Read Sayula Popoluca 1 Corintios 8 Bible Online

1 Corintios 8 - Sayula Popoluca bible

1 Corintios 8

¹Jinap tʉpo'ngʉs̈áj te oy nas̈caywa'n cayan icotscajapay tiyu̱s̈at. Najawigap ni'c na-is̈capcap ayʉ̱́j asuntu. Jeme i-is̈capay may nimʉjninʉjmʉp, po te nawamp nahermanu, más nawajtáj oy.

²Te tambʉn inʉmp ni'c i-is̈cap, ayé ni'c igani-is̈cap neti as̈am imerecia̱t igui-is̈capwa'n.

³Mit te tu'c jayau iwamp Dios, Dios igui-e'páj ayé jayau as̈am iway.

⁴Jinap tʉ-actujawigʉs̈p de ayé cayan icotscajapay tiyu̱s̈at. Najawigap ni'c tu'c tiyu̱s̈ caje' neti en ayʉ̱́j mundu, ni'c tu'gu Dios i-it mit ca-itp más.

⁵Iyacs̈ta'cway tsajpni'c mit na̱s̈ni'c itp mayo'c cosajat inʉmgajapay ni'c diosat. Te wename, mayo'c i-itwa'n diosat jeme manda̱tcapay.

⁶Po ʉjtsat na-aguepcap tu'gu Dios Nate̱jat jeme iwatway nu'pʉjʉn cosa, mit ʉjtsat natsʉ̱ngap pa je'. Mit itpey tu'c Señor Jesucristu mit Dios itumuwat je' nu'pʉjʉn cosajat, mit je' nas̈moygap vida.

⁷Po caje' nu'pʉjʉn jayajwat i-is̈capcap wename. Ni'c cʉjtu'c hasta jinap imuyujcaway tiyu̱s̈at, mit icaygapnaj ayé cayan as̈am icotscajapay tiyu̱s̈at, mit jeme cacupʉjcapay mʉgʉc, ipensa̱tcap ni'c nijingʉjʉp mit ma̱jlat.

⁸Dios nas̈capʉctsougap por lo que nacaygapay. Ni'c te nacaygap, nagajatcáj más oy, mit te nagacaygap, ni-as̈amu.

⁹Mijchat oyap is̈watca nu'pʉjʉn cosa, po nicuidá̱tcʉjʉ, camactuwatca mal jeme canicupʉjcapay mʉgʉc.

¹⁰Mijchat injawigap ni'c oy jʉmaygapa'tu cayan, po te is̈-e'pcap tu'c hermanu cacupʉcpay mʉgʉc ni'c mits-ngap me̱s̈ani'c en tu'c lugar mam igui-adora̱tca tiyu̱s̈at, je' iwa'námpey iguicaywa'n jeme icotscajaway tiyu̱s̈at.

¹¹Mijchat inis̈capcap jeme oyway, po inactuwatcau mal ayé hermanu canicupʉcpay mʉgʉc, mit Cristu o'c pa je'.

¹²Inwatcau mal ni'c inwatcajau we'n inhermanujat. Inactuwatcau mal ayé hermanu cacupʉcpay mʉgʉc, mit we'ney inwatcau mal mam Cristu is̈-e'pcap.

¹³Jemni'c te tʉnactuwatp mal tʉnhermanu ni'c tʉncayp ayé cayan icotscajaway tiyu̱s̈at, nunca tʉngajacayáj ayé cayan magawat mal tʉnhermanu.