Read Sayula Popoluca Efesios 3 Bible Online

Efesios 3 - Sayula Popoluca bible

Efesios 3

¹Ʉ̱ Pablo tʉnservia̱jtap Cristu Jesús, mit jinap tʉtsʉ̱nap presu ni'c tʉnʉmgʉs̈au oyway noticia mijchat migaje'jatway judíujat.

²Injawigap ni'c Dios tʉs̈moy favor mit tʉs̈-encarga̱t pa tʉ-ajque's̈cʉs̈awa'n oyway noticia pa mijchat.

³Mit Dios tʉs̈actujawiu lo que jayajwat igajawigapayate, mit ayʉ̱́j ayé lo que tʉnja'jyʉ'cway.

⁴Cuandu is̈cotscawa'n ayʉ̱́j noc, oyáj is̈jawiga ni'c tʉnis̈cap jeme jayajwat igajawigapayate, ni'c tʉnjawip lo que Cristu iwatway pa ʉjtsat.

⁵Mit ámbanu Dios iga-actujawigʉs̈u jayajwat, po jinap Espíritu Santu i-actujawigʉs̈p i-apóstojlat mit ayé profetajat jeme icupiugʉs̈way.

⁶I-actujawigʉs̈ ni'c jeme caje'jatway judíujat ipʉctsougámpey as̈am iguipʉctsougawa'n judíujat, ni'c je'jat tsʉ̱ngap as̈am tu'gu cuerpu mit ipʉctsougámpey ayé promesa ni'c imutʉgʉygawey Cristu Jesús, ni'c imaraugawey ayé oyway noticia.

⁷Mit tʉnajque's̈tacyo'yp ayé oyway noticia ni'c Dios tʉs̈moy favor, ni'c je' ito'jcʉp poder pa iguiwatwa'n nu'pʉjʉn cosajat.

⁸Ʉ̱ tʉtsʉ̱nap más menus de nu'pʉjʉn Dios ijayajwat, po majawe'naj Dios tʉs̈moy ayʉ̱́j favor pa tʉs̈nʉmdacyo'ywa'n ayé oyway noticia pa jeme caje'jatway judíujat. Ayé oyway noticia nas̈actujawigap nu'pʉjʉn cosa más ojyatway nas̈moygapay Cristu.

⁹Tʉnactu-e'pcʉs̈áj nu'pʉjʉn jayajwat lo que Dios iwanway iguiwatwa'n desde ámbanu, mit jayajwat igajawigapate ti ayé, mit je' iwat nu'pʉjʉn cosajat.

¹⁰Mit jinap Dios i-actujawigʉs̈p ángejlat mit nu'pʉjʉn manda̱tcapay tsajpni'c ni'c je' más iwangʉs̈p ijayajwat ni-apʉcmújcʉjʉpay en ayʉ̱́j mundu. Mit ayé ángejlat ijawigáj ni'c Dios ijawip nu'pʉjʉn.

¹¹Dios ipensa̱t ámbanu ti iwatámpay Jesucristu el Señor pa ʉjtsat.

¹²Namutʉgʉygap Cristu ni'c nacupʉjcap je', mit oyap nas̈mucótsca Dios mit nagapʉ̱tcáj nes̈ʉ̱n nas̈cutomigawa'n je'.

¹³Jemni'c tʉnʉmgʉs̈a pigadesmaya̱tca is̈maraugawa'n ni'c tʉntunas̈p pa mijchat, ni'c tʉntunas̈p pa mijchat pi tsʉ̱nga oy.

¹⁴Dios nas̈actujawigap mʉjway cosajat. Jemni'c tʉnicos̈atendá̱jcʉ pa tʉs̈-ora̱jtawa'n el Señor Jesucristu ite̱t.

¹⁵Mit ʉjtsat natsʉ̱ngapay na̱s̈ni'c mit nu'pʉjʉn tsʉ̱ngapay tsajpni'c, nanu'pʉjʉjnat nate̱jtat Dios.

¹⁶Dios ijtʉp nu'pʉjʉn cosa oymanacway pa nas̈moygáj. Jinap tʉnyo'jtap je' pi is̈moygac nu'pʉjʉn maj injo̱tni'jcat, mit Espíritu Santu ayé is̈moygámpay maj.

¹⁷Tʉnyo'jtap Cristu ma tsʉ̱na injo̱tni'jcat ni'c incupʉjcap je', pa we'n je' is̈acniwangʉjʉ̱́j cada s̈ʉjw.

¹⁸Tʉnyo'jtap Dios ma is̈actujawigac ni'c Cristu nas̈wano'jcap, ni'c je' iwangʉs̈p nu'pʉjʉn ijayajwat. Cristu nas̈wangap mit ayé as̈am tu'c cosa más awa'tsway, más yagatsway, más yucmay mit as̈am tu'c cosa ca-ijtʉpay fin.

¹⁹Pi jawiga ni'c Cristu nas̈wano'jcap hasta nagajawigap nat nas̈wangap, mit we'ney pi aguepca nu'tsic nu'pʉjʉn cosa oyway nas̈moygapay Dios.

²⁰Na-oyninʉ́mga ayé Dios jeme oyapay iguiwat nu'pʉjʉn cosajat. Je' oyap iguiwat más de lo que nayo'tcajapay mit más de lo que najawigapay, ni'c je' nas̈moygap maj najo̱tni'jcat.

²¹Nu'pʉjʉn cupʉcpajyat jeme imutʉgʉygaway Cristu Jesús ma oyninʉmga Dios jinap mit pa nu'pʉjʉn tiempu. Amén.