Read Sayula Popoluca 2 Corintios 10 Bible Online

2 Corintios 10 - Sayula Popoluca bible

2 Corintios 10

¹Ʉ̱ Pablo tʉmucotscʉs̈p jo̱toy as̈am te Cristu is̈mucotscap ni'c je' oyjayawo'c mit jayawano'cp. Inʉmgap tʉnmutsuguijnat ni'c cuandu tʉtsʉ̱na mit mijchat tʉniwajtʉp oyjayawo'c, po cuandu tʉtsʉ̱na jatu'c laj tʉniwajtʉp valiente.

²Po tʉtsʉ̱nawa'n mit mijchat oyapey tʉ-awa'ni mit tʉnche'cta̱jcʉs̈áj cʉjtu'c jeme inʉmgapay ni'c tʉyo'ygap as̈am jayajwat ayʉ̱́j mundujway. Tʉyo'tcʉs̈ap is̈ca-ac-awa'nigáj wename mit mijchat.

³Ni'c maja tʉyo'ygawa'naj en ayʉ̱́j mundu, tʉgalucha̱tcap as̈am jayajwat iwangapay ayʉ̱́j mundu.

⁴Ni'c tʉgalucha̱tcap mit ayé arma jayajwat itulucha̱tcapay po tʉn-ármajat ayé poder iyacpay Dios pa tʉs̈vencia̱tcawa'n nu'pʉjʉn tsʉ̱ngapay contra Dios.

⁵Tʉnatujcap nu'pʉjʉn ipensa̱tcapay jayajwat, mit tʉmvencia̱tcap nu'pʉjʉn nimʉjninʉmgʉjʉpay ni'c je'jat igawangap igui-is̈capcawa'n Dios, mit nu'pʉjʉn jayajwat tʉnactujayaumaygap Cristu.

⁶Mit tʉtsʉ̱ngap listu pa tʉs̈castiga̱tcawa'n nu'pʉjʉn cajayaumaygapay po tʉmojyʉ'jcáj jas̈ʉ̱n tiempu hasta injayaumaygawa'n.

⁷In-e'pcap nu'pʉjʉn cosa as̈amu ique's̈ iyucuinm. Te tu'c jayau confia̱tp ni'c je' imutʉgʉyway Cristu, je' ma jawi ni'c as̈am je' iguimutʉgʉy Cristu, wename-ey ʉjtsat tʉs̈mutʉgʉyga Cristu.

⁸Ni'c te tʉni-oyninʉjmʉp más ni'c tʉmanda̱tp, tʉgawinchu̱gap. Ni'c el Señor tʉs̈yajcau tʉmandá̱tca pa pi pʉjca maj mit je', mit caje' pa intogoygawa'n.

⁹Mit nepʉn maganʉm ni'c tʉja'ygʉs̈ap ayé noc pa tʉ-apʉ̱tigʉs̈wa'n.

¹⁰Mit cʉjtu'c inʉmgap ni'c ayé noc tʉnja'ypay mʉgʉc tʉtsawi mit bien ja'yic, po inʉmgapey ni'c tʉga-oyque's̈p mit nes̈ʉ̱n ca-oyap tʉcots.

¹¹Ayé jayau inʉmpay wename ma jawi ni'c as̈am tʉs̈ja'yga nocni'c cuandu tʉgatsʉ̱́nga mit mijchat, wename-ey tʉs̈watcawa'n cuandu tʉtsʉ̱ngawa'n mit mijchat.

¹²Ʉjtsat tʉgaje'jat as̈am ayé jayajwat nimʉjninʉmgʉjʉpay je'jatu, ni'c je'jatu inʉmgap ni'c más oy jayajwat que japu̱jtat, mit inʉmgapey ni'c más i-is̈capcap. Ayé jayajwat igajawigap neti.

¹³Ʉjtsat tʉganimʉjninʉmgʉjʉp demás po tʉnwatcáj solamente jeme Dios tʉs̈moygaway tʉwátca, mit je' tʉs̈ajcoygau hasta mam mijchat.

¹⁴Ni'c ʉjtsat Dios tʉs̈ajyu'tcau pa tʉcoygawa'n mam mijchat, tʉganimanda̱tcʉjʉwu ʉjtsatu. Mit tʉcojyʉ'jcau mam mijchat pa tʉs̈nʉmdacyo'ygawa'n Cristu i-oyway noticia.

¹⁵Tʉganimʉjninʉmgʉjʉp mit ayé yos̈ iwatcaway jatu'c jayajwat, solo tʉyos̈watcap as̈am Dios tʉs̈manda̱tcau. Mit tʉnwangap pi cupʉjca más, pa tʉyos̈watcawa'n más mit mijchat as̈am Dios tʉs̈manda̱tcau.

¹⁶Pa we'n oyáj tʉs̈nʉmdacyo'yga Cristu i-oyway noticia en ayé lugajrat itpay más yajyʉ'n de mijchat, mit we'n tʉganimʉjninʉmgʉjʉ̱́j mit tu'c yos̈ itnupay watic.

¹⁷Po jeme nimʉjninʉjmʉpay, más oy ma mʉjninʉm el Señor.

¹⁸Ni'c capichináj oy tu'c jayau ni-oyinʉjmʉpay je'yu. Pichináj oy ayé jayau jeme Dios igui-oyninʉmámpay.