Read Sayula Popoluca Romanos 15 Bible Online

Romanos 15 - Sayula Popoluca bible

Romanos 15

¹Ʉjtsat nacupʉjcapay mʉgʉc namájyiga jeme cacupʉjcapay mʉgʉc, mit nagawátca lo que ʉjtsatu nawangapay.

²Ʉjtsat nanu'pʉjʉjnat nawátcaja oy namupro̱wije̱wajyat pa ma pʉjca maj mit Dios.

³Mit we'ney Cristu igawatu lo que je'yu iwanway, po iguijat as̈am itsʉ̱na ja'yic Dios ilibruni'c, je' inʉjmau Dios yename: “Ʉ̱ tʉs̈malninʉmgawey jeme is̈malninʉmgaway mi̱.”

⁴Ni'c nu'pʉjʉn inʉmgaway ámbanu Dios ilibruni'jcat, ayé ja'yic pa napʉctánga. Mit ayé librujat nas̈majyigap pa na-aguépca calma mit nas̈-animá̱tcap, jemni'c nas̈atsʉ̱́nga lo que mi'námpay.

⁵Dios nas̈moygap calma mit nas̈-animá̱tcap. Je' iwamp natsʉ̱́nga en acuerdu ni'c namutʉgʉygau Cristu Jesús.

⁶Mit we'n nanu'pʉjʉjnat na-oyninʉmgáj Dios, el Señor Jesucristu ite̱t.

⁷Jemni'c nipʉctsóugʉjʉ oymanac minu'pʉjʉjnat, as̈am Cristu is̈pʉctsougau mijchat, pa jayajwat ma oyninʉmga Dios.

⁸Mit tʉnʉmgʉs̈ap ni'c Cristu min pa iguiservia̱tcʉs̈awa'n judíujat, mit pa iguicumplia̱twa'n ayé promesajat Dios imoygʉs̈way nate̱jtat ámbanuway, mit we'n i-actujawigʉs̈ ni'c Dios icumplia̱tp lo que inʉmway.

⁹Mit Cristu miney pa jeme caje'jatway judíujat pa ma oyninʉmga Dios ni'c je' igui-ayo̱wis̈cau, as̈am itsʉ̱na ja'yic Dios ilibruni'c: Tʉ-oyninʉmáj mi̱ mam itsʉ̱nga jeme caje'jatway judíujat, mit tʉn-ʉwáj himnujat pa pi tsʉ̱na oyninʉmic. We'n iguinʉ́jmaj Dios.

¹⁰Mit inʉmwey Dios ilibruni'c: Jeme caje'jatway judíujat ma ji'c ijo̱jtat as̈amu Dios ijayajwat.

¹¹Mit inʉmwey: Ma oyninʉmga el Señor nu'pʉjʉn jeme caje'jatway judíujat. Ma mʉjninʉmga Dios nu'pʉjʉn jayajwat.

¹²Mit inʉm Isaías wename pa najawiga nat imi'nwa'n Cristu: Tu'c jayau pichináj Isaí ifamiliani'c, mit je' imanda̱tcʉs̈áj jeme caje'jatway judíujat, mit je'jat i-atsʉ̱ngáj hasta imi'nwa'n je'.

¹³Ʉjtsat na-atsʉ̱ngap Dios pa nas̈pʉctsougawa'n cosa oyway, mit tʉnyo'jtap je' pi is̈acji'jcajac injo̱jtat, pi is̈moygac paz ni'c micupʉjcap, pa we'n inatsʉ̱ngáj Dios ni'c Espíritu Santu is̈moygap maj.

¹⁴Tʉnhermanujat, tʉtsʉ̱nap seguru ni'c mijayawano'jcap, mit inis̈capo'jcap may, mit oyap inyitsáwigʉjʉ.

¹⁵Po tʉgapʉ̱tu tʉja'ygʉs̈a ayʉ̱́j noc pa pi nijawiga nu'pʉjʉn tʉnʉmgʉs̈away.

¹⁶Dios tʉs̈moy favor, tʉs̈yac pa tʉs̈servia̱jtawa'n Jesucristu mam itsʉ̱nga jeme caje'jatway judíujat. Mit tʉnyʉmdacyo'jyap i-oyway noticia mam je'jat. Mit jeme caje'jatway judíujat tʉnyajcʉs̈áj Dios icʉ'jugum as̈am tu'c ofrenda je' iwampay, mit Espíritu Santu tsʉ̱nap ijo̱tni'jcat pa iguilimpia̱tcʉs̈wa'n.

¹⁷Tʉnservia̱jtap Cristu Jesús, mit jemni'c tʉs̈-oyninʉm ayé yos̈ tʉs̈moyway Dios.

¹⁸Jinap solo tʉnyʉmáj lo que Cristu tʉs̈actuwatpay ʉ̱, pa ma jayaumayga jeme caje'jatway judíujat. Cristu tʉs̈ajyu't pa tʉs̈nʉjmawa'n ipalabra mit pa tʉs̈watwa'n cosa oyway.

¹⁹Je' tʉs̈actuwatp majatway milagrujat mit tʉnacnigu-epigʉs̈ʉu ayé jayajwat ni'c Espíritu Santu tʉs̈moy poder. Mit tʉnyʉmdacyo'ygʉ́s̈au Cristu i-oyway noticia, mit imaraugau desde Jerusalén mit nu'pʉjʉn laj hasta Ilíricoway na̱s̈.

²⁰Mit siempre tʉncuji'cs̈iu tʉs̈nʉmdacyo'ywa'n oyway noticia mam nunca iguiganimáraugaja Cristu inʉ'jy, ni'c tʉngawamp tʉyos̈watwa'n mam jatu'c jayau iguichú̱chij.

²¹As̈am itsʉ̱na ja'yic Dios ilibruni'c: Igajawigapate ni'c mi'náj je', po je'jat igui-e'pcáj. Je'jat nunca iganimaraugajap Dios ipalabra, po imaraugáj.

²²Tʉnwanate tʉnʉs̈wa'n mam mijchat, po mayo'c cosajat ca-oyap tʉs̈acnʉs̈p.

²³Po jinap tʉncʉs̈way tʉnyos̈ yam. Mayap s̈iwit tʉnʉs̈o'jcʉ mam intsʉ̱nga,

²⁴po tʉnʉs̈wa'n pa España, tʉnas̈áj mam mijchat ni'c tʉnwamp tʉ-e'pcʉs̈wa'n mit ji'gáj tʉnjo̱jt mit mijchat. Mit cʉs̈wa'n nʉs̈áj is̈yacta̱jcap mam tʉnʉs̈wa'n.

²⁵Po jinap tʉnʉs̈p Jerusalén pa tʉs̈-entrega̱twa'n tu'c ayuda pa Dios ijayajwat jeme tsʉ̱ngapay jem.

²⁶Ni'c hermanujat jeme tsʉ̱ngapay Macedonia mit Acayajway na̱s̈ iwangau iguiyajcawa'n tu'c ofrenda pa hermanujat pro̱wijatway jeme tsʉ̱ngapay Jerusalén.

²⁷Iwangau iguiyajcawa'n ayé ofrenda ni'c je'jat casi ipʉ́jquijat judíujat. Ni'c jeme caje'jatway judíujat ipʉctsougau ayé cosa oyway iyacway Dios pa judíujat. Mit jemni'c je'jat itpey ti iguimajyigawa'n ayé judíujat jeme cupʉjcapay.

²⁸Icʉs̈wa'n ayé asuntu, tʉn-entrega̱tcʉs̈áj ayé ofrenda iyajcaway. Mit cʉs̈wa'n tʉnas̈áj mam intsʉ̱nga cuandu tʉnʉs̈wa'n pa España.

²⁹Cuandu tʉcojawa'n mam mijchat, tʉtsʉ̱nap seguru ni'c Dios tʉs̈mo'áj may favor pa tʉs̈nʉmdacyo'ywa'n ayé oyway noticia iyacway Cristu, mit wejpu'n ji'jcáj injo̱jtat.

³⁰Hermanujat, inwangap el Señor Jesucristu, mit Espíritu Santu is̈acniwangʉjʉp. Jemni'c tʉyo'tcʉs̈ap pi is̈-orá̱tcajac mʉgʉc, mit wename ʉ̱ is̈majyigáj.

³¹Orá̱tca pa Dios ma tʉs̈libra̱tac de ayé judíujat cacupʉjcapay. Orá̱tca-ey pa ayé hermanujat Jerusaléjnatway ma pʉctsouga oy ayé ofrenda tʉnmunʉs̈cʉs̈apay,

³²mit in-ora̱tcajámpey Dios, pa ma ji'c tʉnjo̱jt cuandu tʉ-e'pcʉs̈wa'n, mit tʉpo'cs̈áj mam mijchat. Mit te Dios iwamp, pichináj oy ayé.

³³Ayé Dios nas̈moygapay paz ma tsʉ̱na mit mijchat minu'pʉjʉjnat. Amén.