Read Sayula Popoluca Romanos 8 Bible Online

Romanos 8 - Sayula Popoluca bible

Romanos 8

¹Mit jinap cjatsʉ̱ngap condena̱tic jeme imutʉgʉygaway Cristu Jesús. Je'jat igawatcap mal iyo'tpay ijo̱jtat po iwatcap lo que iwampay Espíritu Santu.

²Ni'c ayé Espíritu Santu jeme nas̈manda̱tcapay imoygʉs̈p vida jeme imutʉgʉygaway Cristu Jesús, mit je' nas̈libra̱tcap de ayé ma̱jlat nas̈domina̱tpay mit nas̈actogoypay.

³Ʉjtsat ca-oyap nas̈jayaumáygaja Dios iley mit jemni'c ayé ley ca-oyap nas̈salva̱tcap. Po Dios ijtʉp poder pa nas̈salva̱tcáj. Je' i-ajyu't iway en ayʉ̱́j mundu, mit je' jat jayau as̈am ʉjtsat. Je' min pa iguitso'cwa'n nama̱jlat, mit wename oyau iguivencia̱t ayé ma̱jlat iyo'tpay najo̱jtat.

⁴Je' iwat we'n pa ʉjtsat ma oya nas̈cumpliá̱tca lo que imanda̱tpay ley, ni'c nagajawatcap mal iyo'tpay najo̱jtat po nawatcap lo que iwampay Espíritu Santu.

⁵Ni'c jeme iwangapay ayé mal iyo'tpay ijo̱jtat, ipensa̱tí̱jcap aye mal. Mit jeme iwangapay lo que iwampay Espíritu Santu, ipensa̱tí̱jcap pa iguiwatcawa'n lo que iwampay Espíritu Santu.

⁶Ni'c jeme ipensa̱tí̱cpay ayé mal iyo'tpay ijo̱jt, togoyáj. Po jeme ipensa̱tí̱cpay pa iguiwatwa'n lo que Espíritu Santu iwampay, ayé jayau ijtʉ̱́j vida cacʉs̈ámpay mit ijtʉ̱́j paz ijo̱tni'c.

⁷Ni'c jeme ipensa̱tí̱cpay ayé mal iyo'tpay ijo̱jt, ayé Dios imutsuguin ni'c igajayaumajyap Dios iley, ne ca-oyap iguijayaumay.

⁸Mit jeme iwatcapay mal iyo'tpay ijo̱jtat, ca-oyap iguiwatca lo que dios iwampay.

⁹Po mijchat ingawatcap ayé mal i'tpay injo̱jtat po inwatcap lo que iwampay Espíritu Santu, ni'c Dios i-Espíritu tsʉ̱nap injo̱tni'jcat. Mit te tu'c jayau igamuyo'yp Cristu ijo̱tni'c, ayé caje' Cristu ijayau.

¹⁰Iyacs̈ta'cway Cristu tsʉ̱nap najo̱tni'jcat. Nacuerpu itp ti i-o'cwa'n ni'c nawatcau mal, po Espíritu Santu nas̈moygáj nam vida ni'c Dios nas̈yacs̈icninʉmgau.

¹¹Dios i-acjutucta̱c Cristu Jesús mam itsʉ̱nga á̱nimajat, mit Dios i-ajyu't Espíritu Santu pa itsʉ̱nawa'n najo̱tni'jcat. Mit ʉjtsat itp ti na-o'jcawa'n po Dios nas̈acjutucta̱jcáj as̈am igui-acjutucta̱jc Cristu Jesús, mit nas̈moygáj nam vida ni'c Dios i-Espíritu tsʉ̱nap najo̱tni'jcat.

¹²Hermanujat, jemni'c nagajatsʉ̱ngap domina̱tic pa nas̈watcawa'n ayé mal iyo'tpay najo̱jtat.

¹³Ni'c te nawatcap ayé mal iyo'tpay najo̱jtat, natogoygáj. Po como nas̈majyigap Espíritu Santu, naniju'ptángʉjʉ mit ayé mal iyo'tpay najo̱jtat mit na-aguepcáj vida jeme cacʉs̈ámpay.

¹⁴Tenas̈wejnu'pcajap Dios i-Espíritu, najawigap ni'c ʉjtsat Dios nas̈wajyat.

¹⁵Ʉjtsat napʉctsougau Espíritu Santu, po je' nas̈camanda̱tcap as̈am tu'c mozo. Jinap nagajapʉ̱tcap as̈am ámbanu napʉ̱́tcaj mit ayé ley. Je' nas̈actujawigap ni'c ʉjtsat Dios nas̈wajyat, mit jemni'c nas̈nʉ́mgaja Dios: “Majyigac Padre.”

¹⁶Ayé nije'yu Espíritu Santu tsʉ̱nap najo̱tni'jcat, mit nas̈actujawigap ni'c ʉjtsat Dios nas̈wajyat.

¹⁷Mit te ʉjtsat Dios nas̈wajyat, we'ney napʉctsougáj nu'pʉjʉn iprometia̱tway Dios. Mit napʉctsougáj jeme Cristu ipʉctsowámpay te natunas̈cap mit je', mit we'n natsʉ̱ngáj mit je' tsajpni'c mam i-oymanagui.

¹⁸Tʉpensa̱tp ni'c caje' neti lo que natunas̈capay en ayʉ̱́j mundu, ni'c natsʉ̱ngáj más oy mit Dios tsajpni'c, mit je' nas̈actu-e'pcáj nat i-oymanagui.

¹⁹Mit nu'pʉjʉn cosa iwatway Dios en ayʉ̱́j mundu i-atsʉ̱ngap hasta Dios iwajyat itsʉ̱ngawa'n oymanac mit Dios.

²⁰Ni'c nu'pʉjʉn cosa waticway capichinu oy. Mit ayé caje' je'yu niwajtʉu, po Dios iwat we'n pa ma atsʉ̱nga hasta ipichinwa'n oy nu'pʉjʉn.

²¹Ni'c jinap nu'pʉjʉn cosa iwatway Dios nʉmic pa itogoygawa'n, po Dios inamwatáj nu'pʉjʉn mit cajatogoygáj. Jatáj we'n en ayé s̈ʉjw cuandu Dios iwajyat itsʉ̱ngawa'n mit Dios mam je' itsʉ̱na mʉjninʉmic.

²²Najawigap ni'c nu'pʉjʉn cosa iwatway Dios catsʉ̱ngap oy hasta jinap. Itunas̈cap as̈am iguitunas̈ tu'c to's̈ay ta̱go'jcʉpay.

²³Mit ʉjtsat natunas̈capey. Dios nas̈moygau Espíritu Santu pa najawiga ni'c más natsʉ̱ngáj oy tsajpni'c. Jinap natunas̈cap ni'c na-atsʉ̱ngap pa Dios nas̈wayjatcáj tsajpni'c, mit wejpu'n nas̈moygáj nam cuerpujat mit nagajatunas̈cáj.

²⁴Dios nas̈salva̱tcau mit jinap na-atsʉ̱ngap jeme jatámpay. Po te na-aguepcanup lo que na-atsʉ̱ngapay, nagaja-atsʉ̱ngap neti. Ni'c lo que tu'c jayau i-aguepnupay, igaja-atsʉ̱nap neti.

²⁵Po te na-atsʉ̱ngap lo que naganipʉctsougapay, na-atsʉ̱ngap mit may calma.

²⁶We'ney ayé Espíritu Santu nas̈majyigap cuandu nas̈ca-aguépca maj. Ni'c nagajawigap ti nayo'tcajáj Dios. Napensa̱to'jcap pa nas̈yo'tcajawa'n, po ayé Espíritu Santu nas̈majyigap pa na-ora̱tcawa'n, ni'c je' iyo'jtap Dios pa ʉjtsat.

²⁷Dios ijawip nat ipensa̱t cada jayau ijo̱tni'c, mit ijawipey ti ipensa̱tpay ayé Espíritu, ni'c ayé Espíritu iyo'jtap pa Dios ijayajwat, mit iyo'tp lo que Dios iwampay.

²⁸Najawigap ni'c nu'pʉjʉn nas̈jatcapay, Dios nas̈acpichingap oy ni'c je' nawangap. Ni'c Dios nas̈ya̱s̈cau pa nawatca lo que je' iwampay.

²⁹Ni'c Dios nas̈-is̈capcau desde ámbanu, mit wejpu'n inʉm ni'c najatcáj as̈am iway Jesucristu, pa we'n Jesucristu tanáj más mʉjninʉmic mam igui-e'pcawa'n nu'pʉjʉn hermanujat.

³⁰Dios inʉm ámbanu ni'c najatcáj as̈am Jesucristu, mit cʉs̈ nas̈ya̱s̈cau pa naserviá̱tcaja je', mit nas̈yacs̈icninʉmgau. Mit cʉs̈wa'n nas̈moygáj laj natsʉ̱ngawa'n mit je' tsajpni'c mam i-oymanagui.

³¹Najawigap ni'c Dios iwatp nu'pʉjʉn pa ʉjtsat, mit jinap ¿ti nanʉmgáj? Te Dios tsʉ̱nap mit ʉjtsat, nepʉn nagapʉ̱tcáj.

³²Dios iga-ayo̱wis̈u iway po i-entrega̱t ma o'c pa ʉjtsat nanu'pʉjʉjnat. Dios iyac Jesucristu as̈am tu'c regalu pájtsat, mit jinap nas̈moygáj nu'pʉjʉn cosajat pa ʉjtsat.

³³Dios nas̈cupiugau, mit jinap nepʉn ca-oyap nas̈acusa̱tcap ni'c Dios nas̈yacs̈icninʉmgau.

³⁴Nepʉn ca-oyap nas̈culpa̱tcap ni'c Cristu ayé jeme o'cway pa nama̱jlat, mit je' jutucta̱c, mit tsʉ̱nap mʉjninʉmic Dios i-oyimaycʉ'ni'c, mit jinap je' iyo'jtap Dios pa ʉjtsat.

³⁵Natsʉ̱ngap seguru ni'c nepʉn nas̈cachi'tcáj Cristu icʉ'jugum ni'c je' siempre nas̈wangap. Te natunas̈cap, te na-aguepcap pruebajat, te nas̈po'ctangap, te natsʉ̱ngap sin cay, te naga-aguepcap jamuc, te natsʉ̱ngap en peligru, te nas̈ago'jcap. Maja ijatwa'naj we'n, po siempre natsʉ̱ngap mit Cristu mit je' nas̈wangap.

³⁶As̈am itsʉ̱na ja'yic Dios ilibruni'c: Siempre tʉtsʉ̱ngap en peligru pa tʉ-o'jcawa'n ni'c tʉwangap mi̱. Tʉs̈-e'pcap as̈am borregujat jeme i-ago'jcámpay.

³⁷Po maja ijatwa'naj nu'pʉjʉn ayʉ̱́j cosajat, más navencia̱tcáj ni'c Cristu nas̈wangap.

³⁸Jemni'c tʉtsʉ̱nap seguru ni'c nepʉn nas̈cachi'tcáj Dios icʉ'jugum ni'c je' siempre nas̈wangap. Te na-o'jcap o te natsʉ̱ngap, Dios siempre nas̈actangap. Nejʉmay ángel nas̈cachi'tcáj Dios icʉ'jugum, ne jeme más manda̱tcapay. Jeme nas̈jatcapay jinap mit jeme nas̈mingajámpay, ayé nagapʉ̱tcáj.

³⁹Jeme tsʉ̱ngapay tsajpni'c ne jeme tsʉ̱ngapay en ayʉ̱́j mundu, nejʉmay cosa iwatway Dios ca-oyap nas̈chi'tcap Dios icʉ'jugum ni'c je' nas̈wangap, ni'c namutʉgʉygau Cristu Jesús el Señor.