Read Sayula Popoluca Gálatas 3 Bible Online

Gálatas 3 - Sayula Popoluca bible

Gálatas 3

¹¡Oh jayajwat Galaciajatway mitontojo'jcat! ¿Pʉn itrastorna̱t incopajcat pigajayaumayga lo que iyacs̈ta'cway? Ʉ̱ tʉ-ajque's̈cʉs̈au pajcu ni'c Jesucristu tsʉ̱nau crucifica̱tic.

²Tʉnwamp tʉs̈jawiwa'n ayʉ̱́j: ¿Impʉctsougau Espíritu Santu ni'c incumplia̱tcau Moisés iley o ni'c incupʉjcau ayé inmaraugaway?

³¿Is̈jawiga mitontojo'jcat? Michu̱chigau mit Espíritu Santu, ¿mit jinap is̈jawiga mitsʉ̱ngáj oy ni'c mijchatu miniconfia̱tcʉjʉp?

⁴¿Intunas̈o'jcau jalmanu? Mijchat injawigap te jalmanu is̈tunás̈caj.

⁵Dios is̈moygau Espíritu Santu, mit iwat milagrujat mam mijchat. ¿Is̈jawiga iwat ayé ni'c incumplia̱tcau ley o ni'c incupʉjcau ayé inmaraugaway?

⁶Abraham icupʉc Dios, jemni'c Dios iguipʉctso̱u as̈am tu'c jayau yacs̈icway.

⁷Jemni'c pi jawiga ni'c jeme cupʉjcapay, aye'jat as̈am Abraham iwajyat.

⁸Mit Dios inʉjmʉ'c ilibruni'c ni'c je' iyacs̈icninʉmgʉs̈áj jeme caje'jatway judíujat te iguicupʉjcap, mit inʉjmʉ'jcau Abraham ayé oyway noticia, inʉm: “Dios i-oyninʉmgʉs̈áj nu'pʉjʉn jayajwat as̈am igui-oyninʉjm je'.”

⁹Jemni'c jeme cupʉjcapay, Dios igui-oyninʉmgáj as̈am igui-oyninʉjm Abraham jeme cupʉcway.

¹⁰Ni'c nu'pʉjʉn jayajwat jeme pensa̱tcapay pa puru ley iguicumplia̱tcawa'n tsʉ̱ngap maldiciona̱tic ni'c ja'yic itsʉ̱na Dios ilibruni'c: “Maldiciona̱tic pʉmba'tu jeme igajayaumaypay nu'pʉjʉn jeme tsʉ̱napay ja'yic leyni'c, ni'c itp ti iguiwatwa'n lo que inʉmpay ley.”

¹¹Najawigap ni'c ayé ley igayacs̈icninʉmp nepʉn mam igui-e'p Dios, ni'c ja'yic itsʉ̱na Dios ilibruni'c: “Dios iyacs̈icninʉmp tu'c jayau jeme cupʉcpay, mit je' tsʉ̱náj oy.”

¹²Po Moisés iley caje' pa jeme cupʉcpay, ni'c inʉmp ayé ley: “Jeme icumplia̱tpay ley, tsʉ̱náj oy.”

¹³Cristu nas̈libra̱tcau pa nagatsʉ̱nga maldiciona̱tic por ayé ley ni'c je' tsʉ̱nau maldiciona̱tic pa ʉjtsat. As̈am itsʉ̱na ja'yic Dios ilibruni'c: “Maldiciona̱tic pʉmba'tu jeme tsʉ̱námpay tʉyic en tu'c cujy.”

¹⁴Jat we'n pa Dios igui-oyninʉmgʉs̈wa'n jeme caje'jatway judíujat te icupʉjcap Cristu Jesús ni'c we'n igui-oyninʉjm Abraham, mit napʉctsougáj ayé Espíritu Santu iprometia̱tway Dios ni'c nacupʉjcap.

¹⁵Hermanujat, tʉmoygʉs̈áj tu'c ejemplu. Te jayajwat iwatcap tu'c acuerdu mit te inipo'ngap, nepʉn iga-actogoyda̱cp ne igatigatsp.

¹⁶Mit Dios imoy tu'c promesa Abraham mit jeme pichinámpay ifamiliani'c. Iganʉmu ni'c ayé promesa pa iwajyat as̈am te mayo'jcat, po imoy pa tu'gu. Inʉm: Ayé promesa pa jeme pichinámpay infamiliani'c, mit ayé inʉmo'jcʉp Cristu.

¹⁷Tʉnyʉmo'jcʉp ni'c Dios iwajtʉ'c tu'c acuerdu mit Abraham, mit Moisés iley jeme minway cuatrocientos treinta años después igaja-actogoyda̱gu ayé acuerdu pa iguiyacwa'n jalmanu ayé promesa.

¹⁸Te napʉctsougap nu'pʉjʉn ni'c najayaumaygap ley, cajavalia̱tp lo que iprometia̱tway Dios. Po Dios iprometia̱jtau Abraham ni'c ipʉctsowáj we'nujyu nu'pʉjʉn iguimo'ámpay Dios.

¹⁹¿Pa ti oy ayé ley? Ayé ley iyajcau pa nas̈culpa̱tcáj hasta tegamimp Cristu jeme i-acminway Dios, mit je' ipʉctso̱u ayé promesa. Mit ángejlat itumuyajcau ayé ley Moisés, mit Moisés imoygʉs̈ ayé ley pa jayajwat ma jayaumayga, mit je' tan as̈am tu'c cowampay.

²⁰Mit tu'c cowampay igacowamp tu'gu jayau, po Dios itu'gumu iguiyajc ayé promesa.

²¹¿Is̈jawiga ayé ley i-atucp ayé promesajat iyacway Dios? Caje' we'n. Ni'c te ayé ley iyacway Dios oyapate nas̈moygap vida, iyacs̈ta'cway nas̈yacs̈icninʉmgájate ayé ley.

²²Po Dios ilibru inʉmp ni'c nu'pʉjʉn jayajwat tsʉ̱ngap to'ctʉgʉyic mit ma̱jlat, po jeme icupʉjcámpay Jesucristu ipʉctsougáj ayé promesa iyacway Dios.

²³Po antes nas̈cupʉ́jcaj Jesucristu, ayé ley nas̈actsʉ̱ngau as̈am presujat, mit to'ctʉgʉyic natsʉ̱́ngaj hasta nas̈jáwigaj ni'c nacupʉjcap Jesucristu.

²⁴Mit ayé ley nas̈manda̱tcau as̈am tu'c amayipay hasta imijn Cristu, mit nacupʉjcau je' pa Dios nas̈pʉctsougáj.

²⁵Po como nacupʉjcanup Cristu, nas̈cajamanda̱tcap ayé ley as̈am amayipay.

²⁶Ni'c mijchat minu'pʉjʉjnat is̈wajyat Dios ni'c incupʉjcap Cristu Jesús.

²⁷Mijchat minʉ'gutemijcat ni'c inmutʉgʉygau Cristu, mit jinap inaguepcanup nam vida mit je'.

²⁸Dios niwe'nu igui-e'pcʉs̈ nu'pʉjʉn jayajwat, judíujat mit jeme caje'jatway judíujat, mozojat mit jeme yo'ygapay libre, qui'chajyat mit to's̈ajyat, ni'c minu'pʉjʉjnat as̈am tu'jcatu ni'c incupʉjcap Cristu Jesús.

²⁹Mit te mijchat is̈wajyat Cristu, iyacs̈ta'cway mijchat is̈wajyatey Abraham, mit impʉctsougáj lo que iprometia̱tway Dios.