Read Sayula Popoluca Gálatas 4 Bible Online

Gálatas 4 - Sayula Popoluca bible

Gálatas 4

¹Po tʉnyʉmpey ayʉ̱́j: Cuandu ya̱unaj jeme ipʉctsowámpay nu'pʉjʉn, je' tsʉ̱napnaj as̈am mozo maja imanda̱twa'naj.

²Mit je' iguimanda̱tcapnaj amayipajyat mit mozojat hasta ayé s̈ʉjw iguimo'áj derechu ite̱t.

³Ʉjtsat we'ney. Antes imijn Cristu, natsʉ̱ngau as̈am yauya̱wájat, mit natsʉ̱ngawey as̈am mozojat ni'c nas̈-obliga̱tcau nas̈cupʉjcawa'n ampay creenciajat jeme itway en ayʉ̱́j mundu.

⁴Po cuandu icumplia̱jt ayé tiempu, Dios i-ajyu't iway en ayʉ̱́j mundu pa i-itwa'n, mit je' ijayaumaywey ayé ley.

⁵Je' min pa nas̈libra̱tcáj ni'c natsʉ̱ngau to'ctʉgʉyic mit ayé ley, pa ma oya Dios nas̈wayjatcáj.

⁶Mit como mijchat is̈wajyat Dios, Dios mit iway Jesucristu i-ajyu'tcau ayé Espíritu Santu pa ma tan injo̱tni'jcat, mit jemni'c nas̈nʉ́mgaja Dios: “Majyigac Padre.”

⁷Mit jinap migajaje'jat mozojat po mijchat is̈wajyat Dios. Mit te mijchat is̈wajyat Dios, we'ney Dios is̈actupʉctsougáj nu'pʉjʉn ni'c incupʉjcap Cristu.

⁸Iyacs̈ta'cway ámbanu cuandu is̈ca-is̈cápcaj Dios, mitsʉ̱ngau to'ctʉgʉyic mit ayé jeme caje'jatway diosat.

⁹Po jinap inis̈capcap Dios, o más bien Dios is̈-is̈capcap mijchat. ¿Mit jinap tini'c impitujcatu mit ayé ampay creenciajat jeme ca-itcʉjʉpay neti, mit inwangapatu intsʉ̱ngawa'n to'ctʉgʉyic mit je'jat?

¹⁰Inguarda̱tcap s̈ʉjwat, po'jat, tiempujat mit s̈iwijtat.

¹¹Tʉpʉ̱tp tʉgayos̈wat jalmanu mit mijchat.

¹²Hermanujat, tʉyo'tcʉs̈ap pi cuyáguiga ayé ampay ley as̈am ʉ̱ tʉs̈wajt, ni'c ʉ̱ tʉniwajtʉu pa tʉtsʉ̱nawa'n as̈am mijchat. Nejʉmay mal is̈cawatcajawu.

¹³Injawigap ni'c primeru tʉ-ajque's̈cʉs̈au oyway noticia ni'c tu'nij tʉtsʉ̱́naj tʉncuerpuni'c. Jemni'c tʉtajn mit mijchat.

¹⁴Mit is̈ca-ángawu ne is̈ca-acpo'jcawu cuandu tʉtsʉ̱́naj tu'nij tʉncuerpuni'c, po is̈pʉctsougau as̈am tu'c ángel i-ajyu'tway Dios, as̈am Cristu Jesús.

¹⁵¿Cajaji'cp injo̱jtat as̈am primeru? Primeru ʉ̱ is̈wano'jcau, ni'c te oyap, inchi'tcájate inwijnat pa is̈moygáj.

¹⁶¿Is̈jawiga jinap is̈-ambʉjcap ni'c tʉnʉmgʉs̈ap jeme iyacs̈ta'cway?

¹⁷Ayé maljayajwat is̈che'ngap mayo'c po caje' pa intsʉ̱ngawa'n oy. Iwangap is̈atujcáj pi mutʉgʉyga je'jat.

¹⁸Po oyate te jayajwat is̈che'ngap pa intsʉ̱ngawa'n oy, mit ʉ̱ tʉche'ngʉs̈pey pi tsʉ̱nga oy po caje'yu cuandu tʉtsʉ̱nawa'n mit mijchat.

¹⁹Mijchat tʉ-e'pcʉs̈p as̈am tʉ̱wájyat. Jinap tʉntunas̈patu pa mijchat as̈am tu'c to's̈ay ta̱go'jcʉpay, ni'c tʉnwamp ma tan Cristu injo̱tni'jcat pa pi namjatca-atu.

²⁰Tʉnwamp tʉtsʉ̱nawa'n jinap mit mijchat pa tʉ-oymucotscʉs̈wa'n, ni'c tʉngajawip nat intsʉ̱nga.

²¹Nʉmgajac mijchat inwangapay is̈manda̱tcáj ley, ¿inganimaraugap ti inʉmpay ayé ley?

²²Ni'c ja'yic itsʉ̱na ni'c Abraham ijtʉu mechc iway, tu'c itumuwat icocinera inʉ'jyway Agar, mit jatu'cway itumuwat ito's̈ay Sara jeme manda̱tpay.

²³Mit ayé cocinera iway wename'yu i-ijt, po ayé to's̈ay jeme manda̱tpay ijtʉu iway por tu'c promesa iyacway Dios.

²⁴Ayʉ̱́j as̈am tu'c cuentu natumuquips̈pay, ni'c ayé to's̈ajyat as̈am mechc acuerdujat iwatway Dios. Tu'c acuerdu iwat en ayé copac Sinaí, mit jeme ipʉctsougámpay ayé acuerdu to'ctʉgʉyic itsʉ̱ngawa'n as̈am ayé cocinera Agar.

²⁵Ni'c Agar as̈am ayé copac Sinaí tsʉ̱napay Arabia, mit Agar as̈am Jerusalén mam itsʉ̱nga judíujat jinap, mit je' mit iwajyat tsʉ̱ngap to'ctʉgʉyic as̈am mozojat.

²⁶Po itp jatu'c Jerusalén tsʉ̱napay tsajpni'c mit ayé libre itsʉ̱na, mit ayé as̈am tu'c nama̱m pa ʉjtsat nanu'pʉjʉjnat.

²⁷Ni'c ja'yic itsʉ̱na Dios ilibruni'c: Ma ji'c ijo̱jt ayé to's̈ay ca-ijtʉpay iway. Ma ji'cta'c ijo̱jt ayé to's̈ay jeme capʉcpayate icuerpu pa ita'cwa'n. Ni'c aye' to's̈ay cuyaguiyicway más ijtʉ̱́j iwajyat que jeme ijtʉpay ina'u.

²⁸Hermanujat, ʉjtsat as̈am Isaac, Sara iway, ni'c napʉctsougáj ayé promesa iyacway Dios.

²⁹Po ayé cocinera iway jeme itway wename'yu ipo'ctan Isaac jeme itway por ayé promesa iyacway Espíritu Santu. Wename jinap ijat.

³⁰Po ¿ti inʉmp Dios ilibruni'c? Acpichin ayé cocinera mit iway, ni'c ayé cocinera iway igapʉctsowáj neti. Solo iway ayé to's̈ay jeme manda̱tpay ipʉctsowáj nu'pʉjʉn.

³¹Jemni'c, hermanujat, nagaje'jat nas̈wajyat ayé cocinera, po ʉjtsat nas̈wajyat ayé to's̈ay jeme manda̱tpay.