Read Sayula Popoluca Gálatas 5 Bible Online

Gálatas 5 - Sayula Popoluca bible

Gálatas 5

¹Cristu is̈libra̱tcaway. Jinap tanga mʉgʉc mit camjatsʉ̱nga to'ctʉgʉyic as̈am mozojat.

²Maraugac. Ʉ̱ Pablo tʉnʉmgʉs̈ap ni'c te mitsʉ̱ngap marca̱tic as̈am judíujat inimarca̱tcʉjʉ, inyajcap jalmanu Cristu.

³Tʉnyʉmgʉs̈ap nu'pʉjʉn jayajwat jeme nimarca̱jtʉ́mpay wename, itp ti iguiguarda̱twa'n nu'pʉjʉn Moisés iley.

⁴Migajatsʉ̱ngap mit Cristu te inwangap is̈yacs̈icninʉmgáj ayé ley. Incuyaguigaway ayé favor iyacway Dios.

⁵Mit ʉjtsat na-atsʉ̱ngap nas̈yacs̈icninʉmgáj Dios, mit nacupʉjcap ni'c Espíritu Santu nas̈actu-atsʉ̱ngap ayé jatámpay.

⁶Ni'c te namutʉgʉygap Cristu Jesús, cavalia̱tp te namarca̱tic o te nagamarca̱tic. Más valia̱tp te naniwangʉjʉp pa jayajwat ma e'pca ni'c nacupʉjcap.

⁷Miyo'ygapate oymanac. ¿Jinap pʉn is̈atujcap pigajayaumayga lo que iyacs̈ta'cway?

⁸Dios is̈ya̱s̈cau, po caje' as̈am ayé jeme is̈jomigapay.

⁹Pi nijawiga ni'c s̈ʉ̱n levadura i-actimamp nu'pʉjʉn harina-cʉ't

¹⁰Tʉconfia̱tp mit el Señor ni'c migajatigatscáj, po pʉmba'tu jeme is̈trastorna̱tcapay, Dios iguijuzga̱táj.

¹¹Hermanujat, te ʉ̱ tʉnajque's̈tacyo'yp ni'c jayajwat ma nimarca̱tcʉjʉ, ayé judíujat tʉs̈capo'ctangájate. Te tʉnyʉmgʉs̈ap jayajwat ma nimarca̱tcʉjʉ, másta judíujat caja-awa'nigáj ni'c tʉnyʉmdacyo'yp ni'c Cristu o'c cunu̱s̈ni'c.

¹²Ayé jayajwat jeme is̈jomigapay, ¡mejor ma nitsújcʉjʉ je'jatu!

¹³Hermanujat, Dios is̈ya̱s̈cau pa pi tsʉ̱nga libre. Solo camabusa̱tca ayé libertad pa is̈watcawa'n lo que iyo'tpay injo̱jtat, po nimájyigʉjʉ ni'c miniwangʉjʉp.

¹⁴Ni'c nu'pʉjʉn ley tsʉ̱nap cumplia̱tic te najayaumaygap lo que inʉmway Dios: “Inwa'náj inmupro̱wije̱way as̈am mi̱ inyiwajnʉ.”

¹⁵Po te mini-ago'jcʉjʉp mit te mitsuguinwatcap, nicuidá̱tcʉjʉ piganicʉs̈cʉjʉ.

¹⁶Tʉnyʉmp ayʉ̱́j: Yo'yga mit Espíritu Santu mit we'n ingawatcáj ayé mal iyo'tpay injo̱jtat.

¹⁷Ni'c te inwangap ayé mal iyo'tpay injo̱jtat, ingawangáj lo que Espíritu Santu iwampay. Mit te inwangap lo que Espíritu Santu iwampay, ingawangáj ayé mal iyo'tpay injo̱jtat. Espíritu Santu igamunipʉjcʉp mal cosajat, jemni'c ca-oyap is̈wátca lo que inwangapay.

¹⁸Po te Espíritu Santu is̈wejnu'pcajap, ayé ley is̈cajamanda̱tcáj.

¹⁹Mit najawigap ti ayé ma̱jlat iyo'tpay jayajwat ijo̱jtat: iwangap jayto's̈ay, chajyo'ygap, iwatcap mal, iwatcada̱jcap tigapa'tu,

²⁰iwangap tiyu̱s̈at, ipʉctangap tso'c, i-angap tu'c jayau, tsuguinwatcap, imu-awa'nigap pʉmba'tu, awa'ni-o'jcap, imutsuguinwatcap tambʉn, iwatcap división, catsʉ̱ngap de acuerdu,

²¹i-angap jeme ijtʉpay, ago'jcap, u̱ctupʉjcap, u̱ctacyo'ygap, mit iwatcap japu̱t cosajat as̈am ayʉ̱́jway. Mit tʉnʉmgʉs̈ap as̈am tʉs̈nʉjmʉ'jc, ni'c jeme iwatcapay ayé cosajat igapʉctsougáj neti en ayé lugar mam imanda̱t Dios.

²²Po ayʉ̱́j ayé lo que iwatpay Espíritu Santu pa ʉjtsat: Nas̈acniwangʉjʉp, nas̈acji'jcajap najo̱jtat, nas̈moygap paz, nas̈moygap calma, nas̈acjayawangap, nas̈actuwatcap oy, nas̈actugupʉjcap Dios,

²³naganimʉjninʉmgʉjʉp, nagawatcada̱jcap tigapa'tu. Mit ca-itp nejʉmay ley contra ayé, ni'c ayé puru cosa ojyatway.

²⁴Po Cristu iwajyat tsʉ̱ngap as̈am crucifica̱tic mit je', mit igajawangap ayé mal iyo'tpay ijo̱jtat, mit nejʉmay mal igajawangap.

²⁵Te Espíritu Santu tsʉ̱nap najo̱tni'jcat, nayo'yga-ey as̈am je' iguiwa'n.

²⁶Naganimʉjninʉ́mgʉjʉ, naga-ac-awa'niga nahermanujat, nagani-ángʉjʉ.