Read Sayula Popoluca Filipenses 1 Bible Online

Filipenses 1 - Sayula Popoluca bible

Filipenses 1

¹Ʉ̱ Pablo mit Timoteo tʉnservia̱tcajap Jesucristu. Tʉnja'ygajap nu'pʉjʉn Dios ijayajwat jeme tsʉ̱ngapay nʉ'jcopac Filipos ni'c je'jat imutʉgʉygau Cristu Jesús. Mit tʉnsaluda̱tcapey ayé jayajwat jeme icuida̱tcajapay Dios ijayajwat mit we'ney jeme majyigapay templuni'c.

²Dios Nate̱jat mit el Señor Jesucristu pi is̈moygac favor mit paz.

³Cada tʉnijawigʉs̈ mijchat, tʉnyʉjmap Dios ni'ctiyu̱s̈.

⁴Cuandu tʉ-ora̱twa'n, tʉnyo'tí̱jcap Dios pa mijchat minu'pʉjʉjnat, mit ji'cp tʉnjo̱jt cuandu tʉ-ora̱tcʉs̈a.

⁵Tʉnyʉjmap Dios ni'ctiyu̱s̈ ni'c ʉ̱ is̈muyos̈watcau pa tʉs̈nʉmdacyo'ywa'n oyway noticia. Ʉ̱ is̈majyigau desde primer s̈ʉjw hasta jinap.

⁶Cuandu chu̱chiu is̈cupʉjca ayé oyway noticia, Dios i-acchu̱chiu tu'c oyway yos̈ injo̱tni'jcat, mit tʉtsʉ̱nap seguru ni'c Dios siguia̱táj is̈majyigap mit je' icʉs̈áj ayé yos̈ i-acchu̱chiway mit mijchat hasta imi'nwa'n Jesucristu.

⁷Tʉwangʉs̈p mijchat minu'pʉjʉjnat mit nu'pʉjʉn tʉnjo̱jt, jemni'c oyo'gu tʉnʉmgʉs̈a we'n. Dios nas̈moygap favor pareju ni'c mijchat is̈cacuyaguigawu cuandu tʉtsʉ̱́na presu cuandu tʉs̈cowa'n ayé oyway noticia mam autoridajat. Ni'c tʉnactujawigʉs̈p ni'c iyacs̈ta'cway ayé oyway noticia.

⁸Dios ijawip ni'c tʉwano'jcʉs̈p mijchat minu'pʉjʉjnat as̈amu Cristu nas̈wangap.

⁹Jinap tʉnyo'jtap Dios pi is̈acniwangʉjʉc más, mit pi is̈actujawigac más mit pi is̈actu-entendia̱tcac nu'pʉjʉn.

¹⁰Pa we'n oyáj is̈cupíuga jeme más oyway, mit we'n mitsʉ̱ngáj limpiu injo̱tni'jcat, mit nepʉn is̈caculpa̱tcáj en ayé s̈ʉjw imi'nwa'n Cristu.

¹¹Mit Jesucristu is̈actuwatcáj puru cosa oyway, pa we'n Dios tsʉ̱náj mʉjninʉmic.

¹²Hermanujat, tʉnwamp pi jawiga ni'c nu'pʉjʉn cosajat tʉs̈jatway tʉs̈pichijnau oy pa más tʉs̈nʉmdacyo'ywa'n ayé oyway noticia.

¹³Mit nu'pʉjʉn soldajat cuida̱tcapay palaciuni'c, mit we'ney japu̱t jayajwat ijawigap ni'c tʉtsʉ̱nap presu ni'c tʉncupʉcp Cristu.

¹⁴Jemni'c nu'pʉjʉn hermanujat ipʉjcau más maj mit el Señor ni'c ijawigap ni'c tʉtsʉ̱nap presu por Cristu, mit jemni'c más capʉ̱tcap iguinʉmdacyo'ygajawa'n Dios ipalabra.

¹⁵Iyacs̈ta'cway una̱c jayajwat inʉmdacyo'ygap Cristu i-oyway noticia ni'c jayau-ano'jcap mit pa igui-acchu̱chigawa'n tsuguin. Po ja-una̱c inʉmdacyo'ygap ni'c je'jat iwangap Cristu iyacs̈ta'cway.

¹⁶Una̱c inʉmdacyo'ygap Cristu i-oyway noticia pa itsʉ̱ngawa'n oy je'jatu, caje' mit nu'pʉjʉn ijo̱jtat. Je'jat ipensa̱tcau ni'c we'n más tʉntunas̈áj cuytujugum.

¹⁷Po ja-una̱c inʉmdacyo'ygap ni'c je'jat ijawigap ni'c tʉntunas̈p presu pa tʉs̈cowajnawa'n Cristu i-oyway noticia, mit jemni'c tʉs̈wangap je'jat.

¹⁸Po ca-itp ti tʉs̈-e'pwa'n. Te inʉmdacyo'ygap pa je'jatu itsʉ̱ngawa'n oy o te inʉmdacyo'ygap iyacs̈ta'cway, majawe'naj ji'cp tʉnjo̱jt ni'c inʉmdacyo'ygap Cristu i-oyway noticia.

¹⁹Mit más ji'gáj tʉnjo̱jt. Tʉnjawip ni'c yam tʉs̈pichijnáj oy ni'c is̈-ora̱tcajap, mit tʉs̈majyiyámpey Jesucristu mit ipoder.

²⁰Tʉngawamp tʉwinchu̱cta'cwa'n, po tʉnyo'jtap Dios pa tʉgapʉ̱t tʉcotswa'n, pa we'n Cristu tsʉ̱náj más mʉjninʉmic ni'c tʉntunas̈p pa je'. Ni'c tʉnwamp Cristu ma tsʉ̱na mʉjninʉmic jinap mit pa siempre. Ca-itp ti tʉs̈-e'pwa'n te tʉtsʉ̱nap o te tʉ-o'cp.

²¹Ni'c te tʉtsʉ̱nap, oyáj más tʉs̈servia̱jta yam Cristu. Mit te tʉ-o'cp, tʉs̈pichijnáj más oy ni'c tʉtsʉ̱náj mit je' tsajpni'c.

²²Po te tʉga-o'cp, más oyáj tʉyos̈wat yam pa Cristu. Jinap tʉngajawip jʉmay más oy.

²³Majo'c tʉs̈cupiwa'n ayé mechc cosa. Tʉnwampate tʉ-o'cwa'n pa tʉtsʉ̱nawa'n mit Cristu, ni'c ayé más oy pa ʉ̱.

²⁴Po pa mijchat más oy tʉtsʉ̱na yam pa tʉmajyigʉs̈wa'n.

²⁵Ʉ̱ tʉtsʉ̱nap seguru ni'c más oy tʉyos̈watwa'n yam pa Cristu, mit tʉtanámnaj mit mijchat pa tʉmajyigʉs̈wa'n, pa we'n más misiguia̱tcáj mʉgʉc mit Cristu, mit ji'gáj injo̱jtat ni'c incupʉjcap je'.

²⁶Mit ji'gáj injo̱jtat ni'c tʉtsʉ̱nájatu mit mijchat, mit wejpu'n na-oyninʉmgáj Cristu Jesús.

²⁷Niportá̱tcʉjʉ oy ni'c incupʉjcap Cristu i-oyway noticia. Pa we'n te nʉs̈p tʉ-e'pcʉs̈ o te tʉganʉs̈p, siempre tʉnwamp tʉs̈marawa'n ni'c mitsʉ̱ngap mʉgʉc mit Dios, mit minigupʉjcʉjʉp minu'pʉjʉjnat, mit milucha̱tcap pareju pa nu'pʉjʉn jayajwat ma cupʉjca ayé oyway noticia.

²⁸Nagapʉ̱́tca namutsuguijnat ni'c najawigap ni'c je'jat togoygáj, po Dios nas̈actujawigap ni'c je' nas̈salva̱tcáj.

²⁹Dios nas̈moygau tu'c mʉjway favor pa nas̈servia̱tcajawa'n Cristu, ni'c nacupʉjcap je' mit we'ney natunas̈cap pa je'.

³⁰Ʉjtsat nalucha̱tcap pareju. In-is̈cau nat tʉs̈tunas̈ pa Cristu, mit jinap injawigap ni'c siguia̱tp tʉs̈tunas̈.