Read Sayula Popoluca Gálatas 2 Bible Online

Gálatas 2 - Sayula Popoluca bible

Gálatas 2

¹I-íjtʉj catorce s̈iwit, tʉnʉcs̈watu pa Jerusalén mit Bernabé, mit tʉnmunʉcs̈ey Tito.

²Mit Dios tʉs̈najau tʉnʉcs̈ pa Jerusalén, mit tʉnactujawigʉs̈ ayé oyway noticia tʉnyʉmgʉs̈apay jeme caje'jatway judíujat. Po tʉnmucotscʉs̈ itu'gujmatu jeme manda̱tcapay templuni'c, pa we'n tʉgayos̈watp jalmanu.

³Mit Tito jeme tsʉ̱naway mit ʉ̱, iganʉmgajawu ma nimarca̱jtʉ icuerpuni'c as̈am judíujat iguiwatca, mit je' griegu.

⁴Ni'c we'n iguiwángaj una̱c we̱tpay hermanujat jeme tʉgʉygaway anu'mu, mit tʉgʉygau pa i-espia̱tcawa'n te ʉjtsat tʉtsʉ̱ngap libra̱tic mit Cristu. Je'jat iwangau tʉtsʉ̱ngawa'n to'ctʉgʉyijcat as̈am mozojat.

⁵Po nes̈ʉ̱n tʉngajayaumaygawu je'jat pa mijchat pi mutanga ayé oyway noticia jeme iyacs̈ta'cway.

⁶Mit jeme manda̱tcapay templuni'c, ʉ̱ tʉs̈ca-ajque's̈cajawu jatu'c cosa namay. Pa ʉ̱ iganʉmo'jcʉp neti pʉjnat je'jat, ni'c Dios niwe'nu igui-e'pcʉs̈ nu'pʉjʉn jayajwat.

⁷Po nimoygʉjʉu cuenta ni'c Dios tʉs̈yac pa tʉs̈nʉmdacyo'ywa'n oyway noticia pa jeme caje'jatway judíujat, mit Dios iyaguey Pedro pa iguinʉmdacyo'ywa'n oyway noticia pa judíujat.

⁸Ni'c Dios iyac Pedro ma jat apóstol pa judíujat, mit we'ney tʉs̈yac ʉ̱ pa tʉjatwa'n apóstol pa jayajwat jeme caje'jatway judíujat.

⁹Jacobo, Pedro mit Juan, jeme más manda̱tcapay mam cupʉcpajyat, nimoygʉjʉu cuenta ni'c Dios tʉs̈moy favor, mit tʉs̈municʉ'moygʉjʉu ʉ̱ mit Bernabé ni'c tʉtsʉ̱ngájama en acuerdu, pa ʉjtsat tʉnʉs̈cawa'n mam itsʉ̱nga jeme caje'jatway judíujat, mit je'jat nʉs̈cáj mam judíujat.

¹⁰Solo tʉs̈nʉmgajau ni'c tʉnijáwiga pro̱wijwájat, mit ʉ̱ siempre tʉnwano'cp tʉs̈nijawiwa'n pro̱wijwájat.

¹¹Po cuandu imijn Pedro pa Antioquía, tʉnche'cta̱c iwindugʉtʉm ni'c je' culpa̱tic itsʉ̱naj.

¹²Ni'c Pedro imucaygʉs̈pate jeme caje'jatway judíujat, po imíngaj una̱c judíujat i-ajyu'tway Jacobo, Pedro niju'jpʉu mit igajamucaygʉs̈u ni'c ipʉ̱tcʉs̈ judíujat.

¹³Mit japu̱t judíujat tigatscawey as̈am je' hasta Bernabé imutʉgʉygʉs̈ ayé we̱tpajyat.

¹⁴Mit tʉnimojyʉu cuenta ni'c cayo'ygap pajcu as̈am iguinʉm ayé oyway noticia jeme iyacs̈ta'cway. Mit tʉnyajau Pedro mam iguimárauga nu'pʉjʉjnat: “Mi̱ mijudíu mit miyo'yp as̈am caje'jatway judíujat. Mit te migayo'yp as̈am judíu, ¿tini'c is̈-obliga̱tcʉs̈ jeme caje'jatway judíujat ma yo'yga as̈am judíujat?”

¹⁵Mit cʉs̈ tʉnyajau Pedro ni'c ʉjtsat judíujat tʉye'jcaj, mit tʉgaje'jat maljayajwat as̈am jeme caje'jatway judíujat.

¹⁶Mit najawigap ni'c Dios igapʉctsowáj nejʉmay jayau jeme pensa̱tpay pa puru ley iguicumplia̱twa'n, po Dios ipʉctsowáj te icupʉcp Jesucristu. Mit ʉjtsat nacupʉjcawey Jesucristu. Jemni'c nas̈pʉctsougap Dios, mit caje' ni'c nacumplia̱tcap ley. Ni'c nepʉn jeme ipensa̱tpay pa puru ley iguicumplia̱twa'n, Dios igapʉctsowáj.

¹⁷Po te nache'ngap pa Dios nas̈pʉctsougáj ni'c namutʉgʉygau Cristu, mit te nawatcapnaj mal, ¿is̈jawiga Cristu nas̈actuwatcap mal? Caje' we'n.

¹⁸Ni'c te tʉnajca's̈ʉ'cpatu ayé cosajat tʉnactogoyda̱cway, tʉngajayaumayp ayé ley.

¹⁹Ʉ̱ ámbanu tʉs̈domina̱tpate ayé ley, po jinap tʉtsʉ̱nap as̈am o'guic mit ayé ley, mit jemni'c tʉtsʉ̱́na pa tʉs̈servia̱jtawa'n Dios.

²⁰Tʉtsʉ̱nap as̈am crucifica̱tic mit Cristu, mit tʉgajatsʉ̱nap tʉntu'gumu po Cristu tsʉ̱nap tʉnjo̱tni'c. Jinap tʉtsʉ̱nap en ayʉ̱́j vida, po tʉtsʉ̱nap pa tʉs̈cupʉjcawa'n Dios iway jeme tʉs̈wanway mit jeme ni-entrega̱jtʉway pa ʉ̱.

²¹Tʉngacuyaguip ayé favor iyacpay Dios, ni'c natsʉ̱́ngate yacs̈ic mit ayé ley, jalmanu i-o'jc Cristu.