Read Sayula Popoluca 1 Corintios 5 Bible Online

1 Corintios 5 - Sayula Popoluca bible

1 Corintios 5

¹Iyacs̈ta'cway inʉmgap ni'c chajyo'ygap mam intsʉ̱nga, po chajyo'ygap más que jayajwat cacupʉjcapay, ni'c hasta tu'c jayau i-aguejpap ite̱t ito's̈ay.

²Po majawe'naj, mijchat mini-oyninʉ́mgʉjʉp, más oyate ma tu'nga injo̱jtat. Más oy pi acpichinga ayé jayau jeme iwatway wename.

³Iyacs̈ta'cway tʉgatsʉ̱nap mit mijchat, po tʉnjawip nat intsʉ̱nga, mit casi tʉtsʉ̱napey mit mijchat. Mit como tʉtsʉ̱nap mit mijchat, tʉnjuzga̱tway jeme iwatway wename.

⁴Tʉnwamp pi watca yename: Ni-apʉcmújcʉjʉ mit yo'tcaja el Señor Jesucristu ma is̈majyigac, mit casi ʉ̱ tʉtsʉ̱námpey mit mijchat, mit el Señor Jesucristu ipoder tsʉ̱náj mit mijchat.

⁵Ayé jayau ma tsʉ̱na entrega̱tic Awayagatsna' icʉ'jugum pa ma tunas̈ mʉgʉc pa ma cuyagui ima̱lway to̱u, pa we'n i-espíritu oyáj inisalva̱jtʉ en ayé s̈ʉjw ijuzga̱twa'n el Señor Jesús.

⁶Ca-oy inyi-oyninʉmgʉjʉ. ¿Ingajawigap ni'c s̈ʉ̱n levadura i-actimamp nu'pʉjʉn harina-cʉ't?

⁷Limpiá̱tca ayé ampay levadura pa pi jatca limpiu. Incupʉjcanup Cristu, mit mijchat as̈am ma̱s̈anʉ̱n ca-ijtʉpay levadura jeme icaygapay pascuani'c. Ni'c Cristu as̈am tu'c borreguwáy jeme i-ago'jcaway pascuani'c pa nas̈chi'tcajáj nama̱jlat.

⁸Jemni'c nagatsóuga ayé ma̱s̈ʉjw pascua mit ampay levadura, ni'c ayé levadura imu-e'p puru ma̱jlat, po natsóuga mit ma̱s̈anʉ̱n sin levadura ni'c ayé imu-e'p jeme oyway mit jeme iyacs̈ta'cway.

⁹Tʉja'ygʉs̈away en tu'c noc pigamunipʉjcʉjʉ jeme chajyo'ygapay.

¹⁰Po tʉganʉmgʉs̈ap pi niju'ptangʉjʉ de nu'pʉjʉn maljayajwat ayʉ̱́j mundujway, jeme chajyo'ygapay, tumi̱nwampayna'jat, nu'mpajyat, mit jeme i-adora̱tcapay tiyu̱s̈at. Te tʉnʉmgʉs̈apate pigamunipʉjcʉjʉ je'jat, itpate ti impichingawa'n en ayʉ̱́j mundu mijchat micupʉjcapay.

¹¹Po tʉja'ygʉs̈away cammunipʉjcʉjʉ tu'c jayau jeme inʉmpay ni'c je' hermanu mit te chajyo'yp, te tumi̱nwamp, te i-adora̱tp tiyu̱s̈, te tucotsp, te mu'gajayau o te nu'mpay. Mit wename'jatway ne cammucaygawit.

¹²Ni'c ¿pa chan tʉs̈juzga̱twa'n jeme canicupʉjcapay? Po mijchat juzgá̱tca jeme cupʉjcapay.

¹³Ni'c Dios icondena̱tcʉs̈áj jeme cacupʉjcapay. Jinap acpíchinga ayé maljayau mam intsʉ̱nga.