Read Sayula Popoluca 1 Corintios 9 Bible Online

1 Corintios 9 - Sayula Popoluca bible

1 Corintios 9

¹Ʉ̱ tʉ-apóstol ni'c Dios tʉs̈ajyu't, mit tʉnaguepey nu'pʉjʉn derechu ni'c tʉn-is̈ el Señor Jesús. Ʉ̱ tʉyos̈wat pa tʉ-actugupʉjcʉs̈wa'n el Señor.

²Te japu̱jtat inʉmgap ni'c tʉgaje' apóstol po mijchat injawigap ni'c tʉjemé. Oyap is̈jawiga ni'c tʉ-apóstol ni'c tʉ-actugupʉjcʉs̈ el Señor.

³Yename tʉs̈po'ngʉs̈wa'n jeme tʉs̈acusa̱tcapay.

⁴Ʉjtsat tʉnaguepcapey derechu tʉs̈pʉctsougawa'n nʉ' mit cayan tʉs̈moygapay.

⁵Ʉjtsat tʉnaguepcapate-ey derechu tʉs̈muyo'ygawa'n tʉnto's̈ajyat jeme cupʉjcapay as̈am iguiwatca el Señor Jesús ije̱wajyat, mit Pedro mit we'ney japu̱t apóstojlat.

⁶Mijchat impensa̱tcap ni'c solo ʉ̱ mit Bernabé tʉtsʉ̱ngap obliga̱tic pa tʉyos̈watcawa'n.

⁷¿Is̈jawiga tu'c soldaj je'yu nimantenia̱jtʉp icuentani'c? ¿Pʉn ini̱p tu'c uvajuc mit igato'jap itʉjm? ¿Pʉn icuida̱tp pa̱gas̈juc mit iga-u̱jcap ileche iyacpay?

⁸¿Is̈jawiga ʉ̱jyu tʉnyʉmp ayʉ̱́j? We'ney iguinʉm Moisés iley.

⁹Ni'c ja'yic itsʉ̱na ileyni'c: “Ingacojmáj pusa̱t ayé buey jeme na-actute'ní̱jcapay trigu, po moyga laj ma cay s̈ʉ̱n.” ¿Is̈jawiga Dios icuida̱tcʉs̈p buejyatu?

¹⁰Dios inʉm wename pa ʉjtsat natsʉ̱nga oy, mit jemni'c itsʉ̱na ja'yic. Ni'c ara̱tpay ijtʉp ti i-atsʉ̱napay. Mit jeme iwopay trigu i-atsʉ̱nap iguipʉctsowa'n trigu.

¹¹Ʉjtsat tʉ-ajque's̈cajau Dios ipalabra pa pi tsʉ̱nga oy injo̱tni'jcat. ¿Is̈jawiga ca-oyáj is̈moygap lo que tʉnyesitá̱tcapay?

¹²Te inmoygap japu̱jtat lo que inaguepcapay, ʉjtsat tʉnaguepcap más derechu. Po ʉjtsat tʉngani-aprovecha̱tcap ayʉ̱́j derechu, siempre tʉnimajmoygʉjʉp pa magatentan Cristu i-oyway noticia.

¹³¿Ingajawigap ni'c jeme yos̈watcapay templuni'c, itucaygap jeme itpay templuni'c? Ni'c jeme majyigapay mam isacrifica̱tca, icaygap ayé aníma̱jtat icotscajapay Dios.

¹⁴Wename-ey manda̱t el Señor ni'c jeme i-ajque's̈pay oyway noticia, ijtʉp derechu iguitucaywa'n ni'c i-ajque's̈p ayé oyway noticia.

¹⁵Po nes̈ʉ̱n tʉnga-aprovecha̱tu tʉnderechu, ne tʉngaja'yp ayʉ̱́j noc pa is̈watcajáj we'n. Po más oy tʉ-o'c que is̈nʉmgawa'n ni'c tʉcayp por mijchat.

¹⁶Ni'c te tʉmpredica̱tp oyway noticia ca-oyap tʉnimʉjninʉjmʉ ni'c itp ti tʉs̈watwa'n wename. Mit ¡pro̱wij de ʉ̱ te tʉnganʉmdacyo'yp oyway noticia!

¹⁷Ni'c te tʉnwatp ayʉ̱́j ni'c tʉnwamp, tʉmpʉctsowáj premiu. Po te tʉngawatp tʉngustuni'c, majawe'naj itp ti tʉcumplia̱twa'n ni'c ayé yos̈ Dios tʉs̈moy.

¹⁸¿Ti pagu tʉmpʉctsowáj? Tʉnjawip ni'c neti, solo ji'cp tʉnjo̱jt ni'c tʉnyʉmdacyo'yp Cristu i-oyway noticia, mit tʉngaque'chump neti pa tʉga-abusa̱t tʉnderechu ni'c oyapate tʉs̈tucay ayé oyway noticia.

¹⁹Mit nepʉn tʉs̈camanda̱tp po tʉniwajtʉu mozo mit nu'pʉjʉn jayajwat pa tʉ-actsʉ̱na más cupʉcpajyat.

²⁰Tʉniwajtʉu as̈am judíu pa tʉ-actsʉ̱ngʉs̈ judíujat ma cupʉjca-ey. Jeme irespeta̱tcajapay Moisés iley, tʉniwajtʉp as̈am tʉnrespeta̱tpayey pa tʉs̈actsʉ̱ngʉs̈wa'n jeme irespeta̱tcapay ley, po ʉ̱ tʉs̈cadomina̱tp ayé ley.

²¹Mit jeme iga-is̈capcapay ayé ley, tʉniwajtʉp as̈am tʉnga-is̈capay ayé ley pa tʉs̈actsʉ̱ngʉs̈wa'n jeme iga-is̈capcapay ayé ley. Po tʉnwatp lo que imanda̱tpay Dios, mit tʉnjayaumajyap Cristu iley.

²²Mit jeme cacupʉjcapay mʉgʉc, tʉniwajtʉpey as̈am tʉgacupʉcpay mʉgʉc pa tʉs̈actsʉ̱ngʉs̈wa'n je'jat. Tʉniwajtʉp natcapa'tu pa nu'pʉjʉn jayajwat, wename tʉnactsʉ̱ngʉs̈áj cʉjtu'c.

²³Mit ayʉ̱́j tʉnwatp ni'c tʉnwamp ayé oyway noticia, mit tʉnwamp tʉs̈nʉmdacyo'ywa'n ayé oyway noticia.

²⁴¿Ingajawigap ni'c jeme pujʉ'jcapay carrerani'c, nu'pʉjʉn pujʉ'jcap po tu'gujyu ayé i-actsʉ̱napay premiu? Pujʉ'jca-ey wename pa pi actsʉ̱nga ayé premiu iyagámpay Dios.

²⁵Mit nu'pʉjʉn jayau niprepara̱jtʉpay pa ipujʉ'cwa'n carrerani'c, igawatcada̱cp tigapa'tu. Iyacs̈ta'cway je'jat niprepara̱tcʉjʉp we'n pa iguipʉctsougawa'n tu'c premiu jeme togoyámpay. Po ʉjtsat napremiujat napʉctsougámpay catogoyáj.

²⁶Jemni'c ʉ̱ yename tʉpujʉ'c, po tʉgatʉ'tspujʉ'cpu. Yename ʉ̱ tʉlucha̱t, po caje' as̈am i-acnʉs̈capay igolpe s̈e'mni'gu.

²⁷Po tʉndomina̱tp tʉncuerpu mit tʉngawatp lo que tʉncuerpu iwampay, ni'c tʉnajque's̈cʉs̈away japu̱jtat, po ʉ̱ mismu oyap tʉpichin mal mit Dios.