Read Sayula Popoluca Romanos 13 Bible Online

Romanos 13 - Sayula Popoluca bible

Romanos 13

¹Nu'pʉjʉn jayajwat ma jayaumayga autoridajat mit jeme más manda̱tcapay, ni'c nu'pʉjʉn jeme manda̱tcapay, Dios iyajcʉs̈p ma manda̱tca. Mit Dios iyajcʉs̈p jeme jinap manda̱tcapay.

²Jemni'c jeme igajayaumaypay autoridajat, igajayaumaypey lo que Dios imanda̱tway. Mit jeme cajayaumaygapay tsʉ̱ngáj castiga̱tic.

³Te nawatcap oy, nagapʉ̱tcáj autoridajat. Je'jat solo iguipʉ̱tcap jeme iwatcapay mal. Te nagawangap nas̈pʉ̱tcawa'n jeme manda̱tcapay, nawátca oy mit je'jat nas̈-oyninʉmgáj.

⁴Ni'c tu'c manda̱tpay Dios iguiyac pa natsʉ̱nga oy. Po te nawatcap mal, oy napʉ̱tca, ni'c je' ijtʉp derechu pa iguicastiga̱tcʉs̈wa'n maljayajwat. Mit je' Dios iguiyac pa igui-actunas̈wa'n jeme iwatpay mal.

⁵Jemni'c itp ti najayaumaygawa'n pa nagatsʉ̱nga castiga̱tic, mit we'ney pa najawiga ni'c nayo'ygap oy.

⁶Jemni'guey oy natsó̱jca tumi̱n-impuestu ni'c autoridajat imuyos̈watcap Dios, mit icumplia̱tcap idebejrat.

⁷Oy natsó̱jca nu'pʉjʉn napʉ́jquijatway. Tsó̱jca jeme que'chumgapay pa gobernador, mit intso̱jcapey jeme ipʉctsougapay impuestujat. Respetá̱tca jeme imerecia̱tpay respetu. Oyninʉmga jeme merecia̱tpay is̈-oyninʉmgawa'n.

⁸Camtángaja pʉjqui nepʉn. Solo mipʉ́jquijat ni'c itp ti inyiwangʉjʉwa'n minu'pʉjʉjnat. Ni'c jeme iwampay imupro̱wije̱way, je' icumplia̱tnup lo que inʉmpay ley.

⁹Ni'c Dios inʉm yename: “Migachajyo'yáj, miga-ago'gáj, miganu'máj, ingawe̱twajtáj nepʉn, ingawa'náj jayje'.” Ayʉ̱́j mandamientu mit nu'pʉjʉn mandamientujat tsʉ̱nap nʉmic en tu'c solo mandamientu: “Inwa'náj inmupro̱wije̱way as̈am mi̱ inyiwajnʉ.”

¹⁰Jeme iwampay imupro̱wije̱way igawajtáj mal. Jemni'c ayé jayau iwampay imupro̱wije̱way, icumplia̱tnup lo que inʉmpay ley.

¹¹Cuandu primeru nacupʉ́jcaj, najawigau ni'c Cristu mi'nájatu pa nas̈libra̱tcáj. Mit jinap tomo'ganu ayé tiempu pa nas̈libra̱tcáj. Jemni'c natsʉ̱nga prepara̱tic, caje' as̈am jeme ma̱gapay.

¹²Tomo'ganu pa icojawa'n ayé s̈ʉjw itumi'námpay Cristu. Jemni'c ʉjtsat nacuyáguiga nu'pʉjʉn mal nawatcaway ámbanu. Mit jinap nayo'ygáj Dios iluzni'c pa natsʉ̱ngawa'n oy.

¹³Nayo'yga limpiu as̈am jeme yo'ygapay s̈ʉ̱m. Nagawatcadá̱jca tigapa'tu mit naga-u̱ctacyo'yga. Nagachajyo'yga mit naga-aguepca nejʉmay viciu. Nagatsuguinwátca mit nagani-ángʉjʉ.

¹⁴Po más oy namuyo'yga el Señor Jesucristu, mit nagache'nga ayé mal iyo'tpay najo̱jtat.