Read Sayula Popoluca Romanos 6 Bible Online

Romanos 6 - Sayula Popoluca bible

Romanos 6

¹¿Jinap ti nanʉmgáj? ¿Is̈jawiga nasiguia̱tcáj nas̈watca mal pa Dios nas̈moygáj más favor?

²Caje' we'n, ni'c natsʉ̱ngap as̈am o'guic pa nagajawátca mal, mit jinap ¿nat nasiguia̱tcawa'n nas̈watca mal?

³¿Ingajawigap ni'c nu'pʉjʉn ʉjtsat nanʉ'gutemijcat pa nas̈mutʉgʉygawa'n Cristu Jesús? Mit jinap natsʉ̱ngap as̈am o'guijcatway mit je'.

⁴Ni'c cuandu naninʉ'gutémgʉjʉj, natsʉ̱ngau as̈am ni'pijcatway mit Cristu ni'c na-o'jcau mit je'. Jat we'n pa nas̈aguepcawa'n nam vida as̈am Cristu i-ijtʉ nam vida ni'c Dios i-acjutucta̱c mit ipoder mam itsʉ̱nga á̱nimajat, mit jinap na-aguepcap nam vida pa nayo'yga yacs̈ic.

⁵Ni'c ʉjtsat namutʉgʉygau Cristu mit na-o'jcau as̈am je' i-o'jc, mit we'ney namutʉgʉygap je' pa nas̈aguepcawa'n nam vida as̈am je' i-íjtʉj nam vida cuandu ijutucta̱jc.

⁶Najawigap ni'c ʉjtsat natsʉ̱ngau as̈am crucifica̱tic mit Cristu, mit we'n icʉs̈ na-ampay vidajat. Mit jinap nagajawangap mal cosajat iyo'tpay najo̱jtat, mit nagajatsʉ̱ngap domina̱tic mit ma̱jlat.

⁷Ni'c jeme tsʉ̱nanupay o'guic, cajatsʉ̱nap domina̱tic mit ma̱jlat.

⁸Mit te na-o'jcau mit Cristu, natsʉ̱ngap seguru ni'c na-aguepcanup nam vida mit je'.

⁹Najawigap ni'c Cristu jutucta̱cway mam itsʉ̱nga á̱nimajat, mit jinap caja-oyap i-o'c. Mit jinap nejʉmay poder caja-oyap igui-ago'cp.

¹⁰Ni'c i-o'jc Cristu, je' o'c tu'mbagu mit ivencia̱t nu'pʉjʉn ma̱jlat. Mit jinap je' ijtʉp vida, mit tsʉ̱nap pa siempre mit Dios.

¹¹We'ney mijchat, pensá̱tca ni'c mitsʉ̱ngap as̈am o'guic pa pigajawatca mal, mit pensá̱tca-ey ni'c inaguepcap nam vida pa is̈servia̱tcajawa'n Dios. Inaguepcap nam vida ni'c inmutʉgʉygau Cristu Jesús el Señor.

¹²Cammoygawit laj ma̱jlat is̈domina̱tcáj, pa we'n ingajayaumaygáj ayé mal iyo'tpay injo̱jtat.

¹³Ne camni-entrega̱tcʉjʉ pa is̈watcawa'n mal, te inwatcap we'n injayaumaygáj mal cosajat. Más oy pi ni-entrega̱tcʉjʉ mit Dios ni'c cʉs̈way in-ampay vidajat mit inaguepcanup nam vida. Mit entregá̱tca nu'pʉjʉn incuerpujat pa is̈jayaumaygawa'n Dios, mit we'n inwatcáj cosa oyway.

¹⁴Migajatsʉ̱ngap domina̱tic mit ayé ma̱jlat ne is̈cajamanda̱tcap ayé ampay ley, po jinap Dios is̈manda̱tcap mit je' is̈moygap favor ni'c is̈wano'jcap.

¹⁵¿Jinap ti nawatcáj? ¿Is̈jawiga nawatcáj mal ni'c ayé ley nas̈cajamanda̱tcap mit Dios nas̈moygap favor? Caje' we'n.

¹⁶Mijchat injawigap ni'c te inservia̱tcajap tu'c jayau as̈am mozojat, to'ctʉgʉyic intsʉ̱ngawa'n mit injayaumaygáj injaycat. We'ney te mitsʉ̱ngap to'ctʉgʉyic pa is̈watcawa'n mal, mitogoygáj. Po te injayaumaygap Dios, miyo'ygáj yacs̈ic.

¹⁷Primeru mitsʉ̱ngau to'ctʉgʉyic mit ma̱jlat, po jinap nanʉ́mgaja Dios ni'ctiyu̱s̈ ni'c mijayaumaygap mit nu'pʉjʉn injo̱jtat, mit miyo'ygap yacs̈ic as̈am is̈ajque's̈cajau.

¹⁸Migajatsʉ̱ngap to'ctʉgʉyic mit ma̱jlat, po jinap inservia̱tcajap Dios mit miyo'ygap yacs̈ic.

¹⁹Tʉnʉmgʉs̈au ayé ejemplu pa pi entendia̱tca más oy. Ambanu mini-entrega̱tcʉjʉu pa is̈watcawa'n mal, mit cada s̈ʉjw inwatcau más mal. Jinap ni-entregá̱tcʉjʉ mit Dios pa is̈watcawa'n más oy, pa we'n miyo'ygáj más limpiu mit inservia̱tcajá̱j Dios.

²⁰Cuandu intsʉ̱́ngaj to'ctʉgʉyic mit ma̱jlat, ca-oyawu is̈serviá̱tcaja Dios.

²¹¿Ti cosa oyway impʉctsougau cuandu is̈wátcaj ayé mal cosajat? Jinap intuwinchu̱gagap ayé cosajat. Mit jeme iwatcapay ayé mal cosajat togoygáj.

²²Jinap migajatsʉ̱ngap to'ctʉgʉyic mit ma̱jlat, po inservia̱tcajap Dios. Mit is̈pichingajap más oy ni'c miyo'ygap limpiu pa is̈servia̱tcajawa'n Dios, mit cʉs̈wa'n je' is̈moygáj vida jeme cacʉs̈ámpay.

²³Jeme tsʉ̱napay to'ctʉgʉyic mit ma̱jlat togoyáj, ni'c wename tanáj tso'guic por lo que iwatway. Po Dios iregala̱táj vida cacʉs̈ámpay pa jeme imutʉgʉygapay Cristu Jesús el Señor.