Read Sayula Popoluca Efesios 2 Bible Online

Efesios 2 - Sayula Popoluca bible

Efesios 2

¹Dios is̈moygau vida cuandu intsʉ̱́ngaj as̈am o'guijcatway ni'c ingajayaumaygawu Dios mit inwato'jcau mal.

²Mit ámbanu miyo'ygau en ayé malto̱jwat, mit inwatcau as̈am maljayajwat iguiwatca en ayʉ̱́j mundu, mit injayaumaygau ayé mal-espíritu jeme manda̱tpay s̈e'mni'c, mit jinap ayé malwayna' imuyos̈watcʉs̈p jeme igajayaumaygapay Dios.

³Mit ámbanu ʉjtsat nanu'pʉjʉjnat nayo'ygawey as̈am iguiyo'jt najo̱jtat, mit as̈am nas̈wángaj, mit as̈am namalpensá̱tcaj. Mit desde ámbanu nagawatcawu oy, nawatcau puru mal, jemni'c nas̈merecia̱tcapate Dios nas̈castiga̱tcáj, mit japu̱t jayajwat iguimerecia̱tcapey we'n.

⁴Po Dios nas̈-ayo̱wis̈o'jcau mit nas̈wano'jcau.

⁵Mit cuandu natsʉ̱́ngaj as̈am o'guic mit nama̱jlat, je' nas̈moygau vida ni'c namutʉgʉygau Cristu, mit nas̈salva̱tcau ni'c nas̈moygau favor,

⁶mit como namutʉgʉygau Cristu, jinap natsʉ̱ngap as̈am Dios nas̈acjutucta̱jcaway mit je', mit natsʉ̱ngap oy mit Cristu Jesús as̈am natsʉ̱nganupay en ayé lugajrat tsajpni'cway.

⁷Mit Dios nas̈actujawigáj pa nu'pʉjʉn tiempu ni'c je' nas̈wano'jcau, mit nas̈watcajau oy ni'c namutʉgʉygau Cristu Jesús.

⁸Mitsʉ̱ngap salva̱tic ni'c Dios is̈moygau favor ni'c incupʉjcau je', caje' ni'c inwatcau oy, po Dios is̈acmingajau ayé favor as̈am tu'c regalu.

⁹Caje' ni'c tu'c jayau iwatp oy pa inisalva̱jtʉwa'n, ni'c we'n oyáj inimʉjninʉjmʉ.

¹⁰Ni'c Dios nas̈watcau, mit nas̈namwatcawatu ni'c namutʉgʉygau Cristu Jesús, pa we'n nawatcajáj lo que oyway, ni'c Dios ipensa̱t ámbanu pa nas̈watcawa'n cosa oyway.

¹¹Jemni'c nijáwiga ni'c en tu'c tiempu mijchat mipe'ta̱majyat, migatsʉ̱ngawu marca̱tic incuerpuni'jcat, mit ayé judíujat jeme tsʉ̱ngapay marca̱tic is̈ca-e'po'jcʉjʉwu ni'c migamarcá̱tijcat. Po je'jat marcá̱tijcat icuerpuni'jcatu.

¹²En ayé tiempu inga-aguepcawu Cristu injo̱tni'jcat ne inga-aguepcawu parte mit Israejlatway, ingajawigawu ayé acuerdujat iprometia̱tway Dios, mit en ayʉ̱́j mundu inga-atsʉ̱ngapate neti, mit inga-aguepcawu Dios injo̱tni'jcat.

¹³Po jinap inmutʉgʉygau Cristu Jesús. Ambanu yagatso'c intsʉ̱́ngaj po jinap mitsʉ̱ngap tom mit Dios ni'c Cristu o'c cunu̱s̈ni'c pa mijchat.

¹⁴Cristu i-acnicowangʉs̈ʉu judíujat mit jeme caje'jatway judíujat, mit i-actogoyda̱c ayé ley jeme itway as̈am ayé me's̈, mit ayé isepara̱tpate judíujat mit jeme caje'jatway judíujat.

¹⁵Cristu itunas̈ pa igui-acnicowangʉs̈ʉ judíujat mit jeme caje'jatway judíujat, mit i-actogoydá̱guey ayé ley jeme nas̈manda̱tcapayate. Iwat we'n pa judíujat mit jeme caje'jatway judíujat ma jatca tu'gujyu, as̈am namjayajwat, pa ma cʉs̈ ayé tsuguin.

¹⁶Je' o'c cunu̱s̈ni'c pa Dios magamu-awa'nigʉs̈ judíujat ne jeme caje'jatway judíujat, po ma tanga as̈am tu'gu cuerpu, mit magajatsuguinwátca.

¹⁷Cristu min mit inʉmdacyo'y i-oyway noticia ni'c itp paz pa mijchat mitsʉ̱ngapayate yagats, mit we'ney pa judíujat jeme tsʉ̱ngapay tom mit Dios.

¹⁸Mit como Cristu nas̈cowangau mit Dios, jinap tu'gu Espíritu nas̈acnigutómigʉjʉp nanu'pʉjʉjnat mam itsʉ̱na Dios Nate̱jat.

¹⁹Mit jinap migajaje'jat pe'ta̱majyat ne migajatsʉ̱ngap yagats, po inaguepcap parte mit Dios ijayajwat, mit inmutʉgʉygawey nu'pʉjʉn icupʉjcapay Dios.

²⁰Mijchat incupʉjcap ayé ama̱s̈an iyajcaway apóstojlat mit profetajat jeme cotscaway pa Dios, mit ayé as̈am tu'c base, mit Jesucristu as̈am ayé tsa' tsʉ̱napay esquinani'c mit ayé itsʉmtso̱p nu'pʉjʉn.

²¹Mit mijchat micupʉcpajyat mitsʉ̱ngap as̈am tu'c tʉjc bien watic ni'c incupʉjcap Jesucristu, mit miye'jcáj más hasta injatcawa'n as̈am tu'c templu aparta̱ticway pa Dios, mit je' tsʉ̱náj injo̱tni'jcat.

²²Mit mijchat minu'pʉjʉjnat Dios is̈watcau as̈am tu'c tʉjc mam je' itsʉ̱nawa'n ni'c ayé Espíritu Santu tsʉ̱náj injo̱tni'jcat.