Read Sayula Popoluca 2 Corintios 8 Bible Online

2 Corintios 8 - Sayula Popoluca bible

2 Corintios 8

¹Hermanujat, jinap tʉ-actujawigap ni'c Dios imoygʉs̈ favor ayé cupʉcpajyat jeme tsʉ̱ngapay Macedoniajway na̱s̈.

²Ni'c mʉgʉgo'c iguitunás̈caj po ji'go'c ijo̱jtat, mit je'jat pro̱wijo'jcat po majawe'naj iyaguí̱jcau más ofrenda.

³Po je'jat iwano'jcau iguiyajcawa'n, mit iyajcau lo que oyaway mit tʉnjawip ni'c iyajcau nu'pʉjʉn itcʉjʉway.

⁴Mit je'jat tʉs̈yo'tcajau may favor pa iguimajyigawa'ney Dios ijayajwat.

⁵Ni'c je'jat iwatcau más, caje' as̈am tʉs̈pensá̱tcaj, ni'c primeru ni-entrega̱jtʉ'jcʉjʉu mit el Señor, mit cʉs̈ ʉjtsat tʉs̈majyigau as̈am Dios iguiwa'n.

⁶Tito is̈nʉjmʉ'jcajau pi yajca ayé ofrenda mit jinap tʉnyʉmgajau je' ma cʉs̈ ayé asuntu mam mijchat pi cuji'cs̈iga is̈yajcawa'n ayé ofrenda.

⁷Mitsʉ̱ngap oy en nu'pʉjʉn cosajat. Mijchat micupʉjcap may, oyo'gu is̈ajque's̈caja Dios ipalabra, inis̈capcap may, incuji'cs̈igap nu'pʉjʉn, mit ʉjtsat is̈wangap. Mit as̈am is̈wátca oy en nu'pʉjʉn ayʉ̱́j favojrat, wename-ey oy pi yaguí̱jca ofrenda.

⁸Tʉgacotsp as̈am tu'c manda̱tpay po tʉnwamp tʉproba̱tcʉs̈wa'n te incuji'cs̈igáj as̈am hermanujat Macedoniajatway, te iyacs̈ta'cway inyajcáj ofrenda ni'c inwangap inhermanujat.

⁹Ni'c injawigap nat nas̈moygau favor el Señor Jesucristu, ni'c je' ricujate tsajpni'c, po je' niwajtʉu pro̱wij ni'c is̈wangau mijchat, mit je' niwajtʉu pro̱wij imijn en ayʉ̱́j mundu pa injatcawa'n ricu mit je' tsajpni'c.

¹⁰Mit en ayʉ̱́j asuntu tʉtsawigʉs̈p ni'c más oy pi cʉs̈ca lo que inchu̱chigaway s̈iwit nas̈way, ni'c inwangau is̈yajcawa'n ayé ofrenda.

¹¹Mit jinap cumpliá̱tca ayé inwatcapay, ni'c as̈am is̈wángaj is̈yajcawa'n ayé ofrenda, jinap tu'mbacyájca jaran mit inyajcáj según is̈aguepca.

¹²Ni'c te tu'c jayau iwamp iguiyacwa'n i-ofrenda, Dios ipʉctsowáj ayé ofrenda según i-ijtʉ, ni'c Dios igayo'tp lo que tu'c jayau ca-ijtʉpay.

¹³Ni'c tʉngawamp jatu'jcat ma pʉctsouga ayuda te mijchat inaguepcap necesidad.

¹⁴Tʉnwamp pi tsʉ̱nga pareju. Te jinap inaguepcap may, inacnu'tscajap jeme iguitogoygapay, mit te jatu'c s̈ʉjw je'jat itcʉjʉp may, i-acnu'tscámpey is̈togoygámpay, pa pi tsʉ̱nga pareju.

¹⁵As̈am itsʉ̱na ja'yic Dios ilibruni'c: “Jeme ipi̱way may, iguiga-atajnawu neti. Mit jeme ipi̱way s̈ʉ̱nu, iguigatogoyu neti.”

¹⁶Po nanʉ́mgaja Dios ni'ctiyu̱s̈ ni'c je' itsʉjcau Tito ijo̱jt pa is̈cuida̱tcámpey mijchat.

¹⁷Mit je' inipo'n lo que tʉnyʉjmaway. Mit como je' ji'cs̈o'c, iwan inʉcs̈wa'n mam mijchat intsʉ̱nga.

¹⁸Mit tʉnajyu'tcap jatu'c hermanu mit je', mit nu'pʉjʉn cupʉcpajyat i-oyninʉmgap ayé hermanu ni'c oyo'gu iguinʉmdacyo'y ayé oyway noticia.

¹⁹Mit we'ney nu'pʉjʉn cupʉcpajyat icupiugau ayé hermanu pa iyo'ywa'n mit ʉjtsat mit pa tʉs̈ajca's̈ʉ'jcawa'n ayuda, mit tʉnwatcap ayʉ̱́j yos̈ pa el Señor ma tsʉ̱na oyninʉmic mit pa nu'pʉjʉn ma jawiga ni'c inwangap nu'pʉjʉn hermanujat.

²⁰Tʉnajca's̈ʉ'jcáj may ofrenda mit tʉncuida̱tcáj oymanac cuandu tʉs̈munʉs̈cawa'n ni'c tʉngawangap nepʉn tʉs̈malninʉmgáj.

²¹Ni'c tʉnche'ngap pa tʉs̈watcawa'n lo que iyacs̈ta'cway mam tʉs̈-e'pcap Dios mit we'ney mam tʉs̈-e'pcap jayajwat.

²²Mit tʉnajyu'tcapey jatu'c tʉnhermanujat mit je'jat, mit je' tʉmproba̱tcau may veces, mit pichin oy ni'c je' ji'cs̈o'c en nu'pʉjʉn, mit jinap je' más icuji'cs̈ip ni'c je' confia̱to'cp mit mijchat.

²³Jinap inactujawigap nu'pʉjʉn hermanujat ni'c Tito tʉncumpal mit tʉnmuyos̈watcap je' pa tʉmajyigawa'n mijchat. Pi jawiga-ey ni'c tʉnhermanujat igui-ajyu'tcau nu'pʉjʉn cupʉcpajyat pa Cristu ma tsʉ̱na oyninʉmic.

²⁴Actujáwiga ni'c inwangap ayé hermanujat mam igui-e'pca nu'pʉjʉn cupʉcpajyat, mit ma jawiga-ey ni'c tʉnaguepcap razón tʉ-oyninʉmgawa'n.