Read Sayula Popoluca Filipenses 4 Bible Online

Filipenses 4 - Sayula Popoluca bible

Filipenses 4

¹Hermanujat, mijchat tʉwano'jcʉs̈p mit tʉnwamp tʉ-e'pcʉs̈wa'n. Mijchat is̈acji'jcajap tʉnjo̱jt mit tʉtsʉ̱náj mʉjninʉmic por mijchat. Siguiá̱tca mʉgʉc mit el Señor as̈am tʉnʉmgʉ́s̈aj.

²Tʉnyʉmgʉs̈ap Evodia mit Síntique ma tsʉ̱nga en acuerdu ni'c je'jat hermanajat jeme icupʉjcapay el Señor.

³Mit mi̱ hermanu, siempre ʉ̱ is̈muyos̈watp. Mit jinap tʉnʉjmap pi majyigʉs̈ ayé hermanajat ni'c tʉs̈majyigawey pa tʉs̈nʉmdacyo'ywa'n oyway noticia, mit we'ney Clemente mit japu̱t jeme tʉs̈muyos̈watcaway. Je'jat inʉ'jyat tsʉ̱nganup ja'ygu'tic en tu'c libru ijtʉpay Dios pa iguipʉctsougawa'n vida cacʉs̈ámpay.

⁴Ma ji'c injo̱jtat nu'pʉjʉn tiempu ni'c incupʉjcap el Señor. Jinap tʉnyʉmpatu: ¡Ma ji'c injo̱jtat!

⁵Nu'pʉjʉn jayajwat ma jawiga ni'c mijayawangap, ni'c tomo'c pa imi'nwa'n el Señor.

⁶Campensa̱tí̱jca ti inwatcámpay, po in-ora̱tcawa'n yo'tcaja Dios nu'pʉjʉn inyesita̱tcámpay, mit is̈yo'tcajawa'n nʉmgaja ni'ctiyu̱s̈.

⁷Mit Dios nas̈moygáj paz najo̱tni'jcat, ni'c je' nas̈moygap paz pa we'n nagajapensa̱tcáj. Mit ayé paz nas̈actsʉ̱ngáj oy pa nagapensá̱tca, ni'c namutʉgʉygau Cristu Jesús.

⁸Jinap hermanujat, tʉnʉmgʉs̈ap pi pensa̱tca nu'pʉjʉn lo que iyacs̈ta'cway, pensá̱tca pa inrespeta̱tcawa'n, pa inyo'ygawa'n yacs̈ic, pa inyo'ygawa'n limpiu, pa injayawangawa'n, pa is̈-oyninʉmgawa'n nu'pʉjʉn. Watca cuenta nu'pʉjʉn cosa oyway mit oyninʉmga nu'pʉjʉn cosa oyway.

⁹Watca nu'pʉjʉn tʉ-ajque's̈cʉs̈away, mit watca-ey nu'pʉjʉn tʉ-actumaraugʉs̈way, mit watca-ey in-is̈caway tʉs̈wat. Mit tsʉ̱náj injo̱tni'jcat ayé Dios iyacpay paz.

¹⁰Ji'go'cp tʉnjo̱jt ni'c tʉnmutʉgʉy el Señor. Ji'cpey tʉnjo̱jt ni'c mijchat is̈canijawiyo'tcawu. Siempre inwangawate is̈majyigáj, po ca-oyawu is̈ajyu'tcajap neti.

¹¹Ʉ̱ tʉganʉmgʉs̈ap ayʉ̱́j ni'c tʉnaguep mayo'c necesidáj, ni'c ʉ̱ tʉnmuyujway tʉtsʉ̱nawa'n contentu mit lo que tʉnaguepay.

¹²Oyap tʉtsʉ̱na pro̱wij mit oyapey tʉtsʉ̱na ri̱cu. Tʉnmuyujway tʉtsʉ̱nawa'n natu ica'u, te tʉcayp o te tʉgacayp, te tʉnaguep may o te tʉnga-aguep neti.

¹³Oyap tʉs̈wat nu'pʉjʉn cosajat ni'c Cristu tʉs̈moyp maj.

¹⁴Mijchat inwatcau oy ni'c is̈majyigau cuandu tʉs̈tunas̈.

¹⁵Mijchat mitsʉ̱ngapay nʉ'jcopac Filipos injawigap ni'c tʉnyʉmdacyo'y oyway noticia Macedoniajway na̱s̈, mit desde tʉpichijn jem, cupʉcpajyat tʉs̈camajyigawu, solo mijchatu is̈majyigau.

¹⁶We'ney cuandu tʉtsʉ̱́naj Tesalónica, mijchat may viaje is̈ajyu'tcajau ayuda.

¹⁷Tʉnʉmgʉs̈ap we'n ni'c tʉngawamp tʉs̈pʉctsowa'n neti pa ʉ̱jyu. Ʉ̱ tʉnwamp Dios ma is̈tso̱jcaguey mit lo que inwatcapay.

¹⁸Ʉ̱ tʉmpʉctsoway nu'pʉjʉn ayuda is̈ajyu'tcajaway mit ji'cp tʉnjo̱jt. Tʉnaguep nu'pʉjʉn ni'c tʉmpʉctsoway ayé ayuda intumu-ajyu'tcaway Epafrodito, mit ayé ayuda as̈am tu'c perfume pa'cs̈u'cpay, mit ayé as̈am inmoygapay Dios, mit je' ji'cp ijo̱jt iguipʉctsou.

¹⁹Mit ayé Dios jeme tʉnservia̱jtapay is̈moygáj nu'pʉjʉn is̈togoygapay ni'c inmutʉgʉygau Cristu Jesús, ni'c Dios ijtʉp nu'pʉjʉn mam itsʉ̱na oymanac.

²⁰Na-oyninʉ́mga Dios Nate̱jat pa nu'pʉjʉn tiempu. Amén.

²¹Saludá̱tca nu'pʉjʉn Dios ijayajwat jeme icupʉjcapay Cristu Jesús. Is̈saluda̱tcap ayé hermanujat jeme tsʉ̱ngapay mit ʉ̱.

²²Nu'pʉjʉn Dios ijayajwat tsʉ̱ngapay yam is̈saluda̱tcap, mit más is̈saluda̱tcap ayé hermanujat jeme yos̈watcapay palaciuni'c mam rey César imanda̱t.

²³El Señor Jesucristu pi is̈moygac favor pa mijchat minu'pʉjʉjnat. Amén.