Read Sayula Popoluca 1 Corintios 13 Bible Online

1 Corintios 13 - Sayula Popoluca bible

1 Corintios 13

¹Te ʉ̱ tʉcotsp as̈am jayajwat icotsca en jatu'c ajw o te tʉcotsp as̈am ángejlat, po te tʉngawamp tʉnhermanu, tʉjatáj as̈am tu'c pus̈an caya̱s̈pay oymanac o as̈am tu'c platillu i-acnipas̈cʉjʉpay mit caya̱s̈p oy.

²Mit te tʉnajque's̈p lo que Dios inʉmpay, te Dios tʉs̈actujawip nu'pʉjʉn i-aguepay cuyu'tsic, te tʉnis̈cap nu'pʉjʉn, te tʉcupʉcp mʉgʉc hasta copajcat tʉnactutigatscʉs̈p ilajat, po te tʉngawamp tʉnhermanu, tʉgaje' neti.

³Mit te tʉnacpas̈amp nu'pʉjʉn tʉnaguepay pa tʉs̈moygʉs̈wa'n ma cayga pro̱wijat, mit te tʉnyacp tʉncuerpu ma no'jca, po te tʉngawamp nepʉn, neti tʉs̈caservia̱jtap.

⁴Jeme iwampay ihermanu, ijtʉ̱́j calma mit jayawa'náj. Jeme iwampay ihermanu iga-anáj jeme ijtʉpay. Jeme iwampay ihermanu canimʉjninʉjmʉ̱́j.

⁵Iga-ofendia̱táj nepʉn, igache'náj lo que je'yu iwampay, ca-awa'niyáj, igapensa̱táj igui-acpitucwa'n mal.

⁶Caji'gáj ijo̱jt cuandu jayajwat iguiwatcawa'n mal, po ji'gáj ijo̱jt iguiwatcawa'n lo que iyacs̈ta'cway.

⁷Iganʉmáj neti te itunas̈p, nu'pʉjʉn icupʉgáj, nu'pʉjʉn i-atsʉ̱náj, imajmo'áj nu'pʉjʉn mit calma.

⁸Jeme iwampay ihermanu nunca catogoyáj, po lo que inʉmgaway profetajat, jeme cotscapay en jatu'c ajwat mit jeme jinap i-is̈capcapay, nu'pʉjʉn aye'jat cʉs̈cáj.

⁹Ni'c naga-is̈capcap nu'pʉjʉn, mit naga-ajque's̈cap nu'tsic lo que inʉmpay Dios,

¹⁰po itáj s̈ʉjw cuandu Dios nas̈ajque's̈cajáj nu'tsic, mit wenajpu'n cʉs̈áj jeme catsʉ̱napay nu'tsic.

¹¹Cuandu ʉ̱ tʉtiticwáynaj, tʉcots, tʉpensa̱t mit tʉn-entendia̱t as̈am tu'c qui'chwáy. Po cuandu tʉjajt jayau, tʉncuyaguiu as̈am qui'chwájat ipensa̱tca.

¹²Jinap na-e'p as̈am en tu'c is̈tic caje'way claru, po wenajpu'n Dios nas̈ac-e'pcáj claru. Jinap tʉnga-is̈cap nu'pʉjʉn, po wenajpu'n tʉnis̈capáj nu'pʉjʉn as̈am jinap Dios tʉs̈-is̈cap.

¹³Mit jinap tanáj tu̱gup cosa oyway: Nacupʉcp, na-atsʉ̱nap jeme mi'námpay mit nawamp nahermanu. Po de ayʉ̱́j tu̱gup cosa, más oy nas̈wa'nwa'n nahermanu.