Read Sayula Popoluca Romanos 7 Bible Online

Romanos 7 - Sayula Popoluca bible

Romanos 7

¹Hermanujat, tʉmucotscʉs̈p mijchat inicapcapay ley. Injawigap ni'c tu'c jayau itp ti iguijayaumaywa'n ley mientras tsʉ̱napnaj.

²Por ejemplu: Tu'c to's̈ay cʉ'pa'ticway igui-obliga̱tp ayé ley ma tsʉ̱na mit ina'u mientras cani-o'cp. Po i-o'cwa'n ina'u, ayé to's̈ay cajatsʉ̱náj obliga̱tic mit ayé ley pa itsʉ̱nawa'n mit ina'u.

³Jemni'c te ayé to's̈ay ipʉcp jatu'c jayau mit te tsʉ̱napnaj ina'u, inʉmgajáj ni'c chajyo'yp. Po te o'cp ina'u, cajatsʉ̱nap obliga̱tic mit ayé ley, mit oyap iguipʉc jatu'c jayau mit iganʉmgajáj ni'c chajyo'yp.

⁴Tʉnhermanujat, we'ney mijchat mitsʉ̱ngap as̈am o'guic mit ayé ley ija'yway Moisés ni'c inmutʉgʉygau Cristu jeme o'cway mit jeme jutucta̱cway mam itsʉ̱nga á̱nimajat, mit jinap inaguepcap nam vida mit je', mit we'n inwatcáj oy pa Dios ma tsʉ̱na oyninʉmic.

⁵Ni'c ámbanu cuandu nayo'ygaj as̈am iguiyo'jt najo̱jtat, nawangau mal cosajat, mit ayé ley nas̈actujawigau ni'c mal nawatcapay, po majawe'naj nawangau mal cosajat, mit ayé mal nas̈actogoygájate.

⁶Mit jinap nas̈cajadomina̱tcap ayé ley ni'c na-ampay vida tsʉ̱nap as̈am o'guic, mit jinap natsʉ̱ngap libre pa nas̈servia̱tcajawa'n Dios ni'c Espíritu Santu nas̈moygap nam vida, mit nas̈cajamanda̱tcap ayé ampay ley ja'yicway.

⁷¿Ti nanʉmgáj? ¿Is̈jawiga ayé ley nas̈actuwatcap mal? Caje' we'n. Ʉ̱ tʉngajawipate ni'c tʉnwatp mal maganʉm ayé ley ni'c tʉnwatp mal. Ʉ̱ tʉngajawipate te tʉnwa'náj jayje' maganʉm ayé ley: “Camwa'n jayje'.”

⁸Po ayé ley tʉs̈actujawiu ni'c tʉnwat mal, mit cʉs̈ tʉnwan nu'pʉjʉn mal. Ni'c mam iga-it ley, nagajawip te nawatp mal.

⁹Mit ʉ̱ ámbanu tʉnga-is̈capu ley, mit wejpu'n tʉnyʉm ni'c oy tʉtsʉ̱́naj. Po cuandu tʉs̈jawij lo que imanda̱tpay ayé ley, más tʉnwan mal cosajat, mit cʉs̈ tʉnimojyʉu cuenta ni'c tʉyo'yp mal mit tʉtogoyájate.

¹⁰Dios iyac ayé ley pa natsʉ̱ngawa'n oy, po tʉnimojyʉu cuenta ni'c ayé nije'yu ley tʉs̈actogoyájate.

¹¹Ni'c tʉnche'n ayé ley pa tʉpichinwa'n oy mit Dios, po ayé ley tʉs̈actujawiu ni'c tʉnwat más mal, mit jas̈ʉ̱n tʉtogojy.

¹²Mit limpiu ayé ley iyacway Dios. Mit ayé mandatu iyacway Dios, ayé limpiu, yacs̈ic mit oy.

¹³¿Is̈jawiga ayé ley jeme oyway tʉs̈actogoyáj? Caje' we'n. Po cuandu tʉs̈wajt mal, tʉpichin yacs̈icto̱uni'c pa tʉtogoywa'n ni'c tʉngajayaumayu ayé ley. Dios iyac ayé ley pa na-is̈cápca ayé ma̱jlat, mit najawigáj ni'c ma̱lo'c ayé ma̱jlat.

¹⁴Najawigap ni'c Dios iyac ayé ley, po ʉ̱ tʉjayau, mit tʉtsʉ̱nap to'ctʉgʉyic mit ayé ma̱jlat.

¹⁵Ni'c ʉ̱ tʉnga-entendia̱tp lo que tʉnwatpay. Tʉnwamp tʉs̈watwa'n cosa oyway po tʉngawatp. Mit tʉngawamp tʉs̈watwa'n cosa ma̱lway po ayé tʉnwatp.

¹⁶Mit te tʉnwatp ayé mal tʉngawampay, tʉnimojyʉp cuenta ni'c oy ayé ley.

¹⁷Mit caje' ʉ̱jyu tʉnwatp ayé mal tʉngawampay, po tʉs̈actuwatp mal ayé ma̱jlat jeme tsʉ̱napay tʉnjo̱tni'c.

¹⁸Tʉnjawip ni'c ʉ̱ ca-oyap tʉs̈wat oy ni'c itp puru mal tʉnjo̱tni'c. Ni'c tʉnwamp tʉs̈watwa'n oy po ca-oyap tʉs̈wat.

¹⁹Tʉngawatp ayé oy tʉnwampay, po tʉnwatp ayé mal tʉngawampay.

²⁰Mit te tʉnwatp lo que tʉngawampay, caje' ʉ̱jyu tʉnwatp ayé mal, po tʉs̈actuwatp mal ayé ma̱jlat jeme tsʉ̱napay tʉnjo̱tni'c.

²¹Mit we'n tʉs̈jatí̱c: Cuandu tʉnwamp tʉs̈watwa'n oy, ca-oyap tʉs̈wat ni'c tʉs̈atucp ayé mal jeme tsʉ̱napay tʉnjo̱tni'c.

²²Tʉnwano'jcap Dios iley mit nu'pʉʉn tʉnjo̱jt.

²³Po tʉn-e'p ni'c itp jatu'c ley ma̱lway mit ayé tʉs̈atucp, mit iwamp tʉs̈domina̱táj pa tʉgajayaumájya Dios iley. Ayé ley ma̱lway inʉmo'jcʉp ayé ma̱jlat jeme tsʉ̱napay tʉnjo̱tni'c, mit iwamp tʉs̈domina̱táj.

²⁴¡Pro̱wij de ʉ̱! Tʉs̈domina̱tp ayé ma̱jlat jeme tsʉ̱napay tʉnjo̱tni'c mit tʉs̈actogoyáj. ¿Pʉn oyáj tʉs̈libra̱tp?

²⁵Tʉnyʉjmap Dios ni'ctiyu̱s̈ ni'c el Señor Jesucristu tʉs̈libra̱t. Jemni'c tʉnservia̱jtap Dios mit nu'pʉjʉn tʉnjo̱jt mit je' tʉs̈manda̱tp, po ayé ma̱jlat iwampnaj tʉs̈domina̱táj.