Read Sayula Popoluca Gálatas 6 Bible Online

Gálatas 6 - Sayula Popoluca bible

Gálatas 6

¹Hermanujat, te tu'c jayau iguimijnap de repente tu'c mal pa ica'wa'n, mijchat inmuyo'ygapay Espíritu Santu pi ajca's̈ʉ'jca, mit camnimʉjninʉmgʉjʉ. Mejor nicuidá̱tcʉjʉ pi is̈catenta̱tcaguey.

²Nimájyigʉjʉ cuandu is̈tunas̈cawa'n, mit wename incumplia̱tcáj ayé namay ley iyacway Cristu.

³Ni'c jeme inʉmpay ni'c je' mʉjayau mit caje' neti, je'yu niwe̱jtʉp.

⁴Po cada jayau ma e'p ti iwatámpay je'yu, mit we'n ji'gáj ijo̱jt, mit igapʉgáj fama de jatu'c jayau.

⁵Ni'c cada jayau imunʉs̈áj je'yu itsʉm.

⁶Jeme ipʉctajnapay Dios ipalabra ma mo' nu'pʉjʉn cosa inesita̱tpay jeme igui-ajque's̈away.

⁷Pi is̈cawe̱jta̱jcac nepʉn: Dios ca-oyap nas̈tus̈í̱jca. Ni'c lo que ini'pámpay tu'c jayau, ayé icosecha̱táj.

⁸Jeme iwatpay lo que iwampay icuerpu, togoyáj. Po jeme iwatpay lo que iwampay Espíritu Santu, ayé Espíritu iguimo'áj vida cacʉs̈ámpay.

⁹Naganicansá̱tcʉjʉ nas̈watcawa'n jeme oyway, ni'c itiempuni'c nacosecha̱tcáj te nagadesmaya̱tcap.

¹⁰Cuandu i-oyawa'n, nawátcaja oy nu'pʉjʉn jayajwat, mit más nawátcaja oy jeme cupʉjcapay.

¹¹E'pca ni'c tʉja'ygʉs̈ap tʉncʉ'ni'c mit letra majatway.

¹²Nu'pʉjʉn iwangapay itsʉ̱ngawa'n oy mit jayajwat, is̈-obliga̱tcap pi nimarca̱tcʉjʉ. Iwatcap we'n ni'c igawangap iguitunas̈cawa'n pa Cristu jeme o'cway cunu̱s̈ni'c.

¹³Ni'c jeme nimarca̱tcʉjʉpay, igaguarda̱tcap ayé ley, po iwangap ini-oyninʉmgʉjʉwa'n ni'c is̈acnimarca̱tcʉjʉp incuerpuni'jcat.

¹⁴Ne Dios magawa'n tʉni-oyninʉjmʉwa'n. Solo ji'cp tʉnjo̱jt ni'c el Señor Jesucristu o'c cunu̱s̈ni'c pa ʉ̱. Mit jemni'c ayʉ̱́j mundu tʉnaguep as̈am o'guic, mit ʉ̱ tʉtsʉ̱nap as̈am o'guic mit ayʉ̱́j mundu.

¹⁵Ni'c jeme imutʉgʉygapay Cristu Jesús cajavalia̱tp te marca̱tic o te camarca̱tic, solo valia̱tp te namjátcaway.

¹⁶Mit nu'pʉjʉn jeme yo'ygapay mit nam vida, Dios ma iguimoygac paz mit ma igui-ayo̱wis̈cac, mit we'ney pa Israejlatway jeme cupʉjcapay.

¹⁷Jinap pa jʉpm nepʉn ma tʉs̈cajomiyac ni'c tʉnmuyo'ynup marca tʉncuerpuni'c mam tʉs̈moygau, ni'c tʉntunas̈way pa el Señor Jesús.

¹⁸Hermanujat, el Señor Jesucristu pi is̈moygac favor injo̱tni'jcat. Amén.