Read Sayula Popoluca 2 Corintios 13 Bible Online

2 Corintios 13 - Sayula Popoluca bible

2 Corintios 13

¹Tʉnʉs̈patu mam mijchat imutu̱gupay viaje. Tʉngajuzga̱táj tu'c jayau acusa̱ticway te ca-itp mechc o tu̱gup testigu contra je'.

²Cuandu tʉtsʉ̱́naj mit mijchat, tʉnche'cta̱jcʉs̈ jeme iwatcaway mal. Mit jinap tʉgatsʉ̱nap mit mijchat po tʉnyʉmgʉs̈apatu jeme siguia̱tcapay iguiwatca ma̱jlat, ni'c te tʉnʉs̈patu mam mijchat, tʉnga-ayo̱wis̈áj nepʉn jeme iwatcapay mal.

³Tʉnwatáj we'n ni'c inwangap is̈jawigawa'n te iyacs̈ta'cway Cristu tʉs̈ajcotsp ʉ̱. Mit je' caje' débil mit mijchat, po je' oyap is̈moygap maj en nu'pʉjʉn cosa.

⁴Mit Cristu ca-ijtʉwu maj cuandu iguiyájcaj cunu̱s̈ni'c, po jinap je' ijtʉp vida ni'c Dios iguimoy maj. Ʉjtsat we'ney tʉnga-aguepcap maj as̈am je' primeru, po como tʉnmutʉgʉygau je', Dios tʉs̈moygámpey majpa tʉservia̱tcajawa'n mijchat.

⁵Pensá̱tca nat inyo'yga te micupʉjcap iyacs̈ta'cway, mit probá̱tca nat intsʉ̱nga mit Dios. ¿Ingajawigap ni'c Jesucristu tsʉ̱nap injo̱tni'jcat? Te ingamoygap laj Cristu injo̱tni'jcat, migacupʉjcap iyacs̈ta'cway.

⁶Po tʉnwamp pi jawiga ni'c ʉjtsat tʉcupʉjcap iyacs̈ta'cway.

⁷Mit tʉn-ora̱tcajap Dios pigawatca nejʉmay mal, po caje' pa ʉjtsat tʉtsʉ̱́nga oyninʉmic. Tʉnaguepcap derechu tʉche'cta̱jcawa'n po más oy pi watca iyacs̈ta'cway, pa we'n tʉgache'cta̱jcáj, maja iguinʉmgawa'naj ni'c tʉgamanda̱tcap.

⁸Tʉnganʉmgáj neti te inwatcap oy, solo tʉnche'jcáj jeme iwatcapay mal.

⁹Jemni'c ji'cp tʉnjo̱jtat cuandu tʉgache'jcawa'n, mit ji'cpey tʉnjo̱jtat intsʉ̱ngawa'n oy mit Dios, mit tʉnyo'jtap Dios pi jatca más oy.

¹⁰Jemni'c tʉja'ygʉ́s̈a ayʉ̱́j noc antes tʉnʉs̈wa'n mam mijchat, pa cuandu tʉcojawa'n tʉgache'cta̱jcʉs̈áj, ni'c el Señor tʉs̈moy autoridad pa pi pʉjca maj mit je', caje' pa intogoygawa'n.

¹¹Jinap, hermanujat, Dios pi is̈mutangac, pi jatca oy, pʉctsóuga ayé conseju tʉnyacpay, tsʉ̱nga en acuerdu mit camaguépca tsuguin. Mit tsʉ̱náj mit mijchat ayé Dios nas̈moygapay paz mit nas̈wangapay.

¹²Nisaludá̱tcʉjʉ minu'pʉjʉjnat mit tu'c ame'tamuc ni'c miniwangʉjʉp.

¹³Is̈saluda̱tcap nu'pʉjʉn Dios ijayajwat.

¹⁴El Señor Jesucristu jeme nas̈moygapay favor, mit ayé Dios nas̈wangapay, mit Espíritu Santu jeme ts-napay mit ʉjtsat, pi is̈mutangac minu'pʉjʉjnat. Amén.