Read Sayula Popoluca 1 Tesalonicenses 3 Bible Online

1 Tesalonicenses 3 - Sayula Popoluca bible

1 Tesalonicenses 3

¹Tʉnwano'c tʉ-e'pcʉs̈wa'n po ca-oyawu tʉnʉs̈. Mit como tʉngamajmoyu más, tʉmpensa̱t tʉtanwa'n tʉntu'gumu nʉ'jcopac Atenas,

²mit tʉnajyu't hermanu Timoteo ni'c je' iservia̱jtap Dios mit tʉs̈muyos̈watcap pa tʉs̈ajque's̈cajawa'n Cristu i-oyway noticia. Tʉnajyu't je' pi is̈moygac maj, pi is̈animá̱tcac pa incupʉjcawa'n más,

³pa nepʉn magadesmaya̱t cuandu is̈tunas̈ca. Mijchat injawigap ni'c itp ti nas̈tunas̈cawa'n.

⁴Ni'c cuandu tʉtsʉ̱́ngaj mit mijchat, tʉnʉmgajau ni'c itp ti nas̈tunas̈cawa'n. Mit injawigap ni'c we'n is̈jatcau.

⁵Mit ca-oyawu tʉs̈majmo' más, jemni'c tʉs̈ajyu'jt Timoteo pa tʉs̈jawiwa'n te siguia̱tp incupʉ́jca. Tʉngajawip te is̈tenta̱tcaway ma̱lwayna' mit tan jalmanu tʉ-ajque's̈cajaway.

⁶Po cuandu ipítucnuj Timoteo mam mijchat, imumin oyway noticia ni'c micupʉjcapnaj mit mijayawano'jcap, mit is̈nijawigapnaj. Inʉm ni'c inwano'jcap is̈-e'pcáj, mit ʉjtsat tʉnwangapey tʉ-e'pcawa'n mijchat.

⁷Hermanujat, ʉjtsat yam tʉs̈po'ctangau mit tʉnaguepcau necesidad, po cuandu tʉs̈máraugaj ni'c micupʉjcapnaj, ji'cta̱jcau jaran tʉnjo̱jtat.

⁸Mit jinap contentu tʉtsʉ̱ngawa'n te misiguia̱tcap mʉgʉc is̈cupʉ́jca el Señor.

⁹Mit mayo'c tʉs̈nʉ́mgaja Dios ni'ctiyu̱s̈ ni'c micupʉjcap, ni'c is̈acji'jcajap tʉnjo̱jtat mam Dios tʉs̈-e'pcap.

¹⁰Tʉ-ora̱tí̱jcap mʉgʉc tsu'm mit s̈ʉ̱m pa nani-e'pcʉjʉwa'n, pa we'n tʉmajyigáj te is̈togoygap pa incupʉjcawa'n más.

¹¹Mit nije'yu Dios Nate̱jat mit el Señor Jesucristu ma tʉs̈acnʉs̈cac pa tʉcoygawa'n mam mijchat.

¹²Mit el Señor pi is̈acniwangʉjʉc más mit pi is̈actuwangac más nu'pʉjʉn jayajwat as̈am ʉjtsat tʉmuniwángʉjʉ mijchat.

¹³Pa we'n el Señor is̈moygáj maj injo̱tni'jcat pi yo'yga limpiu sin culpa mam is̈-e'pcap Dios Nate̱jat. Mit we'n mitsʉ̱ngáj oy imi'nwa'n el Señor Jesucristu mit nu'pʉjʉn ijayajwat icupiugʉs̈way.