Read Sayula Popoluca Romanos 3 Bible Online

Romanos 3 - Sayula Popoluca bible

Romanos 3

¹¿Ti ventaja ijtʉp tu'c judíu? Mit ¿pa ti oy te nimarca̱jtʉp as̈am judíujat iguiwatca?

²Judíujat itcʉjʉp may ventaja ni'c Dios iguitumuyajcau ipalabra.

³¿Nat is̈jawiga? Te una̱c judíujat igacumplia̱tcap lo que inʉmway Dios, ¿is̈jawiga Dios igacumplia̱táj lo que inʉmpay?

⁴Caje' we'n. Dios siempre icumplia̱tp lo que inʉmpay, mit je' inʉmp iyacs̈ta'cway maja iwe̱tcawa'naj jayajwat. As̈am itsʉ̱na ja'yic Dios ilibruni'c, inʉmgajau Dios: Lo que inyʉmpay pichináj iyacs̈ta'cway, mit mipichináj oy cuandu jayajwat iwangáj is̈juzga̱tcáj.

⁵Cuandu jayajwat iguiwatca mal, más najawigap ni'c Dios iwatp oy. Jinap ¿ti nanʉmgáj? ¿Is̈jawiga Dios igawatp oy ni'c icastiga̱tcʉs̈p maljayajwat? We'n iguipensa̱tca una̱c jayajwat.

⁶Caje' we'n lo que ipensa̱tcapay. Dios itp ti iguijuzga̱tcʉs̈wa'n jayajwat. Po ma wátate mal, ca-oyájate iguijuzga̱tcʉs̈ jayajwat ayʉ̱́j mundujway.

⁷Cuandu ʉjtsat nawe̱tcawa'n, más najawigáj ni'c Dios inʉmp solo lo que iyacs̈ta'cway, mit we'n je' tsʉ̱náj más mʉjninʉmic. Jemni'c una̱c jayajwat inʉmgap ni'c Dios magacastiga̱tcʉs̈ we̱tpajyat.

⁸Te wename ijat, ¿tini'c más nas̈cawátca mal pa ma mi'n lo que oyway? Cʉjtu'c we'n tʉs̈tucotscap, inʉmgap ni'c we'n tʉs̈ajque's̈ca. Más oy Dios ma condena̱tcʉs̈ jayajwat ipensa̱tcapay we'n.

⁹¿Ti nanʉmgáj? ¿Is̈jawiga judíujat más iwatcap oy que jeme caje'jatway judíujat? Caje' we'n. Ni'c tʉnactujawigʉs̈way judíujat mit we'ney jeme caje'jatway judíujat ni'c to'ctʉgʉyijcat itsʉ̱nga mit ma̱jlat.

¹⁰As̈am itsʉ̱na ja'yic Dios ilibruni'c: Ca-itp netu'c jayau yacs̈icway.

¹¹Ca-itp pʉn i-is̈capay, ne ca-itp pʉn iche'mpay Dios iyacs̈ta'cway

¹²Nu'pʉjʉn icuyaguigau oyway to̱u, nu'pʉjʉn pichingau mal. Ca-itp pʉn iwatpay oy. Ca-itp netu'c.

¹³Iyo'jcʉtʉm imu-e'pcap tu'c á̱nimacʉt awa'tsicway, ni'c ma̱lo'c nu'pʉjʉn inʉmgapay, mit yújijcat pa iwe̱tcawa'n. Ayé lo que inʉmgapay imu-e'p as̈am tsanay-venenu.

¹⁴Jayautucotscap mit jayau-ángap.

¹⁵Siempre pensa̱tí̱jcap pa igui-ago'jcawa'n tu'c jayau.

¹⁶Ayé maljayajwat i-actogoyda̱jcap nu'pʉjʉn mam inʉs̈ca, mit i-actunas̈cap jayajwat.

¹⁷Mit ca-oyap iguipa̱tca ayé to̱u mam i-it paz. Siempre iwangap tsuguin.

¹⁸Igapʉ̱tcap Dios cuandu iguiwatca mal.

¹⁹Najawigap ni'c nu'pʉjʉn inʉmpay ayé ampay ley, inʉmp pa jeme tsʉ̱ngapay domina̱tic mit ayé ley, mit nu'pʉjʉn jayajwat ayʉ̱́j mundujway ma atujca i-ajwat, ni'c culpa̱tic itsʉ̱nga mam ijuzga̱t Dios.

²⁰Ni'c Dios igapʉctsowáj nejʉmay jayau jeme pensa̱tpay pa puru ley iguicumplia̱twa'n. Ni'c ayé ley solo nas̈actujawigap ni'c nawatcap mal.

²¹Jinap nas̈caja-obliga̱tcap ayé ampay ley, ni'c Dios nas̈actujawigap nat nas̈pʉctsougap, ni'c we'n iguinʉjm ámbanu ayé ley mit profetajat.

²²Dios iyacs̈icninʉmgʉs̈p nu'pʉjʉn icupʉjcapay Jesucristu. Ni'c Dios niwe'nu igui-e'pcʉs̈ nu'pʉjʉn jayajwat, judíujat mit caje'jatway judíujat.

²³Ni'c nu'pʉjʉn jayajwat iwatcap mal, mit Dios ca-oyap iguipʉctsougʉs̈.

²⁴Jinap Dios nas̈pʉctsougap ni'c nas̈wano'jcau mit nas̈moygau ayʉ̱́j favor we'nujyu ni'c Cristu Jesús itso̱c nama̱jlat pa nas̈libra̱tcáj.

²⁵Dios i-ajyu't Jesús pa i-o'cwa'n pa iguitso'cwa'n nama̱jlat, pa we'n Dios oyap iguiperdona̱tcʉs̈ nu'pʉjʉn icupʉjcapay Jesús. Jat we'n pa najawiga ni'c Dios iwatp oy, ni'c je' ijtʉu calma mit ampay jayajwat, igacastiga̱tcʉs̈u mʉgʉc por ayé mal iwatcaway.

²⁶Mit we'ney jinapay tiempu nas̈actujawigap ni'c je' iwatp oy mit iyacs̈icninʉmgʉs̈p jeme icupʉjcapay Jesús.

²⁷Jinap ca-oyap nanimʉjninʉmgʉjʉ, ni'c ca-oyap nas̈cumplia̱tca ayé ley. Natsʉ̱ngap oy mit Dios solo ni'c nacupʉjcap Jesús.

²⁸Jemni'c najawigap ni'c Dios ipʉctsowáj tu'c jayau te icupʉcp Jesús, mit caje' te puru ley icumplia̱tp.

²⁹Dios caje' solo pa judíujatu. Najawigap ni'c je' Dios pa jeme caje'jatwayey judíujat.

³⁰Ni'c itp tu'gu Dios mit je' iyacs̈icninʉmgʉs̈áj judíujat te icupʉjcap Jesús, mit we'ney te icupʉjcap Jesús jeme caje'jatway judíujat.

³¹¿Is̈jawiga te nacupʉjcap Jesús, nayajcap jalmanu Dios iley? Caje' we'n. Te nacupʉjcap Jesús, más najayaumaygáj Dios.