Read Sayula Popoluca Romanos 16 Bible Online

Romanos 16 - Sayula Popoluca bible

Romanos 16

¹Tʉnʉmgʉs̈ap pi pʉctsouga hermana Febe ni'c je' imajyigʉs̈p cupʉcpajyat tsʉ̱ngapay nʉ'jcopac Cencrea.

²Pʉctsouga je' inʉ'jyni'c el Señor ni'c merecia̱tp pi pʉctsouga oy Dios ijayajwat. Májyiga je' mit nu'pʉjʉn cosa inesita̱támpay ni'c je' imajyigʉs̈p mayo'c jayajwat mit ʉ̱ tʉs̈majyipey.

³Saludá̱tca Aquila mit ito's̈ay Priscila ni'c tʉs̈muyos̈watcap pa tʉs̈servia̱tcajawa'n Cristu Jesús.

⁴Je'jat iyajcau ividajat en peligru por ʉ̱, mit jemni'c tʉtsʉ̱nap agradecidu, mit we'ney nu'pʉjʉn cupʉcpajyat jeme caje'jatway judíujat inʉmgajapey ni'ctiyu̱s̈.

⁵Saludá̱tca-ey nu'pʉjʉn cupʉcpajyat jeme ni-apʉcmujcʉjʉpay Aquila itujugujmat. Saludá̱tca Epeneto ni'c je' tʉnhermanu tʉnwano'cpay, mit je' ayé primer cupʉcpay Acayajway na̱s̈.

⁶Saludá̱tca María ni'c je' yos̈wato'cp mam intsʉ̱nga.

⁷Saludá̱tca Andrónico mit Junias tʉmpaisanujat. Je'jat tsʉ̱ngawey presu as̈am ʉ̱, mit apóstojlat igui-oyninʉmgap. Je'jat icupʉjcʉ'jcau Cristu antes ʉ̱ tʉs̈cupʉjc.

⁸Saludá̱tca tʉn-amigu Amplias. Tʉnmuniwano'jcʉp ayé jayau, mit je' icupʉcp el Señor.

⁹Saludá̱tca Urbano. Je' tʉs̈muyos̈watcap pa tʉs̈servia̱tcajawa'n Cristu Jesús. Saludá̱tca Estaquis jeme tʉnwano'cpay.

¹⁰Saludá̱tca Apeles ni'c je' icupʉcp Cristu iyacs̈ta'cway. Saludá̱tca-ey jeme tsʉ̱ngapay tʉc AristoUlo.

¹¹Saludá̱tca Herodión tʉmpaisanu. Saludá̱tca jeme tsʉ̱ngapay tʉc Narciso ni'c je'jat icupʉjcap el Señor.

¹²Saludá̱tca Trifena mit Trifosa jeme imuyos̈watcapay el Señor. Saludá̱tca Pérsida jeme nawano'jcapay ni'c je' yos̈watp mʉgʉc pa el Señor.

¹³Saludá̱tca Rufo jeme el Señor icupi̱way. Saludá̱tcaja-ey ima̱m, ni'c ʉ̱ tʉn-e'pey as̈am tʉnma̱m.

¹⁴Saludá̱tca Asíncrito, Flegonte, Hermas, Patrobas, Hermes, mit nu'pʉjʉn hermanujat tsʉ̱ngapay mit je'jat.

¹⁵Saludá̱tca Filólogo, Julia, Nereo mit we'ney ito's̈ayje̱way. Saludá̱tca-ey Olimpas, mit nu'pʉjʉn Dios ijayajwat tsʉ̱ngapay mit je'jat.

¹⁶Nisaluda̱tbʉ'ngʉjʉ mit tu'c ame'tamuc ni'c miniwangʉjʉp. Is̈saluda̱tcap nu'pʉjʉn icupʉjcapay Cristu.

¹⁷Hermanujat, tʉnʉmgʉs̈ap pi tsáwiga jeme iwatcapay divisiójnat mit jeme i-atujcapay ayé ama̱s̈an impʉctajnʉ'jcaway, mit cammunipʉ́jcʉjʉ je'jat.

¹⁸Ni'c jayajwat we'jnatway igaservia̱tcajap el Señor Jesucristu, solo iche'ngap nu'pʉjʉn pa je'jatu. Mit cotscap oymanac pa iguiwe̱jta̱jcawa'n jeme iga-is̈capcapay neti.

¹⁹Ni'c nu'pʉjʉn jayajwat ijawigap nat injayaumayga, jemni'c iji'c tʉnjo̱jt ni'c we'n is̈wátca. Tʉnwamp pi tsʉ̱nga dispuestu pa is̈watcawa'n oy, mit caje' pa is̈watcawa'n mal.

²⁰Mit ayé Dios iyacpay paz is̈majyigáj pa is̈vencia̱tcawa'n Awayagatsna'. El Señor Jesucristu pi is̈moygac may favor.

²¹Is̈saluda̱tcap Timoteo jeme tʉnmuyos̈watpay. Mit is̈saluda̱tcapey Lucio, Jasón mit Sosípater tʉmpaisanujat.

²²Ʉ̱ Tercio tʉnja'yp ayʉ̱́j noc ni'c tʉs̈manda̱t Pablo, mit tʉsaluda̱tcʉs̈p mijchat inʉ'jyni'c el Señor.

²³Is̈saluda̱tcap Gayu jeme tʉs̈pʉctsoway ʉ̱, mit je' ipʉctsougʉs̈pey nu'pʉjʉn cupʉcpajyat. Is̈saluda̱tcapey Erasto tesorero nʉ'jcopacni'cway, mit we'ney hermanu Cuarto.

²⁴El Señor Jesucristu pi is̈moygac may favor. Amén.

²⁵Na-oyninʉ́mga Dios. Je' is̈moygap maj pa incupʉjcawa'n más mʉgʉc ni'c inmaraugau ayé oyway noticia tʉnajque's̈pay, mit ayé is̈actugupʉ́jcap Jesucristu. Ayé oyway noticia nas̈actujawigap lo que Dios ijtʉway cuyu'tsic desde ámbanu.

²⁶Mit ayé profetajat jeme ja'ygaway ámbanu nas̈actujáwigawey ti iwatámpay Dios. Mit ayé Dios jeme tsʉ̱napay pa siempre tʉs̈manda̱tcau tʉnʉ́mgaja nu'pʉjʉn jayajwat ma cupʉjca Jesucristu mit ma jayaumayga.

²⁷Dios tu'gu ayé mit je' ijawip nu'pʉjʉn. Na-oyninʉ́mga je' pa nu'pʉjʉn tiempu ni'c i-acmin Jesucristu pa nas̈salva̱tcáj. Amén.