Read Sayula Popoluca Colosenses 2 Bible Online

Colosenses 2 - Sayula Popoluca bible

Colosenses 2

¹Tʉnwamp pi jawiga ni'c tʉlucha̱tp mʉgʉc pa mijchat, mit pa jeme tsʉ̱ngapay nʉ'jcopac Laodicea, mit tʉlucha̱tpey pa nu'pʉjʉn hermanujat jeme tʉs̈cani-e'pcapay.

²Tʉnwamp ma ni-anima̱tcʉjʉ mit ma niwangʉjʉ pareju. Mit tʉnwampey ma entendia̱tca oy lo que icupʉjcapay, pa we'n tsʉ̱ngáj mʉgʉc mit Dios, mit we'n Dios nas̈actujawigáj ni'c nacupʉ́jca Cristu.

³Mit como namutʉgʉygau Cristu, najawigap nu'pʉjʉn cosa oyway mit na-is̈capcap nu'pʉjʉn.

⁴Tʉnʉmgʉs̈ap we'n ma is̈cawe̱jta̱jcac nepʉn, ni'c cʉjtu'c jayajwat iwangap is̈mucotscáj oymanac pa is̈we̱tcáj.

⁵Ʉ̱ tʉgatsʉ̱nap mit mijchat, po siempre tʉpensa̱tp por mijchat, mit ji'cp tʉnjo̱jt cuandu tʉs̈jawi ni'c mitsʉ̱ngap de acuerdu, mit incupʉjcap mʉgʉc Cristu.

⁶Jinap como impʉctsougau el Señor Jesucristu, yo'yga mit je'.

⁷Tánga mʉgʉc mit Cristu, mit cupʉjca mʉgʉc as̈am is̈ajque's̈cajau, mit nʉmí̱jcaja Dios ni'ctiyu̱s̈.

⁸Nicuida̱tcʉjʉ ma is̈cawe̱jta̱jcac jeme inʉmgapay ni'c i-is̈capo'jcap, ni'c ayé we̱jtat caservia̱tp. Je'jat i-ajque's̈cap as̈am iguipʉctánga mit jayajwat, mit i-ajque's̈cap puru ampay creenciajat itpay en ayʉ̱́j mundu, mit iga-ajque's̈cap lo que Cristu inʉmway.

⁹Ni'c Cristu nije'yu Dios, mit Cristu jat jayau, mit jinap je' ijtʉp nu'pʉjʉn poder as̈amu Dios.

¹⁰Mit como namutʉgʉygau Cristu, jinap Dios nas̈moygap nu'tsic nu'pʉjʉn cosajat, mit je' i-actambʉ'mp nu'pʉjʉn ángejlat jeme manda̱tcapay mit jeme itcʉjʉpay poder.

¹¹Mit mijchat mitsʉ̱ngap as̈am marca̱ticway injo̱tni'jcat, mit caje' as̈am judíujat iguimarcá̱tca icuerpujat. Ayé inʉmo'jcʉp ni'c incuyaguigaway ayé mal iyo'tway injo̱jtat, mit jinap Cristu tsʉ̱nap injo̱tni'jcat.

¹²Cuandu naninʉ'gutémgʉjʉj, natsʉ̱ngau as̈am ni'pic mit Cristu, mit jinap na-aguepcap nam vida as̈am najutucta̱jcaway mit je'. Jat we'n ni'c nacupʉjcau ni'c Dios ijtʉp poder ni'c i-acjutucta̱c Cristu mam itsʉ̱nga á̱nimajat.

¹³Mijchat ámbanu mitsʉ̱ngau as̈am o'guijcatway ni'c inwatcau mayo'c ma̱jlat, migatsʉ̱ngawu marca̱tic as̈am judíujat iguiwatca, jemni'c inga-aguepcapate parte mit Dios, po jinap Dios is̈moygau vida ni'c inmutʉgʉygau Cristu, mit is̈perdona̱tcajau nu'pʉjʉn ma̱jlat inwatcaway.

¹⁴Mit i-actogoyda̱c ayé ampay ley jeme nas̈culpa̱tcaway, ni'c ayé nas̈condena̱tcapate ni'c ca-oyawu nas̈cumplia̱tca. Mit Cristu i-actogoyda̱c ayé nas̈culpa̱tcapayate cuandu i-o'jc cunu̱s̈ni'c.

¹⁵Mit Cristu ichi'tcʉs̈au ipoder mal espíritujat jeme manda̱tcapay, mit je' i-actujawigʉs̈ nu'pʉjʉn jayajwat ni'c ca-itcʉjʉwu maj ayé mal espíritujat, mit ivencia̱tcʉs̈ cuandu i-o'jc cunu̱s̈ni'c.

¹⁶Nepʉn ma is̈camalninʉmgac te micaygap o te mi-u̱jcap, te ingaguarda̱tcap ma̱s̈ʉjwat, te ingatsougap ma̱s̈ʉjw cada po' ne po'cs̈ans̈ʉjwat.

¹⁷Ni'c ayé ampay costumbrejat as̈am tu'c amu̱jʉc inas̈, po ayé solo nas̈actujawigau ti jatámpay, mit como minway Cristu, jinap je'yu nacupʉjcap.

¹⁸Cammoyga laj is̈chi'tcajáj premiu impʉctsougámpay, ni'c cʉjtu'c ayé jayajwat niwatcʉjʉp as̈am humilde, mit i-adora̱tcap ángejlat, itunitʉgʉygʉjʉp jeme igani-e'pcapay, nimʉjninʉmgʉjʉp may jalmanu, as̈am je'jatu ipensá̱tca.

¹⁹Mit ayé jayajwat igamutʉgʉygap mʉgʉc Cristu, ni'c ayé cupʉcpajyat jeme Cristu i-actangʉs̈pay ayé as̈am icuerpu mit imoygʉs̈p maj pa ma tsʉ̱nga en acuerdu, mit nimajyigʉjʉp as̈am Dios iguiwa'n.

²⁰Mitsʉ̱ngap as̈am o'guic mit Cristu ni'c incuyaguigaway ampay creenciajat itpay en ayʉ̱́j mundu, mit jinap ¿tini'c miyo'ygapnaj as̈am jayajwat ayʉ̱́j mundujway? mit ¿tini'c is̈jayaumáyga lo que is̈nʉmgajapay?

²¹Is̈nʉmgajap: “Camactánga neti, camcayga ayé, ne camtsʉjca neti. We'n is̈nʉmgajap ayé jayajwat.”

²²Nu'pʉjʉn je'jat is̈nʉmgajapay ayé jalmanu ni'c itp ti icʉs̈cawa'n ayé cosajat. Ni'c ayé ama̱s̈an is̈ajque's̈cajapay, je'jatu i-acchu̱chigau.

²³Nu'pʉjʉn je'jat iwatcapay que's̈pate oymanac, ni'c adora̱tcap as̈amu iguiwanga, niwatcʉjʉp as̈am humilde, hasta ipas̈cap icuerpujat. Po nes̈ʉ̱n caservia̱tp ayé cosajat ni'c cʉs̈wa'n iwangapatu ayé mal iyo'tpay ijo̱jtat.