Read Sayula Popoluca 2 Corintios 5 Bible Online

2 Corintios 5 - Sayula Popoluca bible

2 Corintios 5

¹Najawigap ni'c nacuerpu as̈am tu'c tʉjc na̱s̈ni'cway jeme cajecpay, po te o'cp nacuerpu, na-aguepcáj tsajpni'c jatu'c cuerpu más oyway iwatway Dios mit ayé caje' jayajwat iwatcau, mit ayé cuerpu catogoyda'gáj nunca.

²Ni'c en ayʉ̱́j cuerpu natunas̈o'jcap, jemni'c nawangap nas̈tigatscawa'n mit ayé cuerpu tsajpni'cway,

³mit cʉs̈wa'n nas̈tígatsca nacuerpujat, nagatsʉ̱ngáj sin cuerpu tsajpni'c.

⁴Ni'c mientras natsʉ̱ngap en ayʉ̱́j cuerpu na-s̈ajtogoygʉjʉp as̈am jeme itunas̈o'jcapay, ni'c nagawangap natsʉ̱ngawa'n sin cuerpu tsajpni'c, más nawangap Dios nas̈cutigatscáj mit ayé cuerpu tsajpni'cway, pa we'n nagaja-o'jcáj po na-aguepcáj vida jeme cacʉs̈ámpay.

⁵Mit Dios ayé nas̈actupʉctsougámpay tu'c nam cuerpu, mit je' nas̈moygau Espíritu Santu pa nas̈actujawigáj ni'c iyacs̈ta'cway ayé.

⁶Jemni'c naconfiá̱tca. Najawigap ni'c mientras nayo'ygapnaj yam, nagatsʉ̱ngap tsajpni'c mit el Señor.

⁷Ni'c naga-e'pcap Dios po majawe'naj nacupʉjcap.

⁸Mit naconfia̱tcap yam po más nawangap nas̈cuyaguigawa'n nacuerpujat ni'c más oy natsʉ̱ngawa'n tsajpni'c mit el Señor.

⁹Jemni'c te natsʉ̱ngap yam o te natsʉ̱ngap mit el Señor, nawánga nas̈watcawa'n lo que Dios iwampay.

¹⁰Ni'c itp ti naque's̈pʉ'ngawa'n mam ijuzga̱twa'n Cristu, pa cada jayau ma pʉctsou irecompensa as̈am iguiwajt itsʉ̱naj en ayʉ̱́j vida, te iwat oy o te iwat mal.

¹¹Ʉjtsat tʉmpʉ̱tcap el Señor, jemni'c tʉnanimá̱tcap jayajwat ma cupʉjca je'. Dios ijawip nat tʉtsʉ̱́nga mit tʉnwampey pi jawiga nat tʉtsʉ̱́nga.

¹²Ʉjtsat tʉganimʉjninʉmgʉjʉp, solo tʉnwangap pi jawiga ni'c tʉnwatcap oy, pa ma oya is̈-awatújca jeme i-oyninʉmgapay tu'c jayau te oyque's̈p mit igawatcap cuenta nat itsʉ̱na ijo̱tni'c.

¹³Ni'c te inʉmgap ni'c tʉlocojat, ayé ni'c tʉnwangap Dios. Mit te inʉmgap ni'c tʉgalocojat, ayé pa mijchat pi tsʉ̱nga oy.

¹⁴Cristu iwangʉs̈p nu'pʉjʉn jayajwat, mit ayé tʉs̈animá̱tcap, mit najawigap ni'c tu'c jayau inʉ'jy Cristu o'c pa nu'pʉjʉn jayajwat ni'c nu'pʉjʉn tsʉ̱ngap as̈am o'guijcatway.

¹⁵Mit je' o'c pa nu'pʉjʉn jayajwat, po jeme jinap cupʉjcapay maganimanda̱tcʉjʉ je'jatu, po ma watca lo que iwampay Cristu jeme o'cway mit jutucta̱cway pa je'jat.

¹⁶Jemni'c jinap pa jʉpm tʉngawatcap cuenta nat ique's̈ca jayajwat. Wen-ijt tʉmpensa̱tcau ni'c Cristu solo tu'c jayau, po jinap tʉnjawigap ni'c je' Dios iway.

¹⁷Jemni'c te tu'c jayau imutʉgʉyp Cristu, je' jatáj as̈am tu'c namjayau, mit nas̈áj lo que iwatway ámbanu, mit iguimijnáj tu'c vida namay.

¹⁸Mit Dios ayé iwatpay wename. Cristu nas̈cowangau mit Dios, jemni'c natsʉ̱́nga oy mit je'. Mit ʉjtsat tʉs̈yajcau pa tʉs̈nʉmdacyo'ygawa'n oyway noticia ni'c jayajwat oyap itsʉ̱nga oy mit Dios.

¹⁹Ni'c Dios i-ajyu't Cristu pa iguitso'cwa'n nu'pʉjʉn nama̱jlat, pa we'n jayajwat oyap itsʉ̱nga oy mit Dios, mit igajawatcʉs̈ap cuenta ima̱jlat jeme cupʉjcapay, ni'c ima̱jlat iyajcau Cristu icuentani'c, mit tʉs̈yajcau pa tʉs̈nʉmdacyo'ygawa'n oyway noticia ni'c jayajwat oyap itsʉ̱nga oy mit Dios.

²⁰Jinap tʉnyʉmdacyo'ygap oyway noticia ni'c Cristu tʉs̈ajyu'tcau, jemni'c Dios is̈yo'tcajap pi cupʉjca je' ni'c ʉjtsat tʉtsawigau. Cristu tʉs̈ajyu'tcau pa tʉnʉmgajawa'n pi munipʉjcʉjʉ Dios.

²¹Cristu igawatu nejʉmay mal, po ni'c Dios nas̈wangau iyac je' pa iguitsʉmwa'n nu'pʉjʉn mal nawatcaway, pa nu'pʉjʉn imutʉgʉygámpay Cristu, Dios iguiyacs̈icninʉmgáj.