Read Sayula Popoluca Colosenses 4 Bible Online

Colosenses 4 - Sayula Popoluca bible

Colosenses 4

¹Mijchat mimanda̱tcapay watca oy mit inmozojat. Injawigap ni'c inaguepcapey tsajpni'c el Señor jeme is̈manda̱tcapay.

²Ora̱tí̱jca mit camtentanga in-ora̱tcawa'n, mit nʉmgaja Dios ni'ctiyu̱s̈.

³Orá̱tca-ey pa el Señor ma tʉs̈moygac laj tʉtʉgʉygawa'n jʉmba'tu, pa tʉs̈nʉmdacyo'ygawa'n i-oyway noticia. Tʉnwamp ma jawiga-ey ni'c Cristu tsʉ̱nanup najo̱tni'jcat, mit jemni'c tʉtsʉ̱na presu.

⁴Jemni'c orá̱tca pa tʉs̈ajque's̈wa'n ayé oyway noticia as̈am je' tʉs̈nʉjmau.

⁵Niportá̱tcʉjʉ oy pa ma e'pca jeme canicupʉjcapay, mit aprovechá̱tca cada s̈ʉjw pa is̈watcawa'n oy.

⁶Oymu-ampíuga nu'pʉjʉn jayajwat. Cammu-awa'ncotsca. Pa we'n injawigáj nat is̈po'ngawa'n cada jayau.

⁷Tíquico is̈actujawigáj nu'pʉjʉn nat ʉ̱ yam tʉtsʉ̱na, ni'c je' tu'c hermanu nawangapay, mit icumplia̱tp oy nu'pʉjʉn yos̈ iguimoyway el Señor, mit je' tʉs̈muyos̈watp.

⁸Mit je' tʉnajyu'tey pa ma is̈actujawigac nat ʉjtsat tʉtsʉ̱nga, mit pa is̈-anima̱tcáj.

⁹Tʉnajyu'tey Onésimo mit je', mit Onésimo nawangap ni'c je' tu'c hermanu yos̈watpay oy, mit je' nije'yu intʉcmayna̱s̈atway. Mit je'jat is̈actujawigáj lo que jatpay yam.

¹⁰Is̈saluda̱tcap Aristarco jeme tsʉ̱napay presu mit ʉ̱, mit is̈saluda̱tcapey Marcos, Bernabé imajtsʉc. Te nʉs̈p mam mijchat, pʉctsóuga oymanac ni'c we'n tʉnʉmgʉ́s̈aj.

¹¹Mit is̈saluda̱tcapey Jesús inʉ'jywayey Justo. Ayé tu̱gup jayajwat judíujat mit je'jatu tʉs̈muyos̈watcap hasta jinap pa jayajwat ma jawiga nat imanda̱twa'n Dios, mit je'jat tʉs̈consola̱tcau.

¹²Is̈saluda̱tcap Epafras mit je' nije'yu intʉcmayna̱s̈atway, mit je' iservia̱jtap Cristu. Je' iyo'jtap mʉgʉc Dios pi tanga mʉgʉc mit je', pi tsʉ̱nga dispuestu is̈watcawa'n nu'pʉjʉn Dios iwampay.

¹³Ʉ̱ tʉnʉmgʉs̈ap ni'c Epafras pensa̱to'cp pa mijchat, mit we'ney pa jeme tsʉ̱ngapay nʉ'jcopajcat Laodicea mit Hierápolis.

¹⁴Is̈saluda̱tcap Lucas ayé doctor nawangapay, mit is̈saluda̱tcapey Demas.

¹⁵Saludá̱tca hermanujat jeme tsʉ̱ngapay nʉ'jcopac Laodicea, mit we'ney Ninfas mit ayé cupʉcpajyat jeme ni-apʉcmujcʉjʉpay itʉcm.

¹⁶Cuandu iguicotscawa'n ayʉ̱́j noc mam mijchat, inacnʉs̈cajámpey ma cotsca ayé cupʉcpajyat tsʉ̱ngapay Laodicea, mit cótsca-ey ayé noc ja'yicway pa Laodiceajatway.

¹⁷Nʉmgaja Arquipo ma cumplia̱t ayé yos̈ iguimoyway el Señor.

¹⁸Ʉ̱ Pablo tʉsaluda̱tcʉs̈p ja'yic tʉncʉ'ni'c. Nijawiga ni'c tʉtsʉ̱nap presu. Dios pi is̈moygac favor. Amén.