Read Sayula Popoluca 1 Corintios 11 Bible Online

1 Corintios 11 - Sayula Popoluca bible

1 Corintios 11

¹Watca as̈am ʉ̱ tʉs̈wat, ni'c ʉ̱ tʉnwatpey as̈am Cristu iguiwajt.

²Hermanujat, tʉ-oyninʉmgʉs̈p ni'c siempre is̈nijawigap, mit inwatcapnaj lo que tʉ-ajque's̈cʉs̈away.

³Po tʉnwamp pi jawiga ni'c Cristu ayé imanda̱tpay nu'pʉjʉn jayajwat, mit tu'c jayau más manda̱tp que tu'c to's̈ay, mit Dios imanda̱tp Cristu.

⁴Cada jayau jeme ora̱tpay mit jeme i-ajque's̈pay lo que inʉmpay Dios, te icutucp icopac, ayé tu'c winchu̱jc pa je'.

⁵We'ney cada to's̈ay jeme ora̱tpay o i-ajque's̈apay lo que inʉmpay Dios, te igacutucp icopac, ayé tu'c winchu̱jc pa je'. Ni'c ni-as̈amu ique's̈wa'n mal te icupe̱p nu'pʉjʉn icuajy.

⁶Ni'c te tu'c to's̈ay canigutujcʉp, ma nigupe̱jʉ-ey. Po te tu'c to's̈ay winchu̱gap inigupe̱jʉwa'n o iguipe̱tucwa'n nu'pʉjʉn icuajy, más oy ma nigutujcʉ.

⁷Po tu'c jayau magacutuc icopac ni'c je' iguiwat Dios, mit je' oyninʉmic ni'c iservia̱jtap Dios, po tu'c to's̈ay oyninʉmic ni'c iservia̱jtap jayau.

⁸Ni'c Dios iwajtʉ'c jayau, mit cʉs̈ nije'yu jayau ituwat to's̈ay.

⁹Mit we'ney Dios igawatu jayau pa iguiservia̱jtawa'n to's̈ay, iwat to's̈ay pa iguiservia̱jtawa'n jayau.

¹⁰Jemni'c tu'c to's̈ay jeme jayaumaypay ma cutuc icopac. Ma watca we'n as̈am ángejlat ijayaumayga.

¹¹Po jeme icupʉjcapay el Señor ma jawiga ni'c tu'c jayau ca-oyap itsʉ̱na sin to's̈ay, mit tu'c to's̈ay ca-oyap itsʉ̱na sin jayau.

¹²Ni'c as̈am to's̈ay chu̱chiu por jayau, jinap tu'c jayau itp por to's̈ay, po Dios iwatp nu'pʉjʉn.

¹³¿Nat is̈jawiga mijchat? ¿Oy tu'c to's̈ay igui-ora̱jtawa'n Dios mit cacutuguic icopac?

¹⁴Nu'pʉjʉn ijawigap ni'c tu'c winchu̱jc te tu'c jayau i-acye'cp yagats icuajy.

¹⁵Po tu'c to's̈ay oyque's̈p te i-acye'cp icuajy, ni'c ijtʉp icuajy pa iguicutucwa'n icopac.

¹⁶Po te jatu'c jayau iwamp iguidiscutia̱twa'n ayʉ̱́j asuntu, tʉnga-aguepcap jatu'c costumbre, ne Dios icupʉcpajyat.

¹⁷Mit jinap tʉja'ygʉs̈ap ni'c ingawatcap oy. Cuandu inyi-apʉcmújcʉjʉ, migajatcap más oy, po mijatcap más pior.

¹⁸Primeru tʉnyʉjmʉ'cp ayʉ̱́j: Cuandu inyi-apʉcmújcʉjʉ pa inadora̱tcawa'n, tʉnmarap ni'c inaguepcap división, mit tʉs̈jawi iyacs̈ta'cway ayé.

¹⁹Ni'c itp i-itwa'n división mam intsʉ̱nga, pa we'n na-is̈capáj jeme icupʉjcapay iyacs̈ta'cway.

²⁰Cuandu inyi-apʉcmújcʉjʉ, ingawatcap ayé cena as̈am el Señor iguimanda̱t,

²¹ni'c cada jayau u̱cma̱p itu'gumu, mit jatu'c jayau cayo'jcʉp, mit jatu'c mu̱jcʉp.

²²¡Ti! ¿Inga-aguepcap intʉjcat mam incaygawa'n mit in-u̱jcawa'n? Mijchat inyajcajap mal Dios itemplu, mit inacwinchu̱cta̱jcap jeme ca-itcʉjʉpay neti. ¿Ti tʉnʉmgʉs̈áj? ¿Is̈jawiga tʉ-oyninʉmgʉs̈áj? Ʉ̱ ca-oyap tʉ-oyninʉmgʉs̈ en ayʉ̱́j asuntu.

²³Ni'c el Señor tʉs̈moy lo que tʉ-ajque's̈cʉs̈away, ni'c en ayé tsu' cuandu iguito'ctʉ́gʉygaj el Señor Jesús, ipʉc tu'c ma̱s̈anʉ̱n,

²⁴mit iguinʉ́jmaj Dios ni'ctiyu̱s̈, i-emgada̱c mit inʉm: “Pʉctsóuga mit cáyga ni'c ayʉ̱́j ma̱s̈anʉ̱n as̈am tʉncuerpu, mit ayé tʉnyacp pa mijchat. Watí̱jca ayʉ̱́j pa pi is̈nijawigac ʉ̱.”

²⁵Icʉ́s̈caj u̱cma̱pay, ipʉguey tu'c vasu mit inʉm: “Lo que ijtʉpay ayʉ̱́j vasu, ayé as̈am tʉnyipin, ni'c tʉntuwat tu'c nam acuerdu. Watí̱jca ayʉ̱́j cada is̈tu-u̱jcawa'n pa pi is̈nijawigac ʉ̱.”

²⁶Ni'c cada vez is̈caygawa'n ayé ma̱s̈anʉ̱n, mit is̈tu-u̱jcawa'n ayé vasu, inactujawigap jayajwat ni'c je' o'c pa iguitso'cwa'n nama̱jlat. Watí̱jca ayé hasta imi'nwa'n el Señor.

²⁷Pʉmba'tu jeme icayámpay ayé ma̱s̈anʉ̱n mit itu-u'gámpay el Señor ivasu, te igawatp as̈am imerecia̱t, tsʉ̱náj culpa̱tic ni'c iyajcau mal el Señor icuerpu mit inipin.

²⁸Jemni'c tu'c jayau ma e'jpʉ'c te yo'yp oy, mit cʉs̈wa'n ma cáyama ayé ma̱s̈anʉ̱n mit ma tu-u'gama ayé vasu.

²⁹Ni'c jeme caypay mit jeme u̱cpay, te igawatp as̈am imerecia̱t, tsʉ̱náj castiga̱tic ni'c cayp mit u̱cp wename, ni'c igapensa̱tp ni'c ayé as̈am el Señor icuerpu.

³⁰Jemni'c mayo'c mijchat mitu'nijat mit inga-aguepcap maj, mit mayo'ganu i-o'jca.

³¹Ni'c te na-e'jpʉ'jcap te nayo'ygap oy, Dios nas̈cacastiga̱tcáj.

³²Po cuandu nas̈castiga̱tcap Dios, ayé ni'c nas̈acyacs̈cap pa nagatsʉ̱nga condena̱tic as̈am jayajwat ayʉ̱́j mundujway.

³³Jemni'c hermanujat, cuandu inyi-apʉcmújcʉjʉ pa incaygawa'n, ni-atsʉ̱́ngʉjʉ.

³⁴Te tu'c jayau cayo'jcʉp, ma cay itʉcm, pa we'n Dios is̈cacastiga̱tcáj cuandu inyi-apʉcmújcʉjʉ. Mit japu̱t asuntujat tʉnʉmgʉs̈áj cuandu tʉmi'nwa'n.