Read Sayula Popoluca 2 Corintios 11 Bible Online

2 Corintios 11 - Sayula Popoluca bible

2 Corintios 11

¹Tʉnwamp pi is̈majmoygac ʉ̱ te tʉcotsp as̈am tu'c loco. Ʉ̱ tʉnjawip ni'c is̈majmoygáj.

²Tʉwangʉs̈p as̈am Dios is̈wangap ni'c tʉyajcʉs̈way Cristu icʉ'jugum pa tʉpresenta̱tcʉs̈wa'n mit je'. Tʉnwamp pi wanga je'yu as̈am tu'c quis̈ay ipʉgámpay ina'u mit ayé iwamp je'yu.

³Po tʉpʉ̱tp pi is̈cajatcac as̈am Eva iguiwe̱t ayé tsanay ni'c ito'jcʉu maña, ni'c ayé Awayagatsna'. Mit is̈we̱jta̱jcámpey mijchat pa pigapensa̱tca oy, mit cʉs̈wa'n ca-oyáj is̈-adorá̱tca Cristu iyacs̈ta'cway.

⁴Ni'c te jatu'c jayau mimp mit is̈nʉmgajap ni'c itp jatu'c Jesús, incupʉjcap jaran, po ʉ̱ tʉ-ajque's̈cʉs̈au ni'c itp tu'gu Jesús nacupʉjcámpay. Impʉctsougap jaran jeme we̱tpay jayajwat is̈nʉmgajámpay, mit inmaraugap jaran jatu'c namay noticia mit ayé caje' impʉctsojwʉ'jcaway. Impʉctsougap jaran nu'pʉjʉn we̱t.

⁵Ʉ̱ tʉnjawip ni'c tʉgaje' menus mit ayé niwatcʉjʉpay apóstojlat.

⁶Ni'c maja tʉngajatpaj cots po tʉnis̈cap may, mit mijchat injawigap ni'c iyacs̈ta'cway nu'pʉjʉn tʉ-ajque's̈cʉs̈away.

⁷¿Is̈jawiga tʉnwat mal? Tʉyos̈wat pa tʉ-acnicajyʉwa'n mit tʉgaque'chumgʉs̈u pa tʉs̈nʉmdacyo'ywa'n Dios i-oyway noticia mam mijchat ni'c tʉnwan tʉmajyigʉs̈wa'n.

⁸Mit cupʉcpajyat jatu'c lajatway tʉs̈majyigau mit tumi̱n pa tʉ-ajque's̈cʉs̈awa'n mijchat.

⁹Mit cuandu tʉtsʉ̱́naj mit mijchat, tʉnaguep necesidad po nepʉn tʉngajomiwu, ni'c jeme tʉs̈togoyway tʉs̈acnu'tscajau ayé hermanujat mingaway Macedonia, mit tʉngawanu tʉyo'tcʉs̈awa'n neti pigatunas̈ca, mit siguia̱táj tʉs̈wat wename.

¹⁰Tʉnyʉmp iyacs̈ta'cway as̈amu Cristu iguinʉjm, ni'c nu'pʉjʉn parte Acayajway na̱s̈ tʉngaque'chumu nepʉn, mit tʉni-oyninʉjmʉp ni'c tʉnwatp we'n mit nepʉn tʉs̈ca-atugáj.

¹¹Ni'c tʉnwatp we'n ¿is̈jawiga tʉgawangʉs̈p? Dios ijawip ni'c tʉwangʉs̈p.

¹²Mit siguia̱táj tʉs̈wat lo que tʉnwatpay, pa we'n tʉnatujcʉs̈áj jeme iche'ngapay pa inimʉjninʉmgʉjʉwa'n, ni'c ayé we̱tpajyat inʉmgap ni'c iwatcapey as̈am ʉjtsat.

¹³Po aye'jat caje' apóstojlat iyacs̈ta'cway, we̱jtacyo'ygapu mit niwatcʉjʉp as̈am Cristu i-apóstojlat.

¹⁴Po camnigu-épigʉjʉ mit ayé, ni'c nije'yu Awayagatsna' niwajtʉp as̈am ángel tsʉ̱napay Dios iluzni'c.

¹⁵Jemni'c camnigu-épigʉjʉ te we'ney Awayagats iyos̈watpajyat niwatcʉjʉp as̈am iwatcapay iyacs̈ta'cway. Mit Dios icastiga̱tcʉs̈áj as̈amu iguiwatca.

¹⁶Tʉnyʉmpatu ni'c nepʉn magapensa̱t ni'c tʉloco, po te impensa̱tcap ni'c tʉloco, majawe'naj maraugac, pa we'n oyámpey tʉni-oyninʉ́jmʉ s̈ʉ̱n.

¹⁷Tʉgacotsp as̈am tʉs̈manda̱t el Señor, po tʉcotsp as̈am tu'c loco, jemni'c tʉconfia̱tp tʉni-oyninʉjmʉwa'n.

¹⁸Ni'c mayo'c jayajwat i-oyninʉmgap ividajat en ayʉ̱́j mundu, mit ʉ̱ tʉni-oyninʉjmʉpey.

¹⁹Mit como mijchat inis̈capcap may, inmajmoygap jayajwat ipensa̱tcapay tontería.

²⁰Ni'c mijchat inmajmoygap te tambʉn is̈-obliga̱tcap pi servia̱tcaja je', te is̈chi'tcuwa̱tscap, te is̈we̱tcap, te nimʉjninʉjmʉp o te is̈moyta̱jcap inwindugʉtni'jcat.

²¹Po je'jat inʉmgap ni'c tʉdebilo'jcat ni'c tʉngawatcawu we'n, po tʉwinchu̱gap tʉs̈watwa'n we'n. Po te jatu'c jayau valiente, ʉ̱ tʉvalientejey, po tʉcotsp as̈am tu'c loco icots.

²²Te je'jat Hebreojat, ʉ̱ we'ney. Te je'jat Israejlatway, ʉ̱ we'ney. Te je'jat nije'yu Abraham ifamiliajat, ʉ̱ we'ney.

²³Te je'jat imuyos̈watcap Cristu, ʉ̱ más tʉnmuyos̈watp mʉgʉc Cristu que je'jat, po tʉcotsp as̈am tu'c loco ni'c tʉnimʉjninʉjmʉp. Tʉyos̈wat más mʉgʉc, bien tʉs̈moyta̱jcau, may veces tʉs̈cuytʉjcomgau, may veces jatʉs̈ago'jcau.

²⁴Cinco veces ayé judíujat tʉs̈moygau treinta y nueve arrasmúc.

²⁵Tu̱cpac tʉs̈moyta̱jcau mit cujy, tu'mbac tʉs̈pojcajau mit tsa', tu̱cpac itogoyda̱jc ayé barcu tʉntuyo'yway, tu'c tsu' mit tu'c s̈ʉjw tʉtsʉ̱nau es̈pu̱t lama̱t as̈am togoyic.

²⁶Mayo'c veces tʉyo'jy en ayʉ̱́j mundu, tʉtsʉ̱nau en peligru mʉjnʉ'ni'c, peligru mam itsʉ̱nga nu'mpajyat, peligru mit tʉntʉcmayna̱s̈atway mit we'ney mit pe'ta̱mayna'jat, peligru nʉ'jcopacni'jcat, peligru mam igatsʉ̱na nepʉn, mit itey peligru lama̱tni'c. Mit it peligru mit ayé jayajwat niwatcʉjʉway as̈am hermanujat.

²⁷Cʉs̈ tʉnjo̱jt tʉyos̈wat, may veces tʉgama̱j, tʉcayo'jcʉu mit tʉnʉ-u̱go'jcʉu, may veces tʉ-ayuna̱jt, tʉtugutso'jcʉu mit tʉnga-aguepu jamuc.

²⁸Mit caje' ayʉ̱́jyu po tʉntunas̈pey cada s̈ʉjw ni'c tʉpensa̱to'cp pa tʉs̈cuida̱twa'n nu'pʉjʉn Dios icupʉcpajyat tsʉ̱ngapay nu'pʉjʉn laj.

²⁹Te débil tu'c hermanu, ʉ̱ tʉniwajtʉ́mpey as̈am débil. Te i-ajca'ugap tu'c hermanu, tu'mp tʉnjo̱jt.

³⁰Te ni-oyninʉmgʉjʉp, ʉ̱ tʉn-oyninʉmámpey ayé debilidad tʉnaguepay.

³¹Ayé Dios el Señor Jesucristu ite̱t mʉjninʉmic pa nu'pʉjʉn tiempu, ijawip ni'c tʉgawe̱tp.

³²Cuandu tʉtsʉ̱́naj nʉ'jcopac Damasco, rey Aretas igobernador icuida̱t ayé nʉ'jcopac mit manda̱t pa tʉs̈actangáj.

³³Po hermanujat tʉs̈acmanajcau en tu'c ventana me's̈-auni'cway en tu'c mʉjway ca'c, mit tʉpo'c icʉ'jugum.