Read Sayula Popoluca 1 Tesalonicenses 1 Bible Online

1 Tesalonicenses 1 - Sayula Popoluca bible

1 Tesalonicenses 1

¹Ʉ̱ Pablo, Silvano mit Timoteo tʉnsaluda̱tcap cupʉcpajyat jeme tsʉ̱ngapay nʉ'jcopac Tesalónica. Mijchat inmutʉgʉygau Dios Nate̱jat mit el Señor Jesucristu. Dios Nate̱jat mit el Señor Jesucristu pi is̈moygac favor mit paz.

²Tʉnyʉmí̱jcajap Dios ni'ctiyu̱s̈ ni'c micupʉjcap mʉgʉc, mit tʉ-ora̱tí̱jcajap minu'pʉjʉjnat mijchat.

³Tʉnyijawi-í̱jcap ni'c inwatcap oy ni'c micupʉjcap. Miyos̈watcap mʉgʉc pa Dios ni'c inwangap je', mit inmajmoygap pruebajat ni'c inatsʉ̱ngap imi'nwa'n el Señor Jesucristu, mit Dios Nate̱jat i-e'p nu'pʉjʉn ayé inwatcapay.

⁴Hermanujat, tʉnjawigap ni'c Dios is̈cupiugau ni'c je' is̈wangap.

⁵Ayé oyway noticia tʉnʉmgajaway caje' tʉ'tsnʉmna'yu po ijtʉu may poder, mit tʉtsʉ̱ngap seguru ni'c Espíritu Santu is̈tsʉjcajau injo̱jtat. Injawigap nat tʉniportá̱tcʉjʉj mam mijchat pa pi tsʉ̱nga oy.

⁶Mit mijchat inwatcau as̈am ʉjtsat tʉs̈wátcaj mit as̈am el Señor iguiwajt. Impʉctsougau lo que tʉnʉmgajaway mit intunas̈cau mayo'c, po is̈acji'cta̱jcajau injo̱jtat Espíritu Santu.

⁷Mit mijchat inyajcau tu'c oyway ejemplu pa nu'pʉjʉn cupʉcpajyat jeme tsʉ̱ngapay Macedoniajway na̱s̈ mit Acayajway na̱s̈.

⁸Jemni'c iguimáraugaj el Señor ipalabra Macedoniajatway mit Acayajatway, mit we'ney nu'pʉjʉn lugajrat ijawigap nat is̈cupʉ́jca Dios, mit jemni'c ca-itp ti tʉs̈nʉmgajawa'n más.

⁹Ni'c je'jat i-ampiugap nat tʉvisitá̱tcaj mijchat, mit nat is̈cuyáguigaj tiyu̱s̈at pa is̈cupʉjcawa'n Dios, mit jinap injayaumaygap ayé Dios jeme tsʉ̱napay pa siempre, mit ayé Dios iyacs̈ta'cway.

¹⁰Mit jinap inatsʉ̱ngap imi'nwa'n Dios iway tsajpni'c jeme Dios i-acjutucta̱cway mam itsʉ̱nga á̱nimajat. Ayé Jesús jeme nas̈libra̱tcaway pa nagatunas̈ca ayé tiempu ijuzga̱twa'n Dios.