Read Sayula Popoluca 1 Corintios 16 Bible Online

1 Corintios 16 - Sayula Popoluca bible

1 Corintios 16

¹Jinap tʉnʉmgʉs̈áj nat is̈yajcawa'n ofrenda pa Dios ijayajwat. Inwatcáj ayé as̈am tʉs̈manda̱tcʉs̈ cupʉcpajyat Galaciajway.

²Cada primer s̈ʉjw de s̈ama̱na cada jayau mam mijchat ma yac tu'c parte pa i-ofrenda de lo que i-actsʉ̱naway, pa we'n igapiugáj ofrenda wenajpu'n tʉcojawa'n.

³Cuandu ʉ̱ tʉcojawa'n, tʉnajyu'táj Jerusalén pʉjnat incupiugámpay pa ma munʉs̈ca ofrenda pa hermanujat tsʉ̱ngapay jem. Mit tʉnmoygʉs̈áj tu'c carta ma iguipʉctsougac jem.

⁴Mit te oyapey tʉnʉcs̈wa'n, je'jat nʉs̈cáj mit ʉ̱.

⁵Mit tʉnʉs̈áj mam mijchat cuandu tʉnas̈wa'n Macedonia, ni'c itp ti tʉnas̈ʉ'cwa'n Macedonia.

⁶Mit oyáj tʉtan mit mijchat pa jem tʉs̈nas̈wa'n tiempu de payic, mit cʉs̈wa'n mijchat minʉs̈cáj is̈yacta̱jcap mam tʉnʉs̈wa'n.

⁷Ni'c tʉngawamp tʉnas̈wa'n pe'bet mam mijchat po tʉnwamp tʉtsʉ̱nawa'n jec mit mijchat te el Señor iwamp.

⁸Po tʉtsʉ̱najʉ'gáj nʉ'jcopac Efeso hasta inas̈wa'n ayé ma̱s̈ʉjw Pentecostés.

⁹Ni'c tʉnaguep tu'c yos̈ mʉjway pa el Señor, mit tʉs̈jawi ni'c oypichináj, po itp mayo'c mutsuguijnat iwangapay tʉs̈atujcáj.

¹⁰Mit te coyp Timoteo, májyiga ma tsʉ̱na contentu mit mijchat, ni'c je' iwatpey yos̈ pa el Señor nije'yu tʉnwatpay ʉ̱.

¹¹Jemni'c camyajca menus je', po nʉs̈ yacta̱jca oymanac pa ma mi'n mam ʉ̱, ni'c je' tʉnatsʉ̱nap mit we'ney japu̱t hermanujat imuyo'ygʉs̈pay.

¹²Hermanu Apolos tʉnjomiu ma nʉs̈ mit hermanujat mam mijchat, po hasta jjinap nes̈ʉ̱n igawamp nʉs̈, po nʉs̈áj i-oyawa'n.

¹³Tsʉ̱nga listu, mutánga mʉgʉc lo que incupʉjcapay, niportá̱tcʉjʉ valiente mit venciá̱tca nu'pʉjʉn.

¹⁴Nu'pʉjʉn inwátcapay, watca ni'c miniwangʉjʉp.

¹⁵Hermanujat, injawigap ni'c Estéfanas itʉcm tsʉ̱ngapay cupʉjcʉ'jcau de nu'pʉjʉn Acayajatway, mit je'jat tsʉ̱ngap dispuestu iguimajyigawa'n Dios ijayajwat.

¹⁶Tʉnʉmgʉs̈ap pi respeta̱tca jayajwat as̈am je'jat, mit we'ney nu'pʉjʉn imajyigapay mit jeme yos̈watcapay pa el Señor.

¹⁷Ji'cp tʉnjo̱jt imíngaj Estéfanas, Fortunato mit Acaico ni'c mijchat migatsʉ̱ngawu yam mit ca-oyawu is̈majyigap, po ayé jayajwat tʉs̈majyigau por mijchat.

¹⁸Ni'c tʉs̈acji'jcajau tʉnjo̱jt mit je'jat is̈acji'jcajawey injo̱jtat. Respetá̱tca jayajwat as̈am je'jat.

¹⁹Is̈saluda̱tcap cupʉcpajyat Asiajatway. Is̈saluda̱tcapey Aquila mit Priscila mit we'ney cupʉcpajyat jeme ni-apʉcmujcʉjʉpay itʉcmat. Is̈saluda̱tcap ni'c je'jat icupʉjcapey el Señor.

²⁰Is̈saluda̱tcap nu'pʉjʉn hermanujat. Nisaludá̱tcʉjʉ minu'pʉjʉjnat mit tu'c ame'tamuc ni'c miniwangʉjʉp.

²¹Ʉ̱ Pablo tʉnja'yp ayʉ̱́j saludu.

²²Jeme igawampay el Señor Jesucristu ma tsʉ̱na maldiciona̱tic. Mi'náj el Señor Jesucristu.

²³El Señor Jesucristu pi is̈moygac favor minu'pʉjʉjnat.

²⁴Tʉwangʉs̈p nu'pʉjʉn mijchat ni'c namutʉgʉygau Cristu Jesús. Yam icʉs̈.