Read Sayula Popoluca 2 Corintios 6 Bible Online

2 Corintios 6 - Sayula Popoluca bible

2 Corintios 6

¹Ʉjtsat namuyos̈watcap Dios mit tʉyo'tcajap campʉctsouga jalmanu ayé favor is̈moygapay Dios.

²Ni'c Dios inʉm ilibruni'c: Tʉmaraugʉs̈ en tu'c tiempu oyway, mit tʉmajyigʉs̈ en ayé s̈ʉjw intunisalva̱tcʉjʉway. Marauga, jinap tu'c tiempu oyway, mit jinap ayé s̈ʉjw intunisalva̱tcʉjʉ̱́mpay.

³Tʉnga-ofendia̱tcap nepʉn pa nepʉn magamalninʉm ayé yos̈ tʉnwatcapay pa Dios.

⁴Mit tʉniporta̱tcʉjʉp oy en nu'pʉjʉn cosajat as̈am jeme imuyos̈watcapay Dios ni'c tʉnmajmoygap tʉs̈tunas̈ca. Tʉnaguepí̱jcap necesidad mit tu'no'cp tʉnjo̱jtat.

⁵Tʉs̈moyta̱jcap mit tʉs̈comgap cuytujugum, mit mam tʉcóyga jayaujuc tʉs̈pʉctʉgʉygau pa tʉs̈moyta̱jcáj. S̈ʉ̱m tʉyos̈watcap mʉgʉc, mit tsu'm ca-oyap tʉs̈acma̱gap, mit tʉyo'ygau sin cay.

⁶Tʉyo'ygap limpiu, tʉnis̈capcap Dios ipalabra, tʉnmajmoygap mit calma, tʉjayawangap, tʉnmuyo'ygap Espíritu Santu, tʉnwangap iyacs̈ta'cway nu'pʉjʉn jayajwat.

⁷Tʉnajque's̈cap lo que iyacs̈ta'cway, Dios tʉs̈moygap maj. Tʉyo'ygap yacs̈ic, jemni'c oyo'gu tʉluchá̱tca mit oyo'gu-ey tʉnidefendiá̱tcʉjʉ.

⁸Cʉjtu'c tʉs̈-oyninʉmgap mit cʉjtu'c tʉs̈malninʉmgap. Cʉjtu'c tʉs̈tucotscap mit cʉjtu'c tʉs̈mʉjninʉmgap. Tʉs̈pʉjcap as̈am we̱tpajyat po tʉnwatcap iyacs̈ta'cway.

⁹Inʉmgap ni'c tʉs̈ca-is̈capcap po je'jat mismu tʉs̈-is̈capcap. Tʉtsʉ̱ngap en peligru pa tʉ-o'jcawa'n po hasta jinap Jesús tʉs̈moygap vida. Siempre Dios tʉs̈moygap mʉgʉc prueba pa tʉtsʉ̱́nga oy, po tʉs̈ca-ago'jcap.

¹⁰Tʉntunas̈cap po siempre ji'cp tʉnjo̱jtat, tʉpro̱wijat po tʉnmajyigap may jayajwat pa ma tsʉ̱nga oy mit Dios, as̈am tʉnga-aguépcapay neti po Dios tʉs̈moygap nu'pʉjʉn.

¹¹¡Jayajwat Corintojatway! Tʉmucotscau oymanac, tʉnʉmgajau nu'pʉjʉn tʉmpensa̱tcaway.

¹²Mijchat tʉwangap mit nu'pʉjʉn tʉnjo̱jtat, po mijchat ca-oyawu is̈pʉctsougap mit nu'pʉjʉn injo̱jtat.

¹³Tʉmucotscʉs̈p as̈am tʉ̱wajyat. As̈am tʉwangʉs̈, jinap pʉctsougaguey mit nu'pʉjʉn injo̱jtat.

¹⁴Camniyájcʉjʉ is̈-obliga̱tcáj jayajwat cacupʉjcapay, ni'c mijchat migaje' nije'yu mit je'jat. Ni'c ¿nat inipʉjcʉjʉwa'n jeme iwatpay oy mit jeme iwatpay mal? ¿Mit nat ijatcawa'n tu'gu luz mit chítimic?

¹⁵¿Mit nat itsʉ̱nawa'n en acuerdu Cristu mit Awayagatsna'? ¿O ti parte ijtʉp tu'c cupʉcpay mit tu'c cacupʉcpay?

¹⁶¿Mit nat itsʉ̱ngawa'n tu'gu Dios itemplu mit tiyu̱s̈at? Ni'c mijchat ayé is̈templujat ayé Dios jeme tsʉ̱napay pa siempre. As̈am Dios iguinʉjm ilibruni'c: Tʉtsʉ̱náj ijo̱tni'jcat, mit tʉyo'yáj mit je'jat, mit ʉ̱ tʉtanáj Dios pa je'jat, mit je'jat jatcáj tʉnjayajwat.

¹⁷Mit inʉmey: Jemni'c píchinga mam itsʉ̱nga cacupʉjcapay, mit camniyájcʉjʉ is̈-obliga̱tcáj, mit camnijíngʉjʉ mit ma̱jlat, mit ʉ̱ tʉpʉctsougʉs̈áj. We'n iguinʉm el Señor.

¹⁸Mit ʉ̱ is̈te̱tjatcáj mit tʉwayjatcʉs̈áj. We'n iguinʉm el Señor jeme imanda̱tpay nu'pʉjʉn.