰Ma wínchiga, mit siempre ma tunas̈ca as̈am tu'c jayau tsʉmpay may.

¹¹Mit tʉn-ucyo'tp: ¿Is̈jawiga cunépigau Israelway jayajwat pa itu'mbajca'ugawa'n? Caje' we'n. Po ni'c je'jat cajayaumaygap, jinap nisalva̱tcʉjʉp jeme caje'jatway judíujat, pa we'n Israelway jayajwat ni-anima̱tcʉjʉ̱́j pa ijayaumaygawa'n.

¹²Mit como je'jat cajayaumaygawu, jinap tsʉ̱ngap oy nu'pʉjʉn jayajwat, mit como je'jat ca'ugau, jinap tangap oy jeme caje'jatway judíujat. Mit te we'n ijajt, cuandu Israelway jayajwat itʉgʉygawa'natu mit Dios, nu'pʉjʉn jayajwat tsʉ̱ngáj más oy.

¹³Tʉmucotscʉs̈p mijchat migaje'jatway judíujat ni'c Dios tʉs̈ajyu't pa jeme caje'jatway judíujat, mit tʉn-oyninʉmp ayé yos̈ tʉs̈moyway Dios.

¹⁴Tʉnwamp ma ni-animá̱tcʉjʉ tʉntʉcmayna̱s̈atway pa ma cupʉ́jca-ey as̈am mijchat incupʉ́jca, mit we'n nisalva̱tcʉjʉ̱́j cʉjtu'c je'jat.

¹⁵Dios icastiga̱tcʉs̈ Israelway jayajwat, mit jinap nu'pʉjʉn jayajwat oyap itsʉ̱nga oy mit Dios. Po cojáj tu'c s̈ʉjw cuandu Dios iguipʉctsougʉs̈wa'n Israelway jayajwat mit wejpu'n nu'pʉjʉn jayajwat tsʉ̱ngáj más oy mit Dios.

¹⁶Mit te oyninʉmic ayé harinacʉ't iyajcʉ'jcaway ampay jayajwat pa Dios, we'ney nu'pʉjʉn ayé harinacʉ't oyninʉmic itsʉ̱nawa'n. Mit te oy itsʉ̱na tu'c cujy iticchicni'c, we'ney i-awejcat oy itsʉ̱ngawa'n. Jemni'c Israelway jayajwat tsʉ̱ngapey oyninʉ́mijcat ni'c Dios i-oyninʉmgʉs̈au ite̱jtat ámbanuway.

¹⁷Ayé judíujat as̈am olivucujy ni'picway i-awejcat, po como Dios icastiga̱tcʉs̈, je'jat tangau as̈am awec icupus̈capay. Jeme caje'jatway judíujat ayé as̈am olivucujy cus̈umipay je'yu i-awejcat. Mit te icutsowigap ayé awejcat en tu'c olivucujy ni'picway, ayé awejcat ipʉjcáj maj mit ayé olivucujy iticchic, mit ipʉctsougajáj inipin iyacpay ayé olivucujy. Ayé inʉmo'jcʉp ni'c mijchat migaje'jatway judíujat inaguepcapey parte mit Dios.

¹⁸Po camnʉmga ni'c más mitsʉ̱ngap oy que ayé judíujat. Pi jawiga ni'c tu'c awec igatsʉmtso̱p ayé cuyticchic, po ayé cuyticchic itsʉmtso̱p ayé awec.

¹⁹Po mijchat inyʉmgáj: “Icupus̈cau ayé awejcat pa ʉjtsat tʉnigutsowigʉjʉwa'n ilajni'jcat.”

²⁰Oyo'gu is̈nʉ́mga. Ayé judíujat as̈am awejcat icupus̈caway po jat we'n ni'c cacupʉjcawu, mit mijchat mitsʉ̱ngap oy ni'c micupʉjcap. Jemni'c camnimʉjninʉ́mgʉjʉ. Más oy pi pʉ̱tca.

²¹Ni'c te Dios iga-ayo̱wis̈cʉs̈u ayé awejcat jeme ye'jcaway en ayé cujy ni'picwy, je' is̈ca-ayo̱wis̈cámpey te migacupʉjcap iyacs̈ta'cway.

²²Jawiga ni'c Dios jayawano'cp, po je' castiga̱tpey mʉgʉc. Dios icastiga̱tcʉs̈ jeme cajayaumaygaway po mijchat je' is̈wangap. Po oy pi tanga mʉgʉc mit je'. Te ingawatcap we'n, is̈castiga̱tcámpey as̈am iguicupús̈ca ayé awejcat.

²³Mit we'ney judíujat. Te cajasiguia̱tp idudá̱tca, tsʉ̱ngájatu cutsówiyic en ayé olivucujy ni'picway, ni'c Dios ijtʉp poder pa iguicutsowigʉs̈wa'natu.

²⁴Mijchat migaje'jatway judíujat as̈am is̈cupus̈caway de tu'c olivucujy jeme cus̈umipay je'yu, mit is̈cutsowigau en ayé olivucujy ni'picway. Mit ayé judíujat as̈am meru awec icupus̈caway de ayé olivucujy ni'picway. Jemni'c más fácil pa iguicutsowigawa'n en ayé olivucujy mam i-ijtʉ'c primeru.

²⁵Hermanujat, tʉnwamp pi jawiga tu'c cosa Dios i-aguepway cuyu'tsic piganʉmga ni'c más inis̈cápcap. Ni'c una̱c Israelway jayajwat copacmʉgʉcwatcau pa i-oyawa'n itʉgʉyga mam imanda̱t Dios jeme caje'jatway judíujat. Mit tʉgʉygáj nu'pʉjʉn jeme Dios icupiugʉs̈way.

²⁶Mit cʉs̈wa'n nu'pʉjʉn Israelway jayajwat nisalva̱tcʉjʉ̱́j, as̈am itsʉ̱na ja'yic Dios ilibruni'c: Mi'náj jeme ilibra̱támpay Sionway na̱s̈, mit ichi'tcʉs̈áj Israelway jayajwat de nu'pʉjʉn mal.

²⁷Mit tʉnwatáj ayʉ̱́j acuerdu mit je'jat, ni'c tʉnchi'tcʉs̈áj nu'pʉjʉn mal iwatcaway. We'n iguinʉjm Dios.

²⁸Jinap Dios i-e'pcʉs̈p judíujat as̈am imutsuguijnat ni'c igacupʉjcawu ayé oyway noticia. Jat we'n pa mijchat pi tsʉ̱nga oy mit Dios. Po majawe'naj Dios iwangʉs̈p judíujat ni'c iwangʉs̈au ite̱jtat ámbanuway, mit icupiugʉs̈.

²⁹Ni'c Dios igatigatsp lo que inʉmpay, mit igacuyaguip jeme iya̱s̈cʉs̈way.

³⁰Mit mijchat ámbanu ingajayaumaygawu-ey Dios, po como ayé judíujat cajayaumaygawu, jinap mijchat Dios is̈-ayo̱wis̈cap.

³¹We'ney je'jat iganijayaumaygap Dios, po Dios i-ayo̱wis̈cʉs̈áj as̈am is̈-ayo̱wis̈cau mijchat.

³²Ni'c Dios iwan nu'pʉjʉn jayajwat ma jawiga ni'c cajayaumaygap, mit jinap je' oyap igui-ayo̱wis̈cʉs̈ nu'pʉjʉn.

³³¡Dios mʉjo'c mit ʉjtsat mit oyo'gu lo que iwatpay! Dios i-is̈cap nu'pʉjʉn cosa, mit nepʉn ca-oyap iguijawi nat ipensa̱t Dios, mit nepʉn ca-oyap igui-is̈cap lo que iwatpay je'.

³⁴¿Pʉn ijawip nat ipensa̱t el Señor? ¿Mit pʉn oyap iguinʉjmap ti iwatámpay je'?

³⁵Nepʉn ca-oyap iguimo' Dios tu'c regalu pa iguimoytigatsáj tu'c recompensa.

³⁶Ni'c Dios ayé iwatway nu'pʉjʉn cosajat, mit je' nas̈moygapey nu'pʉjʉn, mit je' ipʉctsowáj nu'pʉjʉn cosajat. Na-oyninʉ́mga je' pa nu'pʉjʉn tiempu. Amén.