Read Sayula Popoluca 2 Corintios 9 Bible Online

2 Corintios 9 - Sayula Popoluca bible

2 Corintios 9

¹Ca-itp ti tʉja'ygʉs̈awa'n pa pi majyiga Dios ijayajwat,

²tʉnjawip ni'c inwangap is̈watcawa'n ayé. Jemni'c tʉnyʉmgʉs̈au Macedoniajatway ni'c mi-oyjayawo'jcat, mit tʉnyʉmgʉs̈au ni'c mijchat mitsʉ̱ngapay Acayajway na̱s̈ mitsʉ̱ngap listu pa inmajyigawa'n mit ofrenda desde s̈iwit nas̈way, mit mayo'gap is̈animá̱tca ni'c we'n is̈wátca.

³Mit tʉnajyu'tcʉs̈ ayé hermanujat pa tʉga-oyninʉmgawa'n jalmanu en ayʉ̱́j asuntu, pa pi tsʉ̱nga listu as̈am tʉs̈nʉmgʉ́s̈aj.

⁴Magaminga mit ʉ̱ hermanujat Macedoniajatway mit is̈pa̱tcáj migatsʉ̱ngap listu, mit cʉs̈wa'n tʉwinchu̱cta̱jcáj ʉjtsat mit mijchat we'ney ni'c tʉconfia̱tcau mit mijchat.

⁵Jemni'c tʉs̈pensa̱jt ni'c itp ti tʉs̈tsawigʉs̈wa'n hermanujat ma nʉs̈ʉ'jca mam mijchat ma oyajca ayé ofrenda imprometia̱tcaway, pa ayé ofrenda ma tsʉ̱na listu, pa ma jawiga nu'pʉjʉn ni'c mi-oyjayawo'jcat ni'c inyajcap ayé ofrenda ingustuni'jcat, caje' ni'c tʉ-afuerza̱tcau.

⁶Oy pi nijawiga ni'c jeme ini̱pay s̈ʉ̱nu, ichigámpey s̈ʉ̱nu. Mit jeme ini̱pay may, ichigámpey may.

⁷Cada jayau ma yac i-ofrenda pʉjʉn iguipensa̱t, mit magatu'n ijo̱jt, mit magapensa̱t ni'c obliga̱tic iguiyacwa'n, ni'c Dios iwano'cp jeme ji'cpay ijo̱jt iguiyac.

⁸Mit Dios oyap is̈acmingajap may nu'pʉjʉn favor pa is̈aguepcawa'n nu'pʉjʉn inyesita̱tcapay, pa we'n oyáj is̈majyiga nu'pʉjʉn jeme nesitá̱tijcatway.

⁹As̈am itsʉ̱na ja'yic Dios ilibruni'c: May iguimoygʉs̈ pro̱wijwájat, mit ayé oy iwatway tan pa siempre.

¹⁰Dios imoyp semilla ni̱payna' mit imoypey cayan pa iguicaywa'n, mit como Dios iyacp ayé semilla, i-acmayiyámpey lo que inyi̱pcapay, mit is̈majyigáj pa más is̈watcawa'n cosa oyway.

¹¹Mit Dios is̈moygáj may nu'pʉjʉn cosa pa mijchat oyámpey is̈yajca may, mit we'n hermanujat inʉmgajáj Dios ni'ctiyu̱s̈ cuandu tʉs̈-entrega̱tcajawa'n inofrendajat.

¹²Ni'c te wename is̈májyiga Dios ijayajwat, inacnu'tscajáj iguitogoygapay, mit we'ney je'jat inʉmgajáj Dios ni'ctiyu̱s̈ may veces.

¹³Ijawigáj ni'c micupʉjcap iyacs̈ta'cway ni'c inmajyigap ayé hermanujat mit jemni'c i-oyninʉmgáj Dios. Inactujawigámpey ni'c inwangajap Cristu i-oyway noticia ni'c injayaumaygap nu'pʉjʉn inʉmpay Dios. Mit i-oyninʉmgáj Dios ni'c inwangap is̈yajcawa'n may ayuda pa je'jat mit pa nu'pʉjʉn hermanujat.

¹⁴We'ney je'jat ora̱tcap pa mijchat, mit je'jat is̈wangap ni'c Dios is̈moygau mayo'c favor.

¹⁵Nanʉ́mgaja Dios ni'ctiyu̱s̈ ni'c nas̈moygap mayo'c favor hasta ca-oyap nas̈jawi tini'c nas̈moygap may favor.