Read Sayula Popoluca Efesios 6 Bible Online

Efesios 6 - Sayula Popoluca bible

Efesios 6

¹Nu'pʉjʉn ya̱wájat ma jayaumayga ima̱jmat mit ite̱jtat as̈am iguijayaumáyga el Señor, mit oy ma watca wename.

²Oyninʉm inte̱t mit inma̱m, ni'c ayʉ̱́j ayé imanda̱tway Dios primeru, mit iyac tu'c promesa pa jeme ijayaumaypay ayé mandamientu.

³Iprometia̱t ni'c mitsʉ̱ngáj oy, mit inaguepcáj vida yagatsway en ayʉ̱́j mundu.

⁴Jayajwat, camac-awa'niga inwajyat, po acye'jca bien yacs̈ic, mit actupʉctánga lo que inʉmpay el Señor.

⁵Mozojat, jayaumáyga injaycat jeme tsʉ̱ngapay en ayʉ̱́j mundu, pʉ̱́tca mit respetá̱tca je'jat. Jayaumáyga mit nu'pʉjʉn injo̱jtat as̈am is̈jayaumáyga Cristu.

⁶Yos̈wátca mit injaycat, caje'yu cuandu is̈-e'pcap, po yos̈wátca as̈am iguiwátca Cristu imozojat, mit watca mit nu'pʉjʉn injo̱jtat lo que iwampay Dios.

⁷Yos̈wátca oy ni'c inservia̱tcajap el Señor mit caje' pa jayajwatu.

⁸Injawigap ni'c jeme iwatpay oy, wename-ey iguitso'gáj el Señor, te yos̈watp jayyos̈ni'c o te iwatp je'yu iyos̈.

⁹Mit mijchat mijefejat, watca ni-as̈amu mit inmozojat. Cammu-awa'ncotsca mʉgʉc. Injawigap ni'c tsʉ̱nap tsajpni'c jeme is̈manda̱tcapay mijchat mit we'ney je'jat, ni'c el Señor niwe'nu igui-e'pcʉs̈ nu'pʉjʉn jayajwat.

¹⁰Hermanujat, tsʉ̱́nga mʉgʉc mit el Señor ni'c je' ito'jcʉp maj pa is̈majyigáj.

¹¹Muyo'yga nu'pʉjʉn arma is̈moygapay Dios, pa we'n Awayagatsna' ca-oyáj is̈watcajap neti mit imaña.

¹²Ni'c nagalucha̱tcap mit jayajwat, nalucha̱tcap mit mal-espíritujat jeme manda̱tcapay mit i-acyo'ygap jayajwat chitimicni'c ni'c je'jat imanda̱tcap nu'pʉjʉn mundu, mit ayé mal-espíritujat manda̱tcapey s̈e'mni'c.

¹³Jemni'c muyo'yga nu'pʉjʉn arma is̈moygapay Dios, pa we'n oyáj is̈majmóyga cuandu is̈mingajáj tu'c mal s̈ʉjw. Mit te inmuyo'ygap nu'pʉjʉn arma, mitangáj mʉgʉc.

¹⁴Siguiá̱tca mʉgʉc ni'c injawigap lo que iyacs̈ta'cway, mit mitsʉ̱ngáj prepara̱tic as̈am tu'c soldaj jeme i-actsʉ'cs̈pay ipi̱nic. Mit watca oy mit mitsʉ̱ngáj prepara̱tic as̈am tu'c soldaj icompay ichec waticway de pus̈an.

¹⁵Tsʉ̱́nga prepara̱tic pa is̈nʉmdacyo'ygawa'n ayé oyway noticia nas̈moygapay paz, mit we'n mitsʉ̱ngáj prepara̱tic as̈am tu'c soldaj jeme tsʉ̱napay listu comic ita'ncʉ'ac.

¹⁶Mit más oy pi watca ayʉ̱́j: cupʉ́jca mʉgʉc mit mitsʉ̱ngáj prepara̱tic as̈am tu'c soldaj itunidefendia̱jtʉpay tu'c mʉjway pus̈an, mit wename inmajmoygáj ayé malwayna', ni'c je' iwa'náj is̈cotcáj, mit icotan as̈am flecha jeme tinimpay.

¹⁷Mit cupʉ́jca ni'c is̈salva̱tcaway Dios, mit mitsʉ̱ngáj prepara̱tic as̈am tu'c soldaj icompay ipus̈ancumo'n. Mit pʉjca ayé espada is̈moygapay Espíritu Santu, mit ayé espada inʉmo'jcʉp Dios ipalabra inyʉmdacyo'ygapay.

¹⁸Na-ora̱tí̱jca nu'pʉjʉn tiempu, mit nayo'tí̱jcaja Dios, mit nas̈majyigáj Espíritu Santu pa na-ora̱tcawa'n. Tsʉ̱́nga prepara̱tic mit camdesmaya̱tca. Ora̱tí̱jca pa nu'pʉjʉn Dios ijayajwat.

¹⁹Orá̱tcajaguey pa ʉ̱, pa cuandu tʉcotswa'n, Dios ma tʉs̈mo'ac ti tʉnyʉmámpay. Pa we'n tʉgapʉ̱táj tʉs̈nʉmwa'n ayé oyway noticia nas̈actujawigapay Dios, ni'c jayajwat igajawigapate ayé oyway noticia.

²⁰Mit Dios tʉs̈ajyu't pa tʉyo'ywa'n pa je', po jinap tʉtsʉ̱nap presu. Yo'tcaja Dios pa tʉgapʉ̱t tʉs̈nʉmdacyo'ywa'n ayé oyway noticia, ni'c wename itp ti tʉcotswa'n.

²¹Mit Tíquico is̈actujawigáj nat tʉtsʉ̱na mit ti tʉnwatpay, ni'c je' tu'c hermanu nawangapay, mit je' imuyos̈watp oy el Señor.

²²Jemni'c tʉs̈ajyu'jt je' mam mijchat pa pi jawiga nat tʉtsʉ̱nga, mit pa pi tsʉ̱nga anima̱tic.

²³Dios Nate̱jat mit el Señor Jesucristu ma moyga paz hermanujat, ma niwangʉjʉ ni'c je'jat cupʉjcap mʉgʉc.

²⁴Dios ma moygʉs̈ favor nu'pʉjʉn jayajwat jeme iwangapay iyacs̈ta'cway el Señor Jesucristu. Amén.