Read Sayula Popoluca Filipenses 2 Bible Online

Filipenses 2 - Sayula Popoluca bible

Filipenses 2

¹Cristu is̈-animá̱tcap, mitsʉ̱ngap consola̱tic ni'c je' is̈wangap, mit Espíritu Santu is̈actsʉ̱ngap as̈am tu'gu. Miniwangʉjʉp mit mini-ayo̱wis̈cʉjʉp.

²Te inwatcap we'n, is̈acji'jcajáj tʉnjo̱jt ni'c mipensa̱tcap tu'gu, mit niwangʉjʉ-ey pa inyos̈watcawa'n tu'gu, pi tsʉ̱nga de acuerdu en nu'pʉjʉn cosa.

³Campensa̱tca inyos̈watcawa'n pa mijchatu mit camnimʉjninʉmgʉjʉ. Más oy pi che'nga pa japu̱t jayajwat ma tsʉ̱nga oy mit caje' mijchatu inyimʉjninʉmgʉjʉwa'n.

⁴Nepʉn magache'n pa je'yu itsʉ̱nawa'n oy, po ma che'n pa japu̱jtat ma tsʉ̱nga-ey oy.

⁵Pensa̱tca-ey as̈am Cristu Jesús ipensa̱jt ni'c je' canimʉjninʉjmʉwu.

⁶Ni'c Cristu nije'yu Dios po je' igawanu itsʉ̱nawa'n mʉjninʉmic as̈am Dios.

⁷Mit iyac iderechu pa itsʉ̱nawa'n mʉjninʉmic as̈am Dios tsajpni'c. Je' jat as̈am tu'c mozo, mit jat as̈am jayau cuandu imijn en ayʉ̱́j mundu.

⁸Mit je' yo'y as̈am jayau yam, caniwajtʉwu mʉj po je' jayaumay mit tsʉ̱nau dispuestu pa i-o'cwa'n, mit hasta i-o'jc cunu̱s̈ni'c.

⁹Jemni'c Dios iguiyac pa ijatwa'n más mʉj que nu'pʉjʉn itpay tsajpni'c, mit imoy pa imanda̱twa'n más que nu'pʉjʉn jayajwat.

¹⁰Mit nu'pʉjʉn ángejlat tsʉ̱ngapay tsajpni'c, nu'pʉjʉn jayajwat tsʉ̱ngapay na̱s̈ni'c, mit we'ney nu'pʉjʉn jeme tsʉ̱ngapay na̱s̈cʉtʉm nicos̈atenda̱jcʉjʉ̱́j pa igui-adora̱tcawa'n Jesús.

¹¹Pa we'n nu'pʉjʉn i-is̈capcáj mit inʉmgáj ni'c Jesucristu ayé el Señor jeme manda̱tpay, mit we'n Dios Nate̱jat tanáj mʉjninʉmic.

¹²Hermanujat jeme tʉwangʉs̈pay, injayaumaygau nu'pʉjʉn tʉnʉmgʉs̈away cuandu tʉtsʉ̱́naj mit mijchat, mit como jinap tʉgapʉn, is̈jayaumaygáj ni-as̈amu. Dios is̈salva̱tcau, mit jinap cuji'cs̈iga injayaumaygawa'n más ni'c impʉ̱tcap mʉgʉc Dios.

¹³Ni'c Dios tsʉ̱nap injo̱tni'jcat mit je' is̈actuwangap jeme oyway, mit je' is̈actuwatcap as̈am je' iguiwa'n.

¹⁴Watca oy nu'pʉjʉn cosajat. Camniqueja̱tcʉjʉ ne camni-ago'jcʉjʉ,

¹⁵pa we'n nepʉn is̈caculpa̱tcáj ne is̈camalninʉmgáj. Jinap yo'yga as̈am Dios iwajyat ni'c migatsʉ̱ngap mancha̱tic mit mal mam itsʉ̱nga jayajwat iwatcapay puru ma̱jlat. Lo que inwatcapay que's̈áj as̈am tu'c ma̱jts ta'cs̈pay chitimicni'c, mit maljayajwat i-e'pcáj ni'c inwatcap oy.

¹⁶Mit ajque's̈caja ayé jayajwat Dios ipalabra pa ma aguepca vida cacʉs̈ámpay. Ni'c we'n ji'gáj tʉnjo̱jt imi'nwa'n Cristu ni'c tʉga-ajque's̈u jalmanu mam mijchat, ne tʉgayos̈watu jalmanu.

¹⁷Ji'gáj tʉnjo̱jt te tʉnyacp tʉmvida pa Dios o te tʉnyacp tʉmvida pa tʉmajyigʉs̈wa'n mijchat. Tʉnwatp we'n pa pi cupʉjca más, mit ji'gáj najo̱jtat nanu'pʉjʉjnat.

¹⁸Ma ji'jca injo̱jtat mijchat minu'pʉjʉjnat as̈am ʉ̱ iji'c tʉnjo̱jt.

¹⁹Te el Señor Jesús iwamp, tʉ-ajyu'tcʉs̈áj jaran Timoteo pa tʉs̈jawiwa'n nat intsʉ̱nga, pa ma ji'c tʉnjo̱jt.

²⁰Ni'c ca-itp jatu'c jayau as̈amay je', ni'c je' pensa̱tp as̈amu ʉ̱, mit iwano'cp pi tsʉ̱nga oy.

²¹Ni'c nu'pʉjʉn iche'ngap pa itsʉ̱ngawa'n oy je'jatu, igache'ngap lo que iwampay Cristu Jesús.

²²Mijchat injawiganup ni'c Timoteo niporta̱jtʉp oy, mit tʉs̈majyip pa tʉs̈nʉmdacyo'ygawa'n oyway noticia. Tʉs̈majyip as̈am tu'c ya̱wáy iguimajyi ite̱t.

²³Jemni'c tʉnwamp je' tʉs̈ajyu'twa'n, po tʉn-e'jpʉ'gáj ti tʉs̈jatáj.

²⁴Mit ʉ̱ tʉconfia̱tp mit el Señor ni'c tʉnʉs̈áj pe'jyu pa tʉ-e'pcʉs̈wa'n.

²⁵Mit tʉmpensa̱tpey tʉ-ajyu'tcʉs̈awa'n Epafrodito. Je' tu'c hermanu jeme tʉs̈muyos̈watpay, mit tʉlucha̱tcap pareju pa Dios, mit mijchat inajyu'tcau je' pa tʉs̈majyiyáj.

²⁶Je' iwano'cpey is̈-e'pcáj mijchat minu'pʉjʉjnat, mit tu'mp ijo̱jt ni'c injawigau ni'c je' tsʉ̱nau tu'nij.

²⁷Mit iyacs̈ta'cway je' tsʉ̱nau tu'nij hasta ja-o'c. Po Dios i-ayo̱wis̈ je' mit ʉ̱ tʉs̈-ayo̱wis̈ey, ni'c te o'cpate, tu'nájate más tʉnjo̱jt.

²⁸Jemni'c tʉnwamp jaran tʉs̈ajyu'twa'n pa ma ji'c injo̱jtat is̈-e'pcawa'natu je', pa we'n cajatu'náj tʉnjo̱jt.

²⁹Pʉctsóuga je' oymanac ni'c je' icupʉcp el Señor, pa we'n ji'gáj injo̱jtat. Mit respetá̱tca jayajwat as̈amay je',

³⁰ni'c je' hasta ja-o'c ni'c iwano'c iguiservia̱jtawa'n Cristu, mit iyac ivida en peligru pa tʉs̈majyiyáj, ni'c mijchat ca-oyawu is̈majyigap.