Read Sayula Popoluca Romanos 12 Bible Online

Romanos 12 - Sayula Popoluca bible

Romanos 12

¹Hermanujat, nijawi-í̱jca lo que tʉnʉmgʉs̈away, ni'c Dios nas̈-ayo̱wis̈cap. Jemni'c na-entregá̱tca navidajat mit Dios pa najayaumayga je'. Ambanu icotscajau Dios tu'c aníma̱t o'guicway, po jinap ʉjtsat nacotscajap Dios navidajat nijutuc, mit Dios ji'cp ijo̱jt nas̈pʉctsougáj. Te nawatcap we'n, na-adora̱tcáj Dios mit nu'pʉjʉn najo̱jtat, ni'c we'n iguiwa'n Dios nawátca.

²Nagawátca as̈am jayajwat iwangapay mal costumbre itpay en ayʉ̱́j mundu. Je'jat solo ipensa̱tcap ayé cosajat i-e'pcapay, po ʉjtsat oy napensá̱tca nam cosajat pa ma tigats navidajat. Mit we'n na-is̈capcáj ti ayé iwampay Dios. Na-is̈capcáj ti ayé oyway, ti ayé igui-acji'jcapay Dios ijo̱jt, mit ti ayé más oyway.

³Dios tʉs̈moy favor pa tʉtsʉ̱nawa'n encarga̱tic, mit jemni'c tʉnyʉjmap cada jayau tsʉ̱napay mam mijchat magapensa̱t ni'c je' más i-is̈cap po ma pensa̱t as̈am imerecia̱t, mit cada jayau ma pensa̱t oy, ni'c Dios imoyp cada jayau nat icupʉcwa'n.

⁴Ni'c nacuerpu ijtʉp may partejat, po cada parte igawatp nije'yu yos̈.

⁵We'ney ʉjtsat. Namayo'jcat po natsʉ̱ngap as̈am tu'c cuerpu ni'c namutʉgʉygau Cristu. Mit nanipʉjcʉjʉp nanu'pʉjʉjnat ni'c natsʉ̱ngap tu'gu.

⁶Mit ʉjtsat tigatsic nas̈moygau Dios ti nawatcámpay, ni'c je' imoyp favor cada jayau as̈am je' iguijawi. Jeme i-ajque's̈pay lo que inʉmpay Dios, ma ajque's̈ yacs̈ic lo que nacupʉjcapay as̈am Dios iguimoy.

⁷Te Dios nas̈moygau pa naserviá̱tcaja jayajwat, naserviá̱tcaja oy. Te Dios imoyp tu'c jayau ma ajque's̈a ipalabra, ma cuji'cs̈i i-ajque's̈wa'n.

⁸Te imoyp tu'c jayau ma anima̱tcʉs̈ jayajwat, we'n ma wat. Te tu'c jayau i-acpas̈amp lo que ijtʉpay, ma acpas̈an we'nujyu. Jeme manda̱tpay, ma manda̱t oy. Jeme imajyipay pro̱wijat, ma ji'c ijo̱jt cuandu iguimajyigʉs̈wa'n.

⁹Cupʉcpajyat ma niwangʉjʉ mit nu'pʉjʉn ijo̱jtat, ma siguiá̱tcaja jeme oyway, mit magawatca cuenta ma̱jlat.

¹⁰Niwangʉjʉ minu'pʉjʉjnat as̈am hermanujat ni'c mitu'jcatu. Majyiga japu̱t hermanujat, mit camche'nga neti pa mijchatu.

¹¹Camcandʉ'nyújca po siempre cuji'cs̈iga, mit serviá̱tcaja el Señor mit nu'pʉjʉn injo̱jtat.

¹²Ma ji'c injo̱jtat ni'c inatsʉ̱ngap vida cacʉs̈ámpay. Majmoyga is̈tunas̈cawa'n, mit ora̱tí̱jca.

¹³Majyiga Dios ijayajwat jeme tsʉ̱ngapay nesita̱tic, mit pʉctsouga oymanac nu'pʉjʉn tʉcyo'ypajyat.

¹⁴Oyninʉ́mga jeme is̈po'ctangapay, mit cammalninʉ́mga.

¹⁵Ma ji'c injo̱jtat mit jeme ji'jcapay ijo̱jtat. Jʉ́yga mit jeme jʉygapay.

¹⁶Tsʉ̱́nga en acuerdu minu'pʉjʉjnat. Camnimʉjninʉ́mgʉjʉ, po munipʉ́jcʉjʉ pro̱wijwájat. Mit camnʉmga ni'c más mijatcʉjʉp.

¹⁷Camwátcaja mal jeme is̈watcajapay mal. Cuji'cs̈iga is̈watcawa'n oy mam igui-e'pca nu'pʉjʉn jayajwat, pa Dios ma tsʉ̱na oyninʉmic.

¹⁸Oy pi pensa̱tca más pa intsʉ̱ngawa'n en paz mit nu'pʉjʉn jayajwat.

¹⁹Mijchat tʉwangʉs̈pay, camacpítujca nejʉmay mal, más oy pi moyga laj Dios ma castiga̱t maljayajwat, ni'c ja'yic itsʉ̱na Dios ilibruni'c: “Ʉ̱ tʉncastiga̱tcʉs̈áj maljayajwat, mit tʉnactutso̱jcʉs̈áj. We'n iguinʉjm el Señor.”

²⁰Mit inʉmwey el Señor: “Te inmutsuguin cayo'jcʉp, mo' ma cay. Te nʉ-u̱go'jcʉp, mo' ma u'c. Ni'c te inwatcap we'n, inactu'ngajáj ijo̱jt mit winchu̱gáj inmutsuguin.”

²¹Camtsʉ̱nga vencia̱tic mit ayé mal, po watca oy pa is̈vencia̱tcawa'n ayé mal.