Read Sayula Popoluca 2 Corintios 3 Bible Online

2 Corintios 3 - Sayula Popoluca bible

2 Corintios 3

¹¿Is̈jawiga tʉnimʉjninʉmgʉjʉpatu? Tʉngamuyo'ygap carta de recomendación ni'c mijchat is̈-is̈capcap, ne tʉgayo'tcajap carta de recomendación as̈am iguiwatca una̱c jayajwat.

²Mijchat tʉ-aguepcap as̈am tu'c carta. Mitsʉ̱ngap as̈am ja'yic tʉnjo̱tni'jcat. Nu'pʉjʉn jayajwat ijawigap ni'c incupʉjcap Cristu mit ijawigap ni'c oy lo que tʉnwatcaway mam mijchat.

³Nu'pʉjʉn ijawigap ni'c mijchat as̈am tu'c noc ija'yway Cristu mit ʉjtsat tʉ-ajque's̈cajau nu'pʉjʉn. Mijchat caje' as̈am tu'c noc ja'yic mit tinta, po as̈am tu'c noc ija'yway Dios i-Espíritu mit je' cacʉs̈áj nunca. Mit ayé noc tsʉ̱nap ja'yic injo̱tni'jcat, caje' as̈am ámbanu iguija'ygaj ayé ley tsa'ni'c.

⁴Tʉtsʉ̱ngap seguru ni'c Dios tʉs̈ya̱s̈cau, mit Cristu tʉs̈ajconfia̱tcap mit Dios.

⁵Tʉngapensa̱tcap ni'c más tʉjatcʉjʉp, po Dios tʉs̈moygap nu'pʉjʉn tʉnjatcapay.

⁶Mit Dios tʉs̈yajcau pa tʉserviá̱tcaja je', jemni'c tʉs̈ajque's̈ca oy ayé nam acuerdu. Ayé nam acuerdu caje' as̈am ayé ampay ley ja'yicway po Espíritu Santu nas̈moygap nam acuerdu. Ni'c ayé ley ja'yicway nas̈condena̱tcap, po Espíritu Santu nas̈moygap vida.

⁷Mit ayé ampay ley tsʉ̱nau ja'yic tsa'ni'c mit nas̈condena̱tcau. Mit oymanac imijn ayé ley hasta Israejlatway ca-oyawu igui-e'pcaja Moisés iwindugʉt ni'c quijano'c, po ayé cʉs̈watu iquijan.

⁸Te oymanac imijn ayé ampay ley, ¡más oymanac i-it ayé namay acuerdu nas̈acmingajapay Espíritu Santu!

⁹Ni'c te oymanac imijn ayé ampay ley nas̈condena̱tcapay, jinap más oymanac i-it ayé namay acuerdu mam Dios nas̈yacs̈icninʉmgáj.

¹⁰Ni'c ayé ley oymanac imijn ámbanu, po jinap caja-oymanac ni'c más oymanac jinapay acuerdu.

¹¹Ni'c te oymanac ayé ley jeme nas̈way, más oymanac jeme jinap tanámpay.

¹²Tʉnjawigap ni'c tanáj pa siempre ayé nam acuerdu, jemni'c tʉgapʉ̱tcap tʉs̈nʉmdacyo'yga.

¹³Tʉngawatcap as̈am Moisés ni'c je' icutuc iwindugʉt mit tu'c velu pa Israejlatway maga-e'pca icʉs̈wa'n ayé quijanway.

¹⁴Po je'jat ca-oyawu igui-entendia̱tca, ni'c hasta jinap cuandu iguicotsca ayé ampay acuerdu, ayé nije'yu velu itcʉjʉp ijo̱tni'jcat ni'c iga-entendia̱tcap icotscapay, solo i-entendia̱tcáj jeme icupʉjcapay Cristu.

¹⁵Mit hasta jinap iguicótscaja Moisés ilibrujat, ijo̱jtat as̈am cutúguijcatway mit tu'c velu ni'c iga-entendia̱tcap neti.

¹⁶Po te tu'c jayau imutʉgʉyp el Señor, je' iguichi'jtáj ayé velu ijo̱tni'c, mit oyáj igui-entendia̱t.

¹⁷Ni'c el Señor ayé jeme ijtʉpay poder, mit jeme ijtʉpay el Señor i-Espíritu ijo̱tni'c libra̱tic itsʉ̱nawa'n.

¹⁸Mit ʉjtsat nanu'pʉjʉjnat nagacutujcap nawindugʉjtat as̈am Moisés iguiwajt. Ʉjtsat oyap nas̈-e'pca el Señor jeme oymanacway, mit cada s̈ʉjw najatcap más oy hasta najatcawa'n oy as̈am Cristu, mit nas̈acjatcap we'n el Señor i-Espíritu.