Read Sayula Popoluca Romanos 2 Bible Online

Romanos 2 - Sayula Popoluca bible

Romanos 2

¹Culpa̱tic itsʉ̱nawa'n pʉmba'tu imalninʉmámpay jatu'c jayau, ni'c te imalninʉmp jatu'c jayau, je'yu nicondena̱jtʉp ni'c je' iwatpey ni-as̈amu.

²Najawigap ni'c Dios ijuzga̱tcʉs̈áj yacs̈ic jeme iwatcapay ayé mal cosajat.

³Po te tu'c jayau imalninʉmp jatu'c jayau jeme iwatpay ayé mal cosajat, mit te je' iwatpey ni-as̈amu, ¿is̈jawiga je' oyáj iguicupo'c Dios pa magatsʉ̱na juzga̱tic?

⁴Dios jayawano'cp mit nas̈majmoygap mit may calma, ¿mit is̈jawiga nayajcáj menus Dios? Ʉjtsat naganimoygʉjʉp cuenta ni'c Dios jayawano'cp ni'c iwamp nacuyáguiga nama̱lway to̱jwat.

⁵Te tu'c jayau copacmʉgʉc mit igacuyaguip ima̱lway to̱u, ayé jayau i-acmayip ima̱jlat, mit Dios iguicastiga̱táj en ayé s̈ʉjw ijuzga̱twa'n, mit wejpu'n najawigáj ni'c je' juzga̱táj yacs̈ic.

⁶Ni'c Dios i-actutso'gáj cada jayau as̈amu iguiwat.

⁷Dios imoygʉs̈áj vida cacʉs̈ámpay pa jeme iwatí̱jcapay oy, ni'c je'jat iche'ngap ayé lugar oymanacway mam igui-oyninʉmgawa'n Dios, mit jem ca-o'jcáj.

⁸Po Dios imu-awa'nigʉs̈áj jeme iwangapay nu'pʉjʉn pa je'jatu, mit icastiga̱tcʉs̈áj ni'c igawangap iyo'ygawa'n yacs̈ic. Mit to'ctʉgʉyic itsʉ̱nga, jemni'c iguiwatca mal.

⁹Itunas̈cáj mʉgʉc nu'pʉjʉn jayajwat iwatcapay mal, primeru judíujat mit we'ney jeme caje'jatway judíujat.

¹⁰Mit nu'pʉjʉn jayau iwatpay oy tsʉ̱náj mit Dios mam i-oymanagui, mit Dios igui-oyninʉmáj mit iguimo'áj paz. Ayʉ̱́j nʉmic primeru pa judíujat jeme iwatcapay oy, mit we'ney pa jeme caje'jatway judíujat.

¹¹Dios niwe'nu igui-e'pcʉs̈ nu'pʉjʉn jayajwat.

¹²Ni'c nu'pʉjʉn jeme iwatcapay mal mit iga-is̈capcajap Moisés iley, togoygámpey po catsʉ̱ngáj juzga̱tic mit ayé ley. Mit nu'pʉjʉn jeme iwatcapay mal mit i-is̈capcap ayé ley, itujuzga̱tcáj nije'yu ley.

¹³Dios igapʉctsougʉs̈p jeme imaraugapayu ayé ley. Je' ipʉctsougʉs̈p jeme ijayaumaygapay ayé ley.

¹⁴Ni'c ayé jayajwat jeme caje'jatway judíujat ca-itcʉjʉp Moisés iley. Je'jat igani-is̈capcajap judíujat ilejyat, po majawe'naj i-entendia̱tcap ti imanda̱tpay ayé ley ni'c ijawigap jeme oyway mit jeme ma̱lway.

¹⁵Najawigap ni'c i-entendia̱tcap lo que inʉmpay ayé ley ni'c ijawigap jeme oyway mit jeme ma̱lway. Mit cada jayau ijawip ijo̱tni'c te iwatp oy o te iwatp mal, mit jemni'c jayajwat oyap ini-acusa̱tcʉjʉ mit oyapey inicowangʉjʉ.

¹⁶Dios ijuzga̱táj en ayé s̈ʉjw lo que jayajwat iwatcapay cuyu'tsic, mit iyac Jesucristu pa iguijuzga̱tcʉs̈wa'n, mit wename tʉs̈ajque's̈ en ayé oyway noticia.

¹⁷Tu'c judíu ni-oyninʉjmʉp ni'c je' judíu, mit ni-oyninʉjmʉp ni'c i-is̈cajpap Moisés iley, mit nimʉjninʉjmʉp ni'c tsʉ̱nap oy mit Dios.

¹⁸Tu'c judíu ijawip lo que iwampay Dios, mit ijawip cosa oyway ni'c we'n igui-ajque's̈ap ley.

¹⁹Je' tsʉ̱nap seguru ni'c oyap igui-ajque's̈cʉs̈a jeme iga-entendia̱tcapay, mit oyapey igui-actupʉctangʉs̈ jeme iga-is̈capcapay neti.

²⁰Je' i-ajque's̈cʉs̈ap jeme igajatcapay mit i-actupʉctangʉs̈p qui'chwájat. Je' inʉmp ni'c ijtʉp nu'tsic nu'pʉjʉn ley, mit ijawip nu'pʉjʉn cosa oyway.

²¹Te tu'c judíu i-ajque's̈ap jatu'c jayau, ¿tini'cpaj je'yu iguigapʉctajnʉ'c? Te inʉmdacyo'yp ni'c naganu'mwit, ¿is̈jawiga je' oyap inu'm?

²²Je' inʉmp ni'c nagachajyo'ywit, mit ¿is̈jawiga je' oyap ichajyo'y? Je' igawamp tiyu̱s̈at, po inu'mgʉs̈ap itpay itempluni'jcat jeme iga-is̈capcapay Dios.

²³Je' nimʉjninʉjmʉp ni'c ijtʉp Dios iley, po iyacp Dios menus ni'c igajayaumayp ayé ley.

²⁴As̈am itsʉ̱na ja'yic Dios ilibruni'c: “Jeme caje'jatway judíujat itucotscap Dios ni'c judíujat cayo'ygap yacs̈ic.”

²⁵Tu'c judíu oy ma nimarca̱jtʉ icuerpuni'c te ijayaumayp ley, po te igajayaumayp ley, jalmanu inimarca̱jtʉ.

²⁶Mit te tu'c jayau camarca̱ticway ijayaumayp lo que imanda̱tpay ley, ayé jayau as̈am marca̱ticwayey.

²⁷Mit jeme camarca̱ticway icuerpuni'c po te ijayaumajyap Dios iley, je' icondena̱táj tu'c judíu, ni'c ayé judíu ijtʉp Dios iley as̈am itsʉ̱na ja'yic, mit je' marca̱tic, po igajayaumayp ayé ley.

²⁸Tu'c jayau jeme ye'cway judíu, je' caje' tu'c judíu iyacs̈ta'cway. Te tu'c jayau marca̱tic icuerpuni'gu caje' marca̱tic iyacs̈ta'cway.

²⁹Po ayé tu'c judíu iyacs̈ta'cway jeme icupʉcpay Dios mit nu'pʉjʉn ijo̱jt, mit limpiu itsʉ̱na ijo̱tni'c. Je' ijtʉp Espíritu Santu ijo̱tni'c mit caje' tu'c ley ja'yicway. Tu'c jayau ipensa̱tpay we'n, iwamp igui-oyninʉmáj Dios, mit caje' jayajwat.