Read Sayula Popoluca Colosenses 3 Bible Online

Colosenses 3 - Sayula Popoluca bible

Colosenses 3

¹Mijchat mitsʉ̱ngap as̈am mijutucta̱jcaway mit Cristu. Jinap che'nga lo que Dios is̈acmingajapay mam Cristu itsʉ̱na i-oyimaycʉ'ni'c Dios.

²Pensa̱tí̱jca ayé cosajat is̈acmingajapay Dios, mit campensa̱to'jca mit ayé cosajat itpay en ayʉ̱́j mundu.

³Mitsʉ̱ngap as̈am o'guic ni'c ingajawatcap cuenta mal cosajat, mit jinap inaguepcap nam vida ni'c inmutʉgʉygau Cristu, mit Dios is̈cuida̱tcap.

⁴Mit Cristu ayé nas̈moygapay vida, mit cuandu je' ique's̈ta'cwa'n, naque's̈ta̱jcámpey mit je' tsajpni'c mam i-oymánagui.

⁵Nijawiyo'tca nu'pʉjʉn mal iyo'tpay injo̱jtat yam, inchajyo'ygawa'n, is̈watcawa'n mal, is̈wangawa'n mʉgʉc mal cosajat, is̈wangawa'n jayje'. Ni'c jeme iwangapay mʉgʉc jayje' ayé imu-e'p as̈am tiyu̱s̈wampajyat ni'c iyajcap menus Dios.

⁶Jemni'c Dios icastiga̱tcʉs̈áj jeme cajayaumaygapay, ni'c iwatcap ayé mal cosajat.

⁷Mijchat wename-ey inyo'ygaj ámbanu, ni'c inwatcawey ayé mal cosajat.

⁸Po jinap cuyáguiga ayʉ̱́j: Cam-awa'niga, camjoranda̱jca, camwatca mal, camtucotsca nepʉn, camtʉ'tscotscayu.

⁹Camjaniwe̱tcʉjʉ mijchatu ni'c incuyaguigaway ayé ampay vida inaguepcaway ámbanu, ni'c ámbanu inwatcau puru mal.

¹⁰Mit jinap inaguepcap nam vida, ni'c Dios is̈namwatcau pa pi jatca as̈am je', pa we'n inis̈capcáj más Dios.

¹¹Dios niwe'nu igui-e'pcʉs̈ nu'pʉjʉn jayajwat, judíujat mit jeme caje'jatway judíujat, marcá̱tijcatway mit camarcá̱tijcatway, pe'tá̱majyat mit jeme iga-is̈capcapay neti, mozojat mit jeme yo'ygapay libre, ni'c Cristu ayé i-actampay nu'pʉjʉn.

¹²Dios is̈wangap mit is̈cupiugau pa is̈je'jatcáj. Jinap wátca ayʉ̱́j: Jayaumáyga nu'pʉjʉn is̈nʉmgajapay Dios, ayo̱wís̈ca, jayawánga, camnimʉjninʉ́mgʉjʉ mit aguépca calma.

¹³Nimajmóygʉjʉ mit niperdoná̱tcʉjʉ te miniche'jcʉjʉp. As̈am Cristu is̈perdona̱tcau, wename-ey mijchat wátca.

¹⁴De nu'pʉjʉn cosajat, más oy pi niwangʉjʉ, ni'c ayé nas̈acjatcap as̈am tu'jcatu.

¹⁵Mit ma tsʉ̱na injo̱tni'jcat ayé paz is̈moygapay Dios, ni'c Dios is̈ya̱s̈cau pi tsʉ̱́nga as̈am tu'jcatu, mit tsʉ̱́nga agradecidu.

¹⁶Nu'pʉjʉn is̈nʉmgajaway Cristu ma tan injo̱tni'jcat. Ajque's̈ca mit tsáwiga minu'pʉjʉjnat ni'c Dios is̈actujawigap nu'pʉjʉn. Ʉuga salmu mit himnujat, mit ʉ́ugaja el Señor, mit ʉ́uga jeme Espíritu Santu is̈moygámpay, mit tsʉ̱́nga agradecidu.

¹⁷Nu'pʉjʉn inyʉmgámpay o inwatcámpay, watca nu'pʉjʉn ni'c injayaumaygap el Señor Jesús, mit nʉmgaja Dios Nate̱jat ni'ctiyu̱s̈ ni'c inmutʉgʉygau Jesús.

¹⁸To's̈ajyat ma jayaumayga ina'jwat ni'c je'jat icupʉjcap el Señor.

¹⁹Jayajwat ma wanga ito's̈ajyat mit magamu-awa'niga.

²⁰Nu'pʉjʉn ya̱wájat ma jayaumayga iguimanda̱tcáj ima̱jmat mit ite̱jtat, ni'c ayé igui-acji'jcap ijo̱jt el Señor.

²¹Jayajwat maga-ac-awa'niga iwajyat, ni'c oyap inidesanimá̱tcʉjʉ.

²²Mozojat, jayaumáyga injaycat mit tiyu is̈nʉmgajámpay yam. Yos̈wátca caje'yu cuandu is̈-e'pcáj, caje' as̈am iwangapay itangawa'n oy mit ijaycat, po mijchat yos̈wátca oy mit nu'pʉjʉn injo̱jtat ni'c impʉ̱tcap Dios.

²³Mit nu'pʉjʉn inwatcámpay pi watca mit nu'pʉjʉn injo̱jtat ni'c inservia̱tcajap el Señor, mit caje' jayajwat.

²⁴Injawigap ni'c Cristu el Señor is̈moygáj ayé recompensa itpay tsajpni'c, ni'c inservia̱tcajap je'.

²⁵Po jeme iwatpay mal, Dios igui-actutso'gáj por ayé mal iwatway, ni'c Dios niwe'nu igui-e'pcʉs̈ nu'pʉjʉn jayajwat.